¹ Hanyuma Mlume gudogomine na Musa, na umsambila, ² Basambile baana ba Isilaeli ugana bammunye mtu ge gese mine gwina bushondo ha bushamo, na mtu ge gese mine gwina ashakala, na ge gese mine gwina bunyenye yulu ya baabu; ³ mwibatobola hambuga bose, balumyana na baachana, mwibabiya hambuga ha bushamo, bwine bwandi nene hawingi hobe. ⁴ Baana ba Isilaeli bagilile bibyo, babahuminye na ubabiya hembuga ha bushamo; nahi Mlume byeliganine na Musa, noo byabagilile baana ba Isilaeli. ⁵ hanyuma Mlume gudogomine na Musa, na umsambila, ⁶ Ubasambile baana ba Isilaeli, Mlumyana ao mmachana mine gwigila buubi bo bose, busugilwa na mtu, um'benga Mlume, na gugo mtu nuuba na abachi; ⁷ haho habilibecha buubu bwabo bwine bwabagila; nage gwigiwicha yulu ya aya abachi age, wa uwilila wage, iyaka gwilibiya wigulu wage ibaa ya butano, na umma guya mine gwelilubile. ⁸ Alakini nambo gugo mtu gushi na ilongo ya hoka mine gulingye ugiwidichiwa wa yulu ya ao abachi, iya yine yigiwichiwa wa Mlume yulu ya ao abachi ibi ya ibuli, hamwechi na mmoo gwa mlume gwa usambya, wa gugo mmoo gwiita usambya wa yulu yage. ⁹ Iyaka lutangi lo lose lwa uginunywa, lwa bitundu bihaha bya baana ba Isilaeli, byabishenya wa ibuli, bibi byage. ¹⁰ Iyaka bitundu byine bibagulwe yulu ya Mlume na mtu ge gese, bibi bya ibuli; mtu gabemma ibuli bya yo yose ibi yage. ¹¹ Hanyuma Mlume gudogomine na Musa, na umsambila, ¹² Gana na baana ba Isilaeli, ubasambile, nambo mmachi gwa mtu ge gese gabelilubaganya, na umlubila mlumyage, ¹³ na mlumyana gabelele nage wa masei, naiyo ikoko yahubisama u meeso ma mlumyage, yahuba ikoko ishiimanyiye, na gugo mmachana nuuba na bunyenye, na hashi mangisiyo gubangisiye yulu yage, na gusawatililwa; hanyuma mlumyage nuuwaswa na mtima gwa buwa, gwahummonene mmachage buwa, na gugo mmachana nuuba na bunyenye; ¹⁵ haho gugo mlume gwimguha mmachage, na ugya nage wa ibuli, nage gwilusha lutangi lwage wa yulu yage, noo, iba ya umi ya itanga ya buusu gwa mtama; gashibiya mauta hegulu habo; bululi, m lutangi lwa buusu bwa buwa, m lutangi lwa buusu bwa kengelecho gya uengelecha usona. ¹⁶ Haho ibuli gwimlusha mmachana gashene, na um'biya u mbele wa Mlume; ¹⁷ hanyuma ibuli gwiguha maadi ma mahaha mmibiilo ya bitete; hanyuma ibuli gwiguha imwe ihwili yine ili haya hasi ha bushamo, na wiibiya m mamo maadi; ¹⁸ hanyuma ibuli yim'biya mmachana u mbele wa Mlume, nage gwisula njuli cha mswegwa guya mmachana, hanyuma gwimma luya lutangi lwa buusu bwa kengelecho m maboo mage, noo lutangi lwa buusu bwa buwa, nayo ibuliibi na maya maadi ma bululu masulusa buloga m muboo wage. ¹⁹ iyaka ibuli yimlahya gugo mmachana, nage gwimsambila mmachana, Ugana hashi mlumyana mine gwalala hamwechi nage, iyaka ugana gusalilubaganya uita masei, uli na buhulu wa mlumyobe, mano maadi ma bululu mene masulusha buloga mashiugugiche; ²⁰ alakini nambo walibulaganya nagogwe uli na buhulu wa mlumyobe, na nambo uli na mshaminyi gwa bunyenye, na gunge mlumyana gulalile nobe, gushi mlumyobe; ²¹ haho ibuli yimlahya paa gugo mmachana wa ulaha wa ulahiwa paa, hanyuma ibuli yimsambilagugo mmachana bino binywa, Mlume na guite gogwe ube buloga na ulahya wahingi ha batu bobe, haya hene hiuita Mlume ilimbago yobe uba ilebe, nagumo lyobe uhila. ²² na maadi mene masulisha buloga miugingila mnda miila gyobe, na uuhicha gumo, na ulusha ilimbago yobe ilebe; na mmachana gwigitabuwa, Bibe bibyo, Bibe bibyo. ²³ Hanyuma ibuli yigola bubo buloga mnda itabo, na uchima giya migolo na maya maadi ma bululu; ²⁴ hanyuma gwimnywisha guya mmachana maya maadi ma bululu mene masulusha buloga; namo maadi mulusha buloga migingila mnda mwage, namo migaluwa uba bululu. ²⁵ Hanyuma ibuli yiguha luya lutangi lwa buusu bwa buwa, na ubuguha huma mnda maboo ma gugo mmachana, nage gwidigicha lutangi lwa buusu u mbele wa Mlume, na uluchigya u butambikilo; ²⁶ Hanyuma ibuli yiguha ganda limwechi lya buusu, naubuchigya hegulu ha butambikilo, hanyuma gwimnywisha mmachana maya maadi. ²⁷ Haho helihwa umnywisha maya maadi, noo bibi, nambo gubele na bunyenye na umlubila mlumyage, haho maya maadi mene masulusha buloga mimgingila mnda mwage, namo mabi bululu, na gumo lyage lyibimba, na ilimbago yage ibi na ilebe; na gugo mmachana gubi na buloga hawingi ha batu bage. ²⁸ Na nambo guya mmachana gushibele na bunyenye nage guli mmaha; bibyo gwilechiwa, na ubuta baana. ²⁹ Guno noo m'bindo gwa buwa, mmachana, mine guli na buhulu hasi ha mlumyage, gabelilubaganya, na uba na bunyenye; ³⁰ ao, mtima gwa buwa gubemgingila mlumyana, nage gabemmonena buwa mmachage; haho gwim'biya u mbele wa Mlume, na ibuli yigila yulu yage guno m'bindo gose. ³¹ Na mlumyana gushibi na usona o ose, na mmachana gwiguha usona wage.