¹ Mlume godogomine na Musa na Haluni, na ubasambila, ² Baana ba Isilaeli bigimiya mtu ge gese bendela lyage, na ibala ya madu ma bamasabo; ulocha luubi lwa itula ya busambeno noo byabigimiya waucunguluwa ngubi chose. ³ Na baya bene bigimiya luubi lwa mlugulu, wa uhugulwila luubi lusuchinda chuba, noo baya ba bendela lya Yuda, nahi basolokoto babo; na mmata gwa baanaba Yuda gubi Nashoni mwaana gwa Aminadabu. ⁴ Na basolokoto bage, na baya bene babalilwe wabo, babele maumi njwii na bana uki na sambi mtuba. ⁵ Na baya bene bishama hoka nage m yilongo ya Isakali; na mmata gwa baana ba Isakali gubi Nethaneli mwaana gwa Sauli; ⁶ na basolokoto bage, na baya bene babalilwe wabo, babele maumi matano na bana uki na sambi china. ⁷ na ilongo ya Zabuloni; na mmata gwa baana ba Zabuloni gubi Eliabu mwaana gwa Heloni; ⁸ na basolokoto bage, na baya bene babalilwe wabo, babele maumi matano na njwii uki na sambi china. ⁹ Babo bose babalilwe wihana ya Yuda babele sambi na maumi inana na mtuba uki na sambi china, wa basolokoto babo. Bobo noo babi hulombola hambele. ¹⁰ Luubi lwa uboo wa ulume ubi na bendela lya ihana ya Leubeni wa basolokoto babo; na mmata gwa baana ba Leubeni gubi Elisuli mwaana gwa Shedeuli. ¹¹ Na basolokoto bage, na baya bene babalilwe wabo babele maumi mana na mtuba uki na sambi chitano. ¹² Na baya bene bishama hoka nage m yilongo ya Simeoni; na mmata gwa ilongo ya Simeoni gubi Shelumieli mwaana gwa Suli-shadai; ¹³ na basolokoto bage, na baya bene babalilwe wabo, babele maumi matano na yahabula uki na sambi chitatu. ¹⁴ na ilongo ya Gadi; na mmata gwa ilongo ya Gadi gubi Eliasafu mwaana gwa Deueli; ¹⁵ na basolokoto bage, na baya bene babalilwe wabo babele maumi mana na batano uki na sambi mtuba na maumi matano. ¹⁶ Bose bene babalilwe wihana ya Leubeni babele sambi namaumi matano na gumwechi uki na sambi china namaumi matano, noo basolokoto babo. Nabo noo bilama ba bubili. ¹⁷ Lyilama noo hema lya busambeno wa uligyasha, hamwechi na ihana ya Balawi hawingi ha bihana byose; nahi byabasushama u bihana, bigyata bibyo, mtu ge gese ha ihana yage, henehali bendela lwabo. ¹⁸ Luubi lwa igolo ubi bendela lya ihana ya Eflaimu na basolokoto babo; na mmata gwa baana ba Eflaimu gubi Elishama mwaana gwa Amihudi. ¹⁹ Na basolokoto bage, na baya bene babalilwe wabo babele maumi mana uki na sambi chitano. ²⁰ Na hoka nage ibi ilongo ya Manase; na mmata gwa ilongo ya Manase gubi Gamalieli mwaana gwa Pedasuli; ²¹ na basolokoto bage, na baya bene babalilwe wabo, babele maumi matatu na bopi uki na sambi chibili; ²² iyaka ilongo ya Benyamini; na mmata gwa ilongo ya Benyamini gubi Abidani mwaana gwa Gideoni; ²³ na basolokoto bage, na baya bene babalilwe wabo babele maumi matatu na batano uki na sambi china. ²⁴ Bose bene babalilwe wihana ya Eflaimubabele sambi china uki na sambi gimwechi, noo basolokoto babo. Nabo noo bigya nalama mmanga gwa butatu. ²⁵ Luubi lwa uboo wa uachi ubi na benela ha ihana ya Dani na basolokoto babo; na mmata gwa ilongo ya Dani gubi Ahiezeli mwaana gwa Amishadai. ²⁶ Na basolokoto bage, na baya bene babalilwe wabo, babele maumi mtuba nabopi uki na sambi njwii. ²⁷ Na baya bene bishama hoka nage m yilongo ya Asheli; na mmata gwa ilongo ya Asheli gubi Pagieli mwaana gwa Oklani; ²⁸ na basolokoto bage, na baya bene babaliwe wabo, babele maumi mana na gumwechi uki na sambi chitano. ²⁹ hanyuma noo ilongo ya Naftali; na mmta gwa ilongo ya Naftali gubi Ahita mwaana gwa Enani; ³⁰ na basolokoto bage, na baya bene babalilwe wabo, babele maumi matano na batatu uki na sambi china. ³¹ Bose bene babalilwe wihana ya Dani babele sambi namaumi matano na njwii uki na sambi mtuba. Babo noo bilama bisula wa ulama bendela lyabo. ³² Babo noo bene babalilwe u baana ba Isilaeli u madu ma bamasabo; bose bene babalilwe u bihana na basolokoto babo, babele sambi mtuba na batatu uki na sambi chitano na maumi matano. ³³ Alakini Balawi bashibalilwe hamwechi na baana ba Isilaeli; nahi Mlume byalimlagila Musa. ³⁴ Bibyo noo bigilile baanaba Isilaeli; nahi byose byine bilagilwe Musa na Mlume, noo byabashamine u mabendela mabo, na noo byabagyatile, mtu ge gese na ilongo yabo, nahi madu ma bamasabo.