¹ Hanyuma Mlume gudogomine na Musa, na umsambile, ² Ubalage baana ba Isileli, ubasambikle, Hamwugungila m sii g6a Kanaani, (gino noo sii gyimgwila uba buhyana bwenyu, noo, gigyo sii gya Kanaani nahi bili ng'umba chage byachili,) ³ noo luubi lwenyu lwa uboo wa ulume lubi utula mgala gwa Sini ndaa na mibamba ma Edomu, na lugumba lwenyu lwa uboo wa ulume lubi utula isula ya Bahali lya Miinyu uhugulwila lubu lwa uboo wa uachi; ⁴ hanyuma lubumba lwenyu lwigaluwa ugya luubi lwa uboo wa ulume wa umgila ge Aklabimu, hanyuma uhita ugililila Sini; nabhuma wage ubi uhuggwila luubi lwa uboo wa ulumewa Kadesh-balnea; hanyuma lwigililila ndaa na Hasal-adali, na uhyila Azmoni; ⁵ hanyuma lugumba lwigaluwa uhuma Azmoni ugililila ndaa na u luudi lwa Misili, na lwihumina uya u bahali. ⁶ na lugumba lwage luubi lwa igolo lubi u bahali lya lyata noo lubi lugumba lwage; lulo noo lubi lugumba lwenyu luubi lwa igolo. ⁷ Iyaka lugumbab lwenyu luubi lwa uboo wa uachi lubi luno; uhuma u bahali lya lyata mwalibiila iisha u loono lwa Holi; ⁸ na uhuma u loono lwa Holi mwibiya iisha ndaa na ugingila Hamathi; na uhuma uya lugumba lwage lubi Sedada; ⁹ iyaka lugumba lwihyila ndaa na Zfloni, na uhyila ndaa na Hasalenani; lulo noo lugumba lwenyu lwa luubi lwa uboo wa uachi. ¹⁰ Iyaka mwibiya iisha ya lugumba lwenyu lwa luubi lwa mlugulu uhuma Hasalenani ndaa na Shefamu; ¹¹ hanyuma lugumba lwiundumwina uhuma Shefamu ndaa na Libla, luubi lwa mlugulu lwa Aini; hanyuma lugumba lwiundumuwa na uhiya luubi lwa bahali lya Kinelethi luubi lwa mlugulu; ¹² hanyuma lugumba lwiundumwina Yolodani, na lwuhumina haya ha Bahali lya Miinyu; gino noo sii gyenyu nahi bili ng'umba chage byachili ugichunguluwa ngubi chage chose. ¹³ Hanyuma Musa gubalagile baana ba Isilaeli, guganine, Gino noo sii gyamwihyana wa uta luti, gyine gilagile Mlume byahewe biya bilongo yahabula, na ibaa ya ilongo; ¹⁴ bululi ilongo ya baana ba Leubeni ulamana na madu ma bamasabo, na ilongo ya baana ba Gadi wa ulamana na madu ma bamasabo, bahwile uhewa, na iyo ibaa ya ilongo ya Manase bahwile uhewa buhyana bwabo; ¹⁵ bibyo bilongo bibili na ibaa bahwile uhewa buhyana bwabo uya m'bwala bwa bubili bwa Yolodani, haya Yeliko, luubi lwa mlugulu, uhugulwila ubutobwelo bwa chuba. ¹⁶ Hanyuma Mlume gudogomine na Musa, na umsambila, ¹⁷ Mano noo machina ma batu bene boligabila sii uba buhyana bwenyu; Eleazali ibuli, na Yoshua mwaana gwa Nuni. ¹⁸ Hanyuma wimguha mmosobu gumwechi gwa ilongo yo yose, yulu bagabe sii gibe buhyana bwenyu. ¹⁹ Na machina ma babo batu noo mano; wilongo ya Yuda, m Kalebu mwaana gwa Yefune. ²⁰ Na wilongo ya baana ba Simeoni, Shemueli mwaana gwa Amihudi. ²¹ Wilongo ya baana ba Benyamini, m Elidadi mwaana gwa Kisloni. ²² Na wilongo ya baana ba Dani, mmosobu, Buki mwaana gwa Yogli. ²³ Hawingi ha baana ba Yusufu; wilongo ya baana ba Manase, mmela, Hanieli mwaana gwa Efodi; ²⁴ na wilongo ya baana ba Eflaimu, mmosobu, Kemueli mwaana gwa Shiftani. ²⁵ Na wilongo ya baana ba Zabuloni, Elisafani mwaana gwa Palnaki. ²⁶ Na wilongo ya baana ba Isakali, mmosobu, Paltieli mwaana gwa Azani. ²⁷ Na wilongo ya baana ba Asheli, mmosobu, Ahihudi mwana gwa Shelomi. ²⁸ Na wilongo ya baana ba Naftali, mmosobu, Pedaheli mwaana gwa Amihudi. ²⁹ Babo noo bene balagile Mlume babagabile buhyana baana ba Isilaeli mnda sii gya Kanaani.