² Ee ichuli-chuli yanyi ya mwego, umginune MLUME. Ata bibyo ushigibilichi yano yage yose. ³ Guleelele usona obe ose, Guhonya bisumi byobe byose. ⁴ Gwahogononya mwego bobe na sinda, Gubiya sala lya yano na uleelelea, ⁵ Gwaugyusha bisoga buungu bobe, Buwalubaga bobe ubugiwicha nahi loochi; ⁶ MLUME noo gusugila bihisho bya kiine, Na uonona u bose bali humonenywa. ⁷ Gummoninye Musa madila mage, Baana ba Isilaeli bigilanywa byabo. ⁸ MLUME guli mgiluchu uleelela na keene, Gushibawata sungu abilo ii gwa yano ingi. ⁹ Gee gushigamba masugu mose, Na gushiwata sungu chage milumbu. ¹⁰ Gushitugilile ulamana na usona wetu, Na gusatuha alambwe ulamana na usona wetu. ¹¹ Bululi nahi gulu byalili liginyubu hegulu ha sii, Ulamana biya bili uleelela wage uulu ubaya bali humnyemya. ¹² Nahi bili mengo ma lwelo koo na mengo ma igolo, Bibyo noo byeli biile buubi bwetu koo netu. ¹³ Nahi bisumonena shibaana keene u baana bage, Byoka biya MLUME gusumonena kee bene bali humnyemya. ¹⁴ Bululi gee gutugidi byeli tubumbile, Na uengelecha ugana beswe tuli ihwili. ¹⁵ Mtu masugu mage mali nahi byanyi; Nahi buluba bwa umiti noo byesushama. ¹⁶ Bululi mnaga gusuhita wabuli, nabo nuugwa! Na hene habubele hashihumanyia iyaka. ¹⁷ Mndi yano ya MLUME ii ya bene bali humnyemya Utula milumbu na milumbu, Na kiine chage icha baana ba baana; ¹⁸ Iyugana, baya balihuwasha alago age, Na uengelecha malagano mage na umagila. ¹⁹ MLUME gwabiya iti yage ya buoolo ha gulu, Na buolo bwage bulihutabala bitu byose. ²⁰ Mginunywe MLUME, benywe ba malaika bage, Benywe muli nauoma , na mulihugilila inywa yage, Muhuliche lidi lya inywa yage. ²¹ Mginunywe MLUME, benywe bilume pambwa byage byose, Benywe bagichi bage musugila byesubenja, ²² Mginunywe MLUME, byenywe bigilanywa byage byose. Ee ichuli-chuli yanyi ya mwegi umginune MLUME.