¹ Luno noo lwendo lwa baana ba Isilaeli, haya hene habahumine mnda sii gya Misili na ihichi yabo hasi ha uboo wa Musa na Haluni. ² Musa gugolile nahi byabahumine na ugyta wabo, wa alago a Mlume; chino noo ng'endo chabo nahi uchuwa wabo byaubele. ³ Bagyatile uhuma Lamesesi mwachi gwa gutangi, lusugu lwa umi na butano lwa mwechi gwa gutangi; lusugu lwa bubili hanyuma ha Pasaka, baana ba Isilaeli bahumine wa uoma wa uboo u mbele wa meeso ma Bamisili bose, ⁴ haya Bamisile hababele huchiya bubele bwabo bose, Mlume helibahagile hawingi habo; Mlume guitile uonona wage u miishi gyabo nagyo. ⁵ Baana ba Isilaeli bachuwile uhuma Lamesesi, bashamine Sukothi. ⁶ Hanyuma bachuwile uhuma Sukothi, bashamine Ethamu, noo hisula ya mgala. ⁷ Bachuwile uhuma Ethamu, na ugiwila u nyuma ndaa na Pi-hahilothi hoka na uhyila Baal-sefoni; bashamine hambele ha Migdoli. ⁸ Bachuwile uhuma hambele ha Hahilothi, badabwile bahali na ugingila mlwanaganywa; hanyuma bagyatile lwendo lwa masugu matatu mnda mgala gwa Ethamu, bashamine Mala. ⁹ Bachuwile Mala, bahiile Elimu; uya Elimu habele na misula umi na gibili gya maadi, na tusugwe maumi njwii; nabo bashamine haho. ¹⁰ Bachuwile uhuma Elimu bashamine hoka na Bahali lya Shamu. ¹¹ Bachuwile uhuma Bahali lya Shamu, bashamine mnda mgala gwa Sini. ¹² Bachuwile uhuma mnda mgala gwa Sini, bashamine Dofka. ¹³ Bachuwile uhuma Dofka, bashamine Alushi. ¹⁴ Bachuwile uhuma Alushi, bashamine Lefidimu, hene hashibele na maadi ma batu unywa. ¹⁵ Bachuwile uhuma Lefidimu, bashamine mnda mgala gwa Sinai. ¹⁶ Bachuwile uhuma mnda mgala gwa Sinai, bashamine Kibloth-hataava. ¹⁷ Bachuwile uhuma Kibloth-hataava, bashamine Haselothi. ¹⁸ Bachuwile uhuma Haselothi, bashamine Lithma. ¹⁹ Bachuwile uhuma Lithma, bashamine Limon-pelesi. ²⁰ Bachuwile uhuma Limon-pelesi, bashamine Libna. ²¹ Bachuwile Libna, bashamine Lisa. ²² Bachuwile uhuma Lisa, bashamine Keheletha. ²³ Bachuwile uhuma Keheletha, bashamine u loono Shefeli. ²⁴ Bachuwile uhuma u loono Shefeli, bashamine Hadala. ²⁵ Bachuwile uhuma Hadala, bashamine Makelothi. ²⁶ Bachuwile uhuma Makelothi, bashamine Tahathi. ²⁷ Bachuwile uhuma Tahathi, bashamine Tela. ²⁸ Bachuwile uhuma Tela, bashamine Mithka. ²⁹ Bachuwile uhuma Mithka, bashamine Hashmoni. ³⁰ Bachuwile Hashmoni, bashamine Moselothi. ³¹ Bachuwile uhuma Moselothi, bashamine Bene-yakani. ³² Bachuwile uhuma Bene-yakani, bashamine Hol-hagidgadi. ³³ Bachuwile uhuma Hol-hagidgadi, bashamine Yotbatha. ³⁴ Bachuwile uhuma Yotbatha, bashamine Ablona. ³⁵ Bachuwile uhuma Ablona, bashamine Esion-gebeli. ³⁶ Bachuwile uhuma Esion-gebeli, bashamine mnda mgala gwa Sini (noo Kadeshi). ³⁷ Bachuwile uhuma Kadeshi bashamine u loono lwa Holi, u lugumba lwa sii gya Edomu, ³⁸ Haluni gugile u loono lwa Holi, waalago a Mlume, guwile haya, ha mwaa gwa maumi mana hanyuma ha baana ba Isilaeli uhuma mnda sii gya Misili, gubele mwechi gwa butano, lusugu lwa lutangi lwa mechi. ³⁹ Nage Haluni gubele mtu gwa myaa sambi na maumi mopi na gitatu haya heliwile u loono lwa Holi. ⁴⁰ Haho Mkanaani oolo lya Aladi, gubele hushama luubi lwa Negebu mnda sii gy6a Kanaani guhuliche mwano gwa uchwa wabo baana ba Isilaeli. ⁴¹ Nabo bachuwile uhuma ha loono wa Holi, bashamine Salmona. ⁴² Bachuwile uhuma Salmona, bashamine Punoni. ⁴³ Bachuwile uhuma Punoni, bashamine Obothi. ⁴⁴ Bachuwile uhuma Obothi, bashamine Iye-abalimu, u lugumba na Moabu. ⁴⁵ Bachuwile uhuma Iye-abalimu, bashamine Dibon-gadi. ⁴⁶ Bachuwile Dibon-gadi, bashamine Almon-diblathaimu. ⁴⁷ Bachuwile uhuma Almon-diblathaimu, bashamine ha loono lwa Abalimu, ulolana na Nebo. ⁴⁸ Bachuwile uhuma u loono Abalimu, bashamine mnda sii gya ibandabanda ya Moabu, hoka na luudi lwa Yolodani, haya Yeliko. ⁴⁹ Bashamine hoka na Yolodani, utula Beth-yeshimothi ndaa na uhyila Abel-shitimu mnda sii gya ibandabanda ya Moabu. ⁵⁰ Manyuma Mlume gudogomine na Musa haya mnda sii gya ibandabanda ya Moabu, hoka na Yolodani, haya Yeliko, na umsambila, ⁵¹ Dogoma na baana ba Isilaeli, ubasambile, Hamwidabuwa luudi lwa Yolodani na ugingila mnda sii gya Kanaani. ⁵² haya hene hamwibachinga bashami bose ba giya sii u mnele wenyu, benywe mwidogya mawe mabo mose ma mabade miishi, na ugugicha miishi gyabo gyose bya uumbatilwa, ubela bela bihana byabo byose byabaginyune. ⁵³ benywe mwigiguha gigyo sii ugihyilia na ugishama mo; bululi nene nimmele gigyo sii yulu mugihyilile. ⁵⁴ Benywe mwuguhyana sii wa uta luti, nahi bili mioga gyenyu byagili; baya bene bali beengi mwibaha buhyana bwingi uhima bange, na baya bene bachi bacho hawingi habo wibaha ulamana na bucho bwabo; bihana byo byose, luti halwimgwila mtu ge gese, iyo ihana noo ibi yage; mwihyana nahi bili bilongo bya bamasenyu byabili. ⁵⁵ Alakini nambo mushibenja ubachinga bashami bose ba gino sii uhuma u mbele wenyu; haho baya bene bamwishiga babi nahi lushinge m meeso menyu, na nahi miigwa m mbachu chenyu, nabo bimdagya mnda gigyo sii gyine gyamwishamamo. ⁵⁶ Hanyuma bibi nahi byamulangile benywe ubagilila bo, noo byabimgilila benywe.