¹ Hanyuma Mlume godogomine na Musa na Haluni, na ubasambila, ² U baana ba Lawi ubagule lubalo lwa baana ba Kohathi, wa ilongo yabo, na madu m bamasabo, ³ utula nebe bali na myaa maumi matatu na uhima ata myaa maumi matano, bose bene basugingila mn bubo bugichi, yulu ya ugila mnda itula ya busambeno. ⁴ Bubo noo bugichi bwa baana ba Kohathi mnda itula ya busambeno, asa u biya bitundu bya bihaha abisa; ⁵ haho habitula lwendo, Haluni gwigingila mnda itula, na baana bage, nabo bisacha pashiya lya lagala, na uliunina lindo lya mangisiyo na lilyo pashiya; ⁶ hanyuma gwibiya hegulu halyo bibambi bya konda bya uliunina, na uganda hegulu halyo ichwalaganywa ya langi lya ibule ka, hanyuma bibiya na giya miti byage gya uswalila. ⁷ Iyaka hegulu ya mesa ma mikati gya umonya biganda bichalanywa bya langi lya ibule, na ubiya hegulu hamo bilego, na mibali, naxxxxxxxna bisengo bya uhongolwela; na giya mikati gya masugu mose gibi hegulu hamo. ⁸ nabo biganda hegulu hamo bichwalaganywa bya langi lya ligachichu, nauwila na bibambi bya konda bya luhupo, na ubiya giya miti gyamo byuswalila. ⁹ Hanyuma gwiguha ichwalaganywa ya langi lya ibule, na uwila mti gwa tala lya lwenge, na matala mage, na mano chage, na bilego byage byubiila maala na bitundo byage byose bya mauta, mabasulamya yulu ya mgilo gwage; ¹⁰ nabo biibiya, na bitundu byage byose, mnda bibambi bya komba, na uibiya hegulu ha miti gya uiswalila. ¹¹ Iyaka biwila hegulu ha butambikilo bwa nolo ichalaganywa ya langi lya ibule, na uwila na bibambi bya konda hegulu habo, na ubiya giya miti gyage; ¹² hanyuma bibiguha biya bitundu bya bugichi byabasugila nabyo wihana ya ihaha, na ubihamba mnda bichwalaganywa bya langi lya ibule, na ubiwila na bibambi bya konda, na ubibiya hegulu ha miti byubiswalila. ¹³ Nabo bihunya mto mnda butambikilo; na uganda hegulu habo ichalaganywa ya langi lya maadi ma mtati; ¹⁴ nabo bibiya hegulu habo bitundu byabo byose byine byabasugilila nabyo u butambikilo, na byuhulila mii, na nyama, na mibali, na xxxxxxxx, na bitundu byose bya bubo butambikilo; nabo biwila hegulu habo bibambi bya konda, na ugingicha miti na bihana byagyo. ¹⁵ Haho Haluni na baana bage habibhwa uhawilaha ihana ya ihaha, na bitundu byaho bya ihana ihaha, haho habichula bitula; hanyuma; baana ba Kohathi bichwa uguha; alakini bashibiude biya bitundu bya bihaha, bashichwe uuwa. Biya bitundu m mchigo gwa baana ba Kohathi wiitula ya busambeno. ¹⁶ Na uwatilicha wage Eleazali mwana gwa ibuli Haluni ubi wa uloola mauta ma lwenge, na buswenge bwa busoga, na lutangi lwa buusu bwa masugu mose, na mauta ma ushinya, iyaka uwatilicha wa bubo bushamo bose, na wa bitundu byose byine bili mnda mwayo, ihana ya ihaha, na bitundu byayo. ¹⁷ Iyaka Mlume gudogomine na Musana Haluni, na ubasambila, ¹⁸ Mushibagule abisa ibushi ya ilongo ya Bakohathi hawingi ha babo Balawi; ¹⁹ alakini mubagilile ino inywa, yulu yugana baabe na mwego, bashiwe, hene habibishenena biya bitundu byine bili bihaha abisa; Haluni na baana bage bigingila mnda, na ubabiila mtu ge gese na bugichi bwage, na mtu ge gese na mchigo gwage; ²⁰ alakini bashihagingile boo uhamona haya ha ihana ihaha, ata wa mengo mamwechi, yulu bashiwe. ²¹ Hanyuma Mlume gudogomone na Musa, na umsambila, ²² Ita lubalo lwa baana ba Gelshoni nabo, ulamana na madu ma bamasabo, nabilongo byabo; ²³ utula bene bali na myaa maumi matatu na uhima, ndaa na myaa maumi matano wibabala; bose bene bigingila ugila, yulu ya ugila mgilo mnda itula ya busambeno. ²⁴ Buno noo bugichi bwa ilongo ya Bagelshoni, wa ugila na wa uswala michigo; ²⁵ Boo biswala mapashiya ma bushamo, nahema lya busambeno, na biya bichalaganywa bya uwilila, na biya bibambi bya konda bya uwilila byine bilihegulu habyo, na pashiya lya mchango gwa hemalya busambeno; ²⁶ na bibambacha bya bichwalaganywa bya lagala, na uya ubisa iya ihana ya ugingilila u mchango gwa lagala, gwineguli hoka na bushamo na hoka na butambikilo, uchunguluwa ngubi chose, na migochi gyage, na bitundu byose bya bugichi bwabo, na byose byine byigiliya wabyo, bigila na bibyo. ²⁷ Bugichi bose bwa baana ba Bagelshoni, u mchigo bwago gose, na bugichi byabo bose, bubi wa alago a Haluni na baana bage; benywe mwibasambila michigo gyabo gyose ugiusa. ²⁸ Buno noo bugichi bwa baana ba Bagilshoni u liya hema lya busambeno; naubo uusa ubi hasi ha uboo wa Ithamali mwana gwa ibuli Haluni. ²⁹ Yulu ya mwano gw baana ba Melali, wibabala wa ilongo yabo, na madu mabamasabo; ³⁰ utula mine gwahuhiya myaa maumi matatu na uhima, ndaa na myaa maumi matano, wibabala, ge gese mine gwigingila mnda bubo bugichi, yulu ya ugila mgilo gwa itula ya busambeno. ³¹ Na mmano ga mchigo gwabo noo guno, wa bugichi bwabo bose mnda hemelya busambeno; mbao cha bushamo, na bihoho byage, na bihanda byage, na matao mage. ³² Na bihanda bya lagala bya uchugnuluwa ngubi chose, na matao mage, na pande chage, namigochi gyage, na bitundu byage byose, hamwechi na bugichi bwage bose; benywe mwibasambila mtu ge gese na china lyage biya bitundu bya mchigo gwage gwine gweliswala. ³³ Buno noo bugichi bwa baana ba Melali, u bugichi bwabo bose, wiyula ya busambeno, hasi ha uboo wa Ithamali mwaana gwa ibuli Haluni. ³⁴ Haho Musa na Haluni na Bahela ba sumbilo babalile baana ba Kohathi wa bilongo byabo, na madu ma bamasabo, ³⁵ Utula ba myaa maumi matatu na uhima, ndaa na myaa maumi matano, mtu ge gese mine gugigngile m bugichi bwa mgilo gwa hema lya busambeno, ³⁶ na bene babalilwe wabo wa ulamana na bilongo byabo, babele uki chibili na sambi njwii na maumi matano. ³⁷ Babo noo babalilwe u bilongo bya Bakohathi, bose bene bagilile witula ya busambeno, bene babalilwe na Musa na Haluni wa alago a Mlume wa uboo wa Musa. ³⁸ Na baya bene babalilwe u baana ba Gelshoni, wa bilongo byabo na madu ma bamasabo, ³⁹ utula bene bina myaa maumi matatu na uhima, ndaa na myaa maumi matano, u mgilo gwa itula ya busambeno, ⁴⁰ ata baya bene babalilwe wabo, u bilongo byabo na madu ma bamasabo, babele uki chibili na sambi mtuba na maumi matatu. ⁴¹ Babo noo bene babalilwe u bilongo bya Gelshoni, bose bene bagilile witula ya busambeno, bene babalilwe na Musa na Haluni wa alago a Mlume. ⁴² Na baya bene babalilwe wilongo ya baana ba Melali, wa bilongo byabo, na madu mabamasabo, ⁴³ utula gwa myaa maumi matatu na uhima, ndaa na myaa maumi matano, mtu ge gese mine gugingile u bugichi bwa mgilo gwa hema lya busambeno, ⁴⁴ baya babalilwe wabo, wa bilongo byabo, babele uki chitatu na sambi chibili. ⁴⁵ Babo noo babalilwe u bilongo bya baana ba Melali, bene babalilwe na Musa na Haluni wa alago a Mlume, wa uboo wa Musa. ⁴⁶ Bose bene babalilwe u Balawi, bene Musa na Haluni na baata ba Isilaeli bababalile, wa bilongo babyo, na madu ma bamasabo, ⁴⁷ utula myaa maumi matatu nauhima, ndaa na myaa maumi matano, ge gese mine gugingile ugila mgilo gwa bugichi, na mgilo gwa uswala michigo gya mnda hema lya busambeno, ⁴⁸ baya bene babalilwe wabo, babele uki inana na sambi chitano na maumi inana. ⁴⁹ Wa alago a Mlume, babalilwe wa uboo wa Musa, mtu ge gese wa bugichi bwage, na nahi mchigo gwage byagubele; noo byababalilwe nage, nahi Mlume byelimlagila Musa.