¹ Hanyuma Mlume gudogomine na Musa mgala wa Sinai, mwechi gwa gutangi gwa mwaa gya bubili hanyuma ha uhuma wabo mnda sii gya Misil, gumsambile, ² Iyaka, baana ba Isilaeli bause lusugu lwa ulitucha lwa Pasaka mengo mage mene malagilwe. ³ Lusugu lwa umi na buna lwa guno mwechi, mengo ma igolo, mwiusa mengo mage mene malagilwe; na alago age ose, na uonona wage ose nahi byauli, noo byamwiuusa. ⁴ Hanyuma Musa gusambike baana ba Isilaeli ugana bause lusugu lulo lwa ulitucha lwa Pasaka; ⁵ Nabo bausile Pasaka ha mwechi gwa tutangi, lusugu lwa umi buna lwa mwechi, mengo ma igolo, mnda mgala gwa Sinai byoka biya nahi biya byose byine bilagilwe Musa na Mlume, noo byabagilile baana ba Isilaeli. ⁶ Bibyo habele bamwe batu bene babele na bunyenye yulu ya bitumba bya batu, na bashiosiche uusa Pasaka luya lusugu; nabo bagile u mbelewa Musa na Haluni, lulo lusugu babo batu ba,sambile, ⁷ beswe tuli na bunyenye yulu ya bitumba bya batu; beswe twachibilwa yulu yai tushioshe umtamgila Mlume tambiko wa mengo mage mene malagilwe, hawingi ha baana ba Isilaeli? ⁸ Musa gubasambile, Hembwe haho; ndaa nabyandihulicha Mlume byelindaga yulu yenyu. ⁹ Mlume guganine na Musa, gumsambile, ¹⁰ Dogoma na baana ba Isilaeli, ubasambile, Mtu gwa wenyu, ao gwa bibushi byenyu, ge gese mine gubi na bunyenye wa yulu ya bitumba, ao gugile lwendo lwa koo, na bino byose gwiusa Pasaka gya Mlume; ¹¹ Mwechi gwa bubili, masugu ma mwechi umi na mana, mengo ma migolo, bigusa, bigiya hamwechi na mikati gishi yagibiwe mshimi na mnanyi gwa byaanyi bya bululu; ¹² bashishige ibya yo yose ndaa na halwelo, na bashibele uda lyage; nahi bili m'bindo gose gwa Pasaka byaguli noo byabiguusa. ¹³ Alakini mtu mine guli mmaha, na gushibele lwendo, nage gwaiswa uusa Pasaka, gugo mtu gwichingwa koo na batu bage; wa ibalo gusamtangila Mlume tambiko mengo mage mene mali malagwe, gugo mtu gwiguha buubi bwage. ¹⁴ Na nambo mgenyi gabeshama wenyu nahi mgenyi, nage gulihubenja uusa Pasaka gya Mlume; nahi guya m'bindo gwa Pasaka byaguli, noo byeliita; mubi na m'bindo gumweci nage, wa gugo mgenyi, na w guya mine gubutilwe mnda gigyo sii. ¹⁵ Na luya lusugu bushamo habuhwile ugimiwa, liya timba liwilile buya bushamo, noo hema lya busambeno; mengo aigolo libelemhegulu ha bushamo, mlingilisho gwaahya, ndaa na halwelo. ¹⁶ Noo byabibele masugu mose; liya timba liwilile m'busugu mlingilisho gwahya. ¹⁷ Na ho hose hene haliununywe liya timba hegulu ha itula haho noo habatulile lwendo baana ba Isilaeli; na ho hose hene haligimene liya timba, haho noo habashamine baana ba Isilaeli. ¹⁸ Wa alago a Mlume baana ba Isilaeli batulile lwendo, na wa alago a Mlume bashamine; maya mengo mashamine liya timba hegulu ha bushamo nabo bashamine mnda bitula yabo. ¹⁹ Na liya timba halisingile hegulu ha bushamo masugu mengi; haho baana ba Isilaeli bausile mihano gya Mlume, nabo bashigyatile. ²⁰ Na hange liya timba lishamine hegulu ha bushamo masugu macho; mndi wa alago a Mlume bashamine m bitula byabo, iyaka wa alago a Mlume bagyatile. ²¹ Na hange liya timba lishamine utula igolo ndaa na halwelo; naliya timba haliginunywe halwelo bachuwile na utula lwendo, ao nambo libeshama busugu na chuba, haliginunywe liya timba, hoka haho bachuwile na utula lwendo. ²² Uba nambo liya timba lisingile, libeshama hegulu ha timba masugu mabili, au mwechi, ao mwaa,baana ba Isilaelibashamine mnd bitula byabo, bashigyate; ²³ mengo maliginunywe batulile lwendo. Wa alago a Mlume bashamine m bitula byabo, na wa alago a Mlume batulile lwendo; bausile mihano gya Mlume, wa uhitila uboo wa Musa.