¹ Ee Abetcha a punda chanyi, ushishame pii, ² Yulu bambululila anywa; Anywa a mtu gushi gwa kiine ii a buyanja, Balihudogoma nanyi wa lulimi lwa ubichana. ³ Ehe, wa binywa bya uonywa banyunguluwa, Bahulana nanyi bunene. ⁴ Hanyuma ha luundo lwanyi boo balihushitaki, Inangwa nibasabile. ⁵ Bangiwidicha buubi hanyuma ha busoga, Na uonywa hanyuma ha luundo lwanyi. ⁶ Ubiye mtu gwa bwelemanya hegulu hage, Amangu agimane uboo wage wa ulume. ⁷ Mnda uononywa gwimoneya gushi na kiine, Na usaba wagi wilangilwa ii buubi. ⁸ Masugu mage na mabe machoo, Ugimanina wage na uguhe gunge mtu. ⁹ Baana bage na babe mashige, Na mmachage na gabe m'bwile. ¹⁰ Uhubagana-hubagana na ube uu baana bage na usama, Baenge ililwa koo na umauwa mabo. ¹¹ Mlipisha na gaguhe bitundu byose byeli nabyo, Bagenyi na bawate kole byeli nabyo bya maboo mage. ¹² Gashibe na mtu gum'biila yano, Na ata mtu gubamonena keene mashige mage. ¹³ Babuswa bage na bashimiwe, China lyabo lichimwe mnda ibushi ya bubili. ¹⁴ Usona wa bamasagu na uengelechiwe umbele wa MLUME, Na buubi bwa mnaga bushichimwe. ¹⁵ Bube umbele wa MLUME masugu mose, Gauhunye uengelechiwa wabo mmibaloo. ¹⁶ Bululi gushiengeleche ugila bya yano, Yulu gumchingile alema na msabi, Na ummaga mtu gwamnogebu mtima. ¹⁷ Nage gubenjiche uloga, nao umchwilile. Gushiundile uhala mihaa, ubele koo nage. ¹⁸ Gulichiiche buloga nahi noo ichwalaganywa yage. Imgingilile mnda mtima nahi madi, Na nahi mauta mnda mauda mage. ¹⁹ Na bibe weli nahi byesuchwala ichwalaganywa, Na nahi mchingo gwesulihamba masugu mose. ²⁰ Bibyo noo byabihewa bashitaki banyiuhuma wa MLUME, Na baya bene balihuchinga ichuli-chuli yanyi ya mwego buubi. ²¹ Na Gogwe,ABETCHA, Mlume,Ungilile yulu ya china lyobe, Bululi wa yano yobe iyisoga upogonone. ²² bululi nene nilialema na msabi,Na mtima gwanyi gwina malase mnda mwanyi. ²³ Nihitanahi ihochu byaisutula uchimina, Nili huhugichiwa nahi njige. ²⁴ Machwi manyi malebela yulu ya uhamba nagu uya iliwa, Na m'bili gwanyi gwagonda yulu ya uhulwa mauta. ²⁵ Nene nibele ubechiwa wabo, Habasumona basudigicha miswe gyabo. ²⁶ Ee MLUME, Abetcha anyi, umbwatiliche, Upogonone ulamana na yano yobe. ²⁷ Nabo bamaane ugana noo uboo obe; Gogwe, MLUME, wabigila bibyo. ²⁸ Boo basuloga ,Gogwe usuhala mihaa, Mengo mabasugya ulwa basudamba mme, Haho mgichi gobe gwimona saso. ²⁹ Bushitaki nene bimona abule, Bilichwiya abule abo naho ichibabo. ³⁰ Nimginuna MLUME wa anywa anyi, Ehe, nimtona hawingi ha sumbilo. ³¹ Bululi gwigimana uboo wa ulume wa msabi Gammogonone na bene bali hummonona ichuli-chuli yage ya mwego.