¹ Hanyuma Mlume guganine na Musa mnda sii gya ibandabanda ya Moabu, hoka na luudi Yolodani, gumsambile, ² Ubalage baana ba Isilaeli baabahe Balawi mabuga baabe na ihana ya ushama, uba buhyana bwabo; hamwechi na bulishicho bwa bushungulubu mamo mabuga mwibaha Balawi . ³ Mamo mabuga babi namo yulu bashame mo, na bulishicho babi nabo bwalusha nyama chabo cha usugwa, wa yulu ya bitundu byabo, na yulu ya nyama chabo chose. ⁴ Na buya bulishicho bwa mabuga mene mamwibaha Balawi, bwata bwamo bubi utula u lukuta lwa mbuga mwilingilila nahi magulu maumi mabili uchugnuluwa ngubi chose. ⁵ benywe mwilingilia haya hambuga ha mbuga magulu maumi mana luubi lwa mlugulu, na luubi lwa uboo wa uachi magulu maumi mana, na luubi lwa igolo magulu maumi mana, na luubi lwa uboo wa ulume magulu maumi mana, u gigyo mguba gya hamwingi. Bubo noo bubi bilishicho mabuga mabo. ⁶ Na mamo mabuga mene mamwibaha Balawi, mabi baguba mtuba ma businiino, mamwibiya yulu ya guhaga mtu, yulu gasinine uya; hamwechi na bibyo mwibaha mabuga maumi mana na mabili uhima. ⁷ Mabuga mose mene mamwibaha babo Balawi mabi maumi mana na inana; mwibaha mamo mabuga hamwechi na bulishicho bwamo. ⁸ Iyaka mabuga mene mamwibaha u bibyo buhana bya baana ba Isilaeli, u baya bene bali beengi mwiguha mabuga meengi; na u baya bene bali bacho mwiguha mabuga macho; mtu ge gese nahi buhyana bwage bwelihyana, gwibaha Balawi u mabuga mage. ⁹ Hanyuma Mlume guganine na Musa. na umsambila, ¹⁰ Dogoma na baana ba Isilaeli, Hamwidabuwa Yolodani nanugingila mnda sii gya Kanaani, ¹¹ Haho noo hamwilibiila mabuga ma businino yulu yenyu; bululi guya mine gwihaga mtu, gabehagana wa nduba, gaoshe usinina ubo. ¹² Na mamo mabuga mabi wenyu mabuga ma businino, yulu ya umsina guya gwa ugiwidicha buubi wa buubi, yulu gashihagwe guya mine guhagile mtu, ndaa na byeligimana u mbele wa sumbilo yulu gaononywe. ¹³ Na mamo mabuga mene mamwuibaha mabi mtuba ma businino. ¹⁴ Mwibaha mabuga matatu m'bwala bwa bubili bwa Yolodani, na mabuga matatu mnda sii gya Kanaani; mamo mabuga mabi m mabuga ma businino. ¹⁵ Mamo mabuga mtuba mabi mabuga ma businino wa yulu ya baana ba Isilaeli, na wa yulu ya mginyi, na wa yulu ya mine gulu mshame hawingi habo nahi mginyi; yulu ge gese mine gwihaga mtu, wa nduba, gaoshe usinina ubo. ¹⁷ Na nambo gwamta liwe lyine libele m muboo wage, ugana wa lilyo linaosha uhaga mtu, nage nuuwa, gugo mmaganyi; na gugo mmaganyi godogodo gwihagwa. ¹⁸ Au nambo gwachuda na songo gya mti gwine gubele mmuboo wage ugana wa gugo gunaosha uhaga mtu, nage nuuwa, gugo mmaganyi, mmaganyi godogodo gwihagwa. ¹⁹ Guya gugiwidicha buubu wa buubi bwa maashi noo gwimmaga guya mmaganyi; haya hene helisambana nage, noo heli mmaga. ²⁰ Iyaka nambo gwamlunga wa ummonywa, au nambo ugana gwamtelela itu wa umgongela, gee nuuwa; ²¹ au nambo gwammula na uboo wage yulu myaamangu, nage nuuwa; guya gwammula godogodo gwihagwa; gee m mmaganyi; guya gugiwidicha buubi wa buubi bwa maashi gwimmaga guya mmaganuyi, haya hene halisambana nage. ²² Alakini nambo gwamlunga wa subisubi wa usabutuwa ushi wa ummonywa; ao ummtelela wa nduba itu yo yose ushi wa umgongela, ²³ au wa liwe lyo lyose, lyine lyatelwa u mtu, nage gusaba hummona, gabemtelela nage nuuwa, nage gushibele amangu age, na gusamsimbila ahunago; ²⁴ haho sumbilo lyibaluliya hawingi ha guya gummulile mtu na guya gwugiwidicha buubi wa buubi bwa maashi, nahi bili ubo uonona byauli; ²⁵ nalyo sumbilo lyimmogonona guya mine guhagila mtu mnda uboo wa guya gugiwidicha buubi wa buubi bwa maashi; iyaka sumbilo lyimgiwicha mnda mbuga gyage gya businino, gyine gyelisinine; nage gwishama mmo ndaa na lubu lwage ibuli ya yata, mine gushinyiwe mauta wa mauta ma mahaha. ²⁶ Alakini nambo guya gwummaga mtu gabegya mengo mo mose uitowa mgumbo gwa giya mbuga gya businino, gyelisinine; ²⁷ na guya gwa ugiwidicha buubi wa buubi bwa maashi gabemmona, nage guli hambuga ha lugumba lwa mbuga gyage gya businino, na guya gugiwidicha buubi wa buubi bwa maashi gabemmaga guya mmaganyi, gushibi na abachi a maashi; ²⁸ wa ibalo bele mlingye gashame mnda mbuga gya businino ndaa na lubu lwa lwage ibuli ya yata alakini ibuli ya yata halihwa uuwa guya mmaganyi gwigiwila ugya ushama mnda sii gyage gya buhyana bwage. ²⁹ Bibyo bikoko bibi alago a uonona wenyu, u bibushi byenyu byose, mnda bushami bwenyu bose. ³⁰ Mtu ge gese mine gwihaga mtu, gugo mmaganyi gwihagwa wa tunywa twa babangisiyi; alakini m'bangisiyi gumwechi gushibangisiya yulu ya mtu nage nuhagwa. ³¹ Iyaka, mushiguhe alambwe wa yulu ya mwego gwa mmaganyi, mine gwina abachi a uhagwa; Alakini godogodo gwihagwa. ³² Iyaka mushiguha alambwe age guya mine gwasinina mbuga gyage gya businino, yulu gagye ushama iyaka mnda sii, ndaa na lubu lwa ibuli ya yata. ³³ Wa bibyo mishigibiya bunyenye sii gyamulibashame mo; bululi maashi basubiya sii bunyenye; na hashi lutangi lwine lusugeseya yulu ya sii, yulu ya maashi mene mageseya hegulu hanyo, nambo m maashi ma guya mine gugesile. ³⁴ Wa bibyo mushigibiya bunyenye sii gyine gyamli bagishamine, gyine gyandi mshamine na nene; bululu nene noo Mlume nashama hawingi ha baana ba Isilaeli.