¹ Hanyuma Mlume gudogomine na Musa, na umsambila, ² Dogoma na baana ba Isilaeli, ubasambile, Mlumyana ao mmachana helibiya ulibindila waata, ulibindila wa Mlibindilwa, yulu galibagule yulu ya Mlume; ³ Gwilibagula gee mine na malwa na byuochanya; gushinywa mshimi gwa malwa, ao mshimi gwa byuochanya, na gashinywe maadi mo mose ma zabibu, na gashiye zabibu, chibisi au cha chigumu. ⁴ Masugu mose ma ulibagula wage gashiye yo yose ilongechiwe wa zabibu, utula migimba nda na byula, ⁵ Masugu mose ma ulibindila wage ma ulibagula, abego ashihite mswe mwage; ndaa na byiwilia maya masugu, mene melilibagule yulu ya Mlume, gubi mmaha, gwichileya njuli cha mse gwage chibe chilahu. ⁶ Masugu mamo mose mene melilibiile uba wa Mlume gashishenene itumba. ⁷ Gushilibiya bunyenye yulu ya sage, ao yulu ya mnage, ao yulu ya mshiwabo gwa mlumyana, ao yulu ya kachage, babo babewa; ibalo ya gugo ulibiya wa Abetcha m yulu ya mswe gwage. ⁸ Masugu mage mose ma ulibagula, gee m mmaha gwa Mlume. ⁹ Na nambo mtu gabewa wa ubuluswila hoka nage, gabelibiya bunyenye mswe ga ulibagula wage, haho noo helibega mswe gwage lulo lusugu lwa uhahachiwa wage, gwigubega lusugu lwa njwii. ¹⁰ Iyaka lusugu lwa inana gwilusha madiba mabili, ao baana ba tukundulu babili, gaagye babyo wa ibuli, ndaa na uchango gwa itulaya busambeno; ¹¹ nayo ibuli yitambikila limwechi uba lutangi lwa buubi, na abubili uba lutangi lwa uchigya, nage gwiita usambyayulu yage, wa ibalo gugingile mnda ulubawa yulu ya mmu, nage gwihahacha mswe gwage loka lulo lusugu. ¹² Hanyuma gwimabiya mamo masugu ma ulibagula wage wa Mlume, nage gwilusha mwana-mmoo gwa mlume gwa mwaa gumwechi, uba lutangi lwa bachi; alakini maya masugu ma utula mashibalwa, bululi uya ulibagula wage ubiilwe bunyenye. ¹³ Na m'bindo gwa Mlibindilwa noo guno, hamiwilila maya masugu ma ulibagula wage; gwilushiwa u mchango gwa hema lya busambeno; ¹⁴ nage gwishenya lutangi lwage wa Mlume, mwana-mmoo gumwechi gwa mlumegwa mwaa gumwechi guwilile, gwa lutangi lwa uchigya, na mwana-mmoo gumwechi gwa ota gwa mwaa gutangi guwilie, uba lutangi lwa buubi, na mmoo gwa mlue gumwechiguwilile uba lutangi lwa talala. ¹⁵ na ndaha gya mikati gishi gyagibiwe mshimi, mikati gya buusu bwa nekuneku bwabusupaganyiwe na mauta, na mikati gya mahundu-mahudu mnda gishi gya bibahe, gyagibiwe mauta, hamwechi nalutangi lwage lwa buusu, na lutangi lwage lwa byunywa. ¹⁶ Na ibuli yibishenya wa Mlume, nage gwishenya lutngi lwage lwa buubi, na lutangi lwa uchigya. ¹⁷ nage gwishenya gugo mmoo gwa mlume uba nyama gya lutangi lwa talala wa Mlume, hamwechi na ndaha gya mikati gishigya gibiwe mshimi; hanyuma ibuli yishenya lutangi lwa buusu nalo, na lutangi lwage lwa byunywa. ¹⁸ Nage Mlibindilwa gwibega mswe yulu ya ulibagula wage, hamchabgo gwa itulaya busambeno, hanyuma gwiguha chiya njuli cha mswe gwage, na uchichigya m maahya ine ali hasi ha nyama gya lutangi lwa talala. ¹⁹ Hanyuma ibuli yiguha igima ya uboo wa gugo mmoo gwa mlume yaibichiwe, na mkati gumwechi gwa gushi gwa gubiwe mshimi gwiguguha mnda ndaha, na mkati gumwechi gwa mahundu-mahundu mnda, nage gwibibiya mnda maboo ma guya Mlibindilwa, hanyuma ha ubega mswe gwa ulibagula wage; ²⁰ nayo ibuli yibimaa byabe lutangi lwa umaa u mbele wa Mlume; iyo ibya m yihaha wa ibuli, hamwechi na kuu gya umawa, na igima ya uginunywa; hanyuma Mlibindilwa gwina alago a unywa malwa. ²¹ M'bindo gwa Mlibindilwa mine gwibiya ulibindila noo gugo, iyaka noo m'bindo gwa lutangi lwage lwelimtangila Mlume wayulu ya ulibagula wage, hamwechi na bitundu biya byine byelinaosha ubimona abilo; ulamana na ulibindila wage byelinaosha, noo bilingye ugila wa ulamana na m'bindo gwa ulibagula wage. ²² Hanyuma Mlue gudogomine na Musa, na umsambila, ²³ Dogoma na Haluni na baana bage, ubasambile, Bino noo byamwibahalila mihaa baana ba Isilaeli; mwibasambila; ²⁴ Mlume guhalile mihaa, na uusa; ²⁵ Mlume gulamyiile lwenge lwa yenyi yage, na uumonya yano yage; ²⁶ Mlume guginunine yenyi yage, na uuha talala. ²⁷ Bibyo noo byabibiya china lyanyi hegulu ha baana ba Isilaeli; na nene nibahalila mihaa.