¹ Bino noo bibushi bya Haluni na Misa luya lusugu lwine ludogomine Mlume na Musa u loono la Sinai, noo bino. ² Iyaka machinama baana ba Haluni noo mano; Nadabu bubele bwage, na Abihu, na Eleazeli, na Ithamani. ³ Mamo noo machina ma baana ba Haluni, babo ba bibuli bene bashinyiwe mauta, benebabiilwe hibambayulu ya mgilo gwa bwibuli. ⁴ Hanyuma Nadabu na Abihu bawile u mbele wa Mlume, habasambiche aahya a igenyi u mbele wa Mlume, mnda mgalagwa Sinai, nabo bashibele na baana; na Eleazeli na Ithamali bagilile mgilo gwa bwibuli u mbele wa Haluni sabo. ⁵ Hanyuma Mlume gudogomine na Musa, umsambila, ⁶ Ihyiche hoka ilongo ya Lawi, wababiye u mbele wa Haluni ibuli, yulu bam'bwatiliche. ⁷ Nabo biusa ugila wage, na uusa sumbilo lyose u ele wa itula ya busambeno, yulu bagile bugichi bwa bushamo. ⁸ Nabo biusa bitundu byose bya hema lya busambeno, na uwatilicha baana ba Isilaeli, yulu baagile mgilo gwa bushamo. ⁹ Gogwe wibaha Haluni na baana bage babo Balawi baabe nabo; gwahewa babo batu abisa wa yulu ya baanaba Isilaeli. ¹⁰ Gogwe wibabiya Haluni na baana bage, nabo bigilila bubuwa bwabo, na mgenyi mine gwishena hoka gwihagwa. ¹¹ Hanyuma Mlume guganine na Musa, na umsambila, ¹² Nene, loola, nibaguhile Balawi hawingi ha baana ba Isilaeli hanyuma ha babuswa babatangi bose bene basulile magumo u baanaba Isilaeli; na babo Balawi babi banyi. ¹³ bululi babo babuswa ba batangi bose m banyi; nahi luya lusugu lwandibahulile babuswa batangi bose mnda sii gya Misili nilibiile mibamba bubele bose bwa Isilaeli, bwa batu nabwa nyama; babi banyi; nene noo Mlume. ¹⁴ Hanyuma Mlume guganine na Musa uya mnda mgala gwa Sinai, naumsambila, ¹⁵ Ubabale baana ba Lawi wa ulamana na madu ma bamasabo na ilongo yabo; mlumyana ge gese utula mwechi gumwechi na uhima, wibabala. ¹⁶ Haho Musa gubabalile nahi inywa ya Mlume nahi byelilagilwe. ¹⁷ Na baana ba Lawi babele noo bano wa machina mabo; Gelshoni, na Kohathi, na Melali. ¹⁸ Na machina ma baana ba Gelshoni wa ilongo yabonoo Libni na Shimei. ¹⁹ Na baanaba Kohathi wailongo yabo noo Amlamu, na Ishali, na Heblni, na Uzieli. ²⁰ Na baana ba Melali wailongo yabo noo Mahli, na Mushi, Bino noo bilongo bya Balawi ulamana na madu ma bamasabo. ²¹ Ba Gelshoni babele ilongo ya Balibni, na ilongo ya Bashimei, bano noo ilongo ya Bagelshoni, ²² Babo noo babalilwe wabo, nahi lubalo lwa balumyana bose, utula mwechi gumwechi na uhima, babo bene babalilwe wabo babele uki njwii na sambi chitano. ²³ Bilongo bya Bagelshoni bishama aata u nyuma wa bushamo, luubi lwa igolo. ²⁴ Na mmata gwa ndu gya bamasabo Bagelshoni gubi Eliasafu mwaana gwa Laeli. ²⁵ Na uusa wa Bagelshoni u liya hema lya busambeno m buya bushamo, na Hema, na luhupo lwage, na pashiya lya mchango gwa hema lya busambeno, ²⁶ na bibambacha bya bisanjwa bya lagala, na ubisa mchango gwa lagala, gwine guli hoka na bushamo, na hoka na butambikilo ngubi chose, namigichi gyage gyine gisugililwa nagyo ugililwa wagyo ose. ²⁷ Na wa Kohathi m yilongo ya Baamlami, na ilongo ya Baishali, na ilongo ya Behebloni, na ilongo ya Bauzieli; bibyo noo bilingo bya Bakohathi. ²⁸ Nahi lubalo lwa balumyana bose, utula mwechi gumwechi na uhima, babele uki china na sambi mtuba, benebabelehuusa ihana ya ihaha. ²⁹ Bilongo bya Bakohathi biganda byaata luubi lwa uboo wa ulume lwa bushamo. ³⁰ Na mmata gwa ndu gya bamasabo gya bilongo bya Bakohathi gubi Elisafani mwaana gwa Uzieli. ³¹ Na bibya byine byabiusa m lilyo lindo, na mesa, na mti gwa tala, na butambikilo, na bitundu bya ihana ya ihaha byabasugila nabyo mengo mabasugila, na pashiya, na bugichi bwabo bose. ³² Na Eleazali mwaana gwa Haluni ibuli gubi mmata gwa babo baata ba Balawi, nage gwibagimena babo bene baluhutilicha bugichi bwa ihana ya ihaha. ³³ Wa Melali m bilongo bya babo Bamahli nailongo ya Bamushi; bibyo noo bilongo bya Bamelali. ³⁴ Na baya bene babalilwe wabo, nahi lubalo lwa balumyana bose, utula mwechi gumwechi na uhima, babele uki mtuba na sambi chibili. ³⁵ Na mmata gwa ndu gya bamasabo gwa ilongo ya Melali gubele Sulieli, mwana gwa Abihaili; babo bagandile byaata luubi lwa uboo uachi lwa bushamo. ³⁶ Na uwatilicha wine wabahelwa baana ba Melali ubele uusa mbao cha matao, na bihoho byage, na bihanda byage, na bushamo bwage, nabitundu byage byose, na bugichi bwage bose. ³⁷ na bihanda bya lagala byine bibele bigichunguluwe, na matao mabo, na pande chage, na migochi gyage. ³⁸ Na babo bene bishama u mbele wa bishamo luubi lwa mlugulu, u mbelewa hema lya busambeno uhugulwila luubi lusuhuma chuba, babi bano, Musa na Haluni na baana bage, bene bali huwatilicha bugichi bwa ihana ya ihaha, noo, ubo uwatilicha baana ba Isilaeli; na mgenyi mine gwishena gwihagwa. ³⁹ Baya bose bene babalilwe u Balawi, bene babalilwe na Musa na Haluni wa alago a Mlume, utula mwechi gumwechi na uhima, babele maumi mopi na bopi uki. ⁴⁰ Hanyuma Mlume godogomine na Musa, ubabale balumyana bose bubele bose ba baana ba Isilaeli utulu mwechi gumwechi na uhima, umabale machina mabo. ⁴¹ Na gowe wibaguha Balawi wa yulu yanyi nene (Nene noo Mlume) hanyuma ha bubo bubele bose bwa baana ba Isilaeli; na ba nyama cha baana ba Isilaeli. ⁴² Musa gubalile, nahi bimlagile Mlume, bubele bwa bose ba baana ba Isilaeli. ⁴³ Bubele bwa balumyana bose wa lubalo lwa machina mabo, utula mwechi gumwechi na uhima, u baya bene babalilwe wabo, babele maumi mabili na babili ukina sambi chibili na maumi njwii na batatu, ⁴⁴ Hanyuma Mlume gudogomine na Musa, na umsambila, ⁴⁵ Ubuguhe Balawi hanyuma ha bubele ba baana ba Isilaeli, na nyama cha Balawi hanyumaha nyama chabo; na babo Balawi babi banyi nene; nene noo Mlume. ⁴⁶ Iyaka wa ubahogonona babo batu sambi chibili na maumi njwii na batatu, ba bubo bubele bwa ba Isilaeli, benebali bahime lubalo lwa Balawi, ⁴⁷ wiguha shekeli chitano wa tu ge gese wa chicho shekeli cha ihana ya ihaha (shekeli m gela maumi mopi); ⁴⁸ na lulo lusuu lwine lushigele hene habahogononywe nalo wiluha Haluni na baana bage. ⁴⁹ Haho Musa gubasabile wa uoma lusuu lwa uhugonona, baya bene bahimine lubalo lwa baya bene bahogononywe na Balawi; ⁵⁰ gughile lu lusuu lwa uli buta bubelebwa baana ba Isilaeli; shekeli uki na sambi chitatu na maumi mtuba na chitano cha shekeli cha ihana ya ihaha; ⁵¹ hanyuma lulo lusuu lwa uhogonona Musa guluhele Haluni na baana bage, ulamana na inywa ya Mlume, nahi Musa byelilagilwe na Mlume.