¹ Hanyuma Mlume gudogomine na Musa, na umsambila, ² Dogoma na Haluni, wamsambile, Holibiya matala, mamo matala njwii milusha lwenge u mbele wa guya mti gwa tala. ³ Haho Haluni guitile; gubiile matala mage yulu mahunye lwenge uya umbele wa mti gwa matala, nahi Mlume byelimlagile Musa. ⁴ Na gugo noo mgilo gwa guya mti gwa matala, gubele m mgilo gwa butumbi bwa nolo; utula tao lyage ndaa na buluba bwage gubele m mgilo gwa butumbi; byoka biya nahi Mlume byelimmoninye Musa guya mlingilisho, noo byeliitile guya mti gwa matala. ⁵ Hanyuma Mlume gudogomine na Musa, na umsambila, ⁶ Baguhe Balawi na ubahunya hawingi ha baana ba Isilaeli, hanyuma ubahahache. ⁷ Gogwe wibaitila bino bikoko yulu ubahahache; ubagesele hegulu habo maadi mene masuhahacha buubi, nabo balibege na abego m'bili gose, hanyuma baafule bichwalaganywa byabo, na ulihahacha. ⁸ Hanyuma baguhe ng'ombe gimwechi gya mlume gya mwana, na lutangi lwage lwa buusu, buusu bwa nekuneku bwa busupaganyiwe na mauta, gogwe wiguha ginge ng'ombe gimwechi gya mlume gya mwana uba lutangi lwa buubi. ⁹ Gogwe wibalusha Balawi u mbele wa hema lya busambeno; gogwe wisumbicha sumbilo lyose lya baana ba Isilaeli; ¹⁰ gogwe wibalusha Balawi u mbele wa Mlume; hanyuma baana ba Isilaeli bibiya maboo mabo hegulu ha Balawi; ¹¹ nage Haluni gwibashenya Balawi u mbele wa Mlumebaabe lutangi lwa udigichiwa, yulu ya baana ba Isilaeli, bululi baabe ba ugila bugichi bwa Mlume. ¹² Hanyuma Balawi bibya maboo mabo hegulu ha miswe gya chiya ng'ombe; gogwe wiguha gimwechi uba lutangi lwa buubi wa Mlume, na giya gya bubili gibe lutangi lwa uchigya; bululi bwuita usambanya yulu ya balawi. ¹³ Hanyuma wibabiya Balawi u mbele wa Haluni, na umbelewa baana bage na ubashenya wa Mlume baabe lutangi lwa udigichiwa. ¹⁴ Bibyo noo byolibabagula Balawi na ubahunya hawingi ha baana ba Isilaeli; na Balawi babi banyi. ¹⁵ hanyuma Balawi bigingila mnda, yulu baagile bugichi bwa itula ya busambeno; gogwe wibahahacha; wibatangila babe lutangi lwa udigichiwa. ¹⁶ Bululi nene nabaha abisa bano batu uhuma hawingi ha baana ba Isilaeli; Niguha bose bene bisula magumo, noo ugana, bubele bose bwa baana ba Isilaeli, nabaguha babe banyi. ¹⁷ Bululi bubele bose bwa baana ba Isilaeli m banyi, ba batu na ba nyama; luya lusugu lwandibahulile ba bubele bose ba mnda sii gya Misili nimmaheche benywe yulu yanyi nene mine. ¹⁸ Nene nabaguha Balawi uba nahi bubele bose bene bali hawingi ha baana ba Isilaeli. ¹⁹ Nene namma Haluni babo balawi babe bumana bwage gee na baana bage, uhuma u baana ba Isilaeli, bululi baagile bugichi bwa baana ba Isilaeli mnda hema lya busambeno, hanyuma baita usambanya yulu ya baana ba Isilaeli, yulu hashibe na tuhunago hawingi ha baana ba Isilaeli, mengo mabishena ha ihana ya ihaha baana ba Isilaeli. ²⁰ Haho Musa na Haluni, na sumbilo lyose lya baana ba Isilaeli, babaitile Balawi biya bikoko byose; nabi biya byose Mlume byelimlagile Musa yulu ya mwano gwa Balawi, bibyo noo baana ba Isilaeli byababagilile. ²¹ Balawi balihahache na buubi, nabo bafulila bichwalaganywa byabo; hanyuma Haluni gubatangile u mbele wa Mlume babe lutangi lwa udigichiwa; Haluni gugilile yulu yabo bululi bwa ubahahacha. ²² Hanyuma ha bibyo Balawi bagingile yulu bagile bugichi bwabo mnda itula ya busambeno u mbele wa Haluni na u mbele wa baana bage; nahi Mlume byelimlagile Musa yulu ya mwano gwa Balaei, noo byabagililwe. ²³ hanyuma Mlumegudogomine na Musa, na umsambila, ²⁴ Bikoko bibalingye babo Balawi noo bino; utula bene bina myaa maumi mabili na gitano na uhima bigingila mnda yulu baagile bugichi mnda hema lya busambeno; ²⁵ iyaka habitula uhyiila myaa maumi matano bileya ugila bubo bigichi, bashigile iyaka; ²⁶ alakini babi hugila hamwechi na bashiwabo mnda hema lya busambeno, yulu ya ubawatilicha, alakini bashigile buya bugichi iyaka. Noo byolibagilila Balawi u bikoko bya uwatilicha wabo.