¹ Bibyo baana na Leubeni, na baana ba Gadi, babele na nyama chingi abisa cha usugwa; nabo habamonine sii gya Yazeli, na sii gya Gileadi, ihana yabo myihana ya isoga ya ulisha nyama; ² babo baana ba Gadi, na baana ba Leubeni, bagile uli Musa na Eleazali ibuli, na bulu ba sumbilo, badogomine nabo, baganine, ³ Atalothi, na Diboni, na Yazeli, na Nimla, na Heshboni, na Eleale, na Sebamu, na Nebo na Beoni, ⁴ sii gigyo Mlume gyelilwile nagyo u mbele wa sumbilo lya Isilaeli, m sii gilingye u nyama cha usugwa, na beswe bagichi bobe tuli na nyama cha ugugwa. ⁵ Baganine, Nambo twahewa iuli u mbele wa meeso mobe, beswe bagicho bobe tuhewe gino sii gibe ihana yetu; ibumbu ino ushitudabole luudi lwa Yolodani. ⁶ Musa gubasambile baana ba Gadi na baana ba Leubeni, Wi wii! Bashiwetu bagye u bita na benywe mushame hano? ⁷ Ati mwabanoga mitima gyabo baana ba Isilaeli, bashidabuwe na ugingila mnda sii gigyo gyine gibahele Mlume? ⁸ Noo bigilile bamasetu, haya habatuminywe uhuma Kadesh-balnea, yulu ya bagye ugilola gigyo sii. ⁹ Bululi habagile na ugingila ibetabeta ya Eshkoli, na ugimona sii, babanogile mitima baana ba Isilaeli, yulu bashigye ugigingila sii gyabahelwe na Mlume. ¹⁰ Na luya lusugu sungu cha Mlume chilamine, nage gulahile pa, guganine, ¹¹ Chigilwe gyanyi hashi mtu ata gumwechi hawingi ha baya bene bahumine Misili, utula guya mine gubele na myaa maumi mopi, na uhima, mine gwigimone giya sii gyandimlahile pa Iblahimu, na Isaka, na Yakobo; bululi bashindamine wa mtima gose; ¹² nambo Kalebu mwaana gwa Yefune, Mkenizi, na Yoshua mwaana gwa Nuni; Bululi babo bamlamine Mlume wa mtima gose. ¹³ Haho sungu cha Mlume chilamine yulu ya Isilaeli, nage nibagyasha ubo na uya mlwanaganywa mengo ma myaa maumi mana, ndaa na ibushi iyo igima yine igilie usona u meeso ma Mlume ihwile udigwa. ¹⁴ Na loola, benywe mwaginyuwa hanyuma ha bamasenyu, bisunga bya batu ba buubi, yulu ya ulibiya iyaka sungu cha buhuchi bwa Mlume yulu ya Isilaeli. ¹⁵ Bululi bugaluwe mushimlame, gee gwimshiga iyaka mgala; benywe mwibahagya batu bano bose. ¹⁶ Bibyo bamshenene hoka, na ugana, Beswe twibiya liha lya nyama chetu cha usugwa hano, na ugubaa mabuga yulu ya baana betu; ¹⁷ alakini beswe bene tubi lumima na tulume gela twetu ugolola hambele ha baana ba Isilaeli, ndaa na byatwibahyicha u bihana byabo; na baana betu bishma mnda mabuga mene mali ma migumbo, yulu ya batu bene na gino sii. ¹⁸ Beswe tushigiwila u madu metu, ndaa na baana ba Isilaeli hababi bahuhwa uhyana mtu ge gese buhyana wage. ¹⁹ Bululi beswe tushihyana hamwechi nabo uya m'bwala bwa bubili bwa Yolodani, uya u mbele, bululi buhyana bwetu bwatugwila buno bwala bwa Yolodani luubi lwa mlugulu. ²⁰ Haho Musa gubasambile, Nambo mwigila ino ikoko, nambo mwichwala tulume gela, yulu ya ulombola hambele ha Mlume wa ugya u bita, ²¹ iyaka nambo mlumyana ge gese gwenyu mine gwiguha alume gela na udabuwa Yolodani u mbele wa Mlume, ndaa na byebi gwahuhwa ubahunya ba tumangu twage, ²² na gigyo sii uhimwa u mbele wa Mlume; na hanyuma benywe noo ugiwila, haho benywe mushibi na abachi u mbele wa Mlume, na u baana ba Isilaeli; na gino sii gibi ihana yenyu u mbele wa Mlume. ²³ Alakini nambo mushigila iyo inywa, benywe mwigila buubi u mbele wa Mlume, benywe manywe ugana bubo buubi bwenyu winene bubi hegulu henyu. ²⁴ Bino, gubawe mabuga yulu ya baana benyu, na liha yulu ya myoo gyenyu; gilwe bibyo byine byamwadogoma m tunywa twenyu. ²⁵ Haho baana ba Gadi na baana ba Leubeli baganine na Musa, na umsambila, Beswe bagichi bobe twigila nahi gogwe mlumyanyi byawatulaga. ²⁶ Baana betu, na baachi betu, na myoo gyetu, na ng'ombe chetu chose, chibi haya mnda sii gya Gileadi; ²⁷ alakini beswe bagicho bobe twidabuwa, mlumyana ge gese mine gwila alume gela a bita, u mbele wa Mlume, tugye u bita, nahi byolihuga gogwe mlumyanyi. ²⁸ Haho Musa gumlagile eleazali ibuli, na Yoshua mwaana gwa Nuini, na baulu ba madu ma bamasabulu ba bilongo bya baana ba Isilaeli, yulu ya mwano gwa babo batu. ²⁹ Musa gubasambile, Ugana baana ba Gadi, na baana ba Leubeni, bidabuwa Yolodani hamwechi nenyu, mtu ge gese mina gwina alumegela a bita, u mbele wa Mlume,nagyo gyihimwa u mbele wenyu; haho noo hamwibaha sii gya Gileadi uba ihana yabo;v 30 alakini nambo bashihubenja udabuwa hamwechi nenyu, nabi bali na tulume gela twabo, haho noo babi na ihana yabo hawingi henyu mnda sii gya Kanaani. ³¹ Baana ba Gadi, na baana ba Leubeli, bagaile na ugana, Nahi bitusambile Mlume beswe bagichi bobe, noo byatwiita. ³² Twidabuwa, na tubi bachwale tulume gela twetu, u mbele wa Mlume, ugingila nda sii gya Kanaani, uba ihana ya buhyana bwetu ibi m'bwala luubi lwa bubili lwa Yolodani. ³³ Bibyo Musa gubahele boo; noo, baana ba Gadi, na baana ba Leubeni, na imwe ibaa ya ilongo ya Manase, baana ba Yusufu, buolo bwa Sihoni oolo lya Maamoli, na buolo bwa Ogu oolo lya Bashani, gigyo sii, nahi mabuga mabo byamabele, hamwechi na ng'umba chage, noo, mabuga ma gigyo sii byamabele machungulubu ngubi chose. ³⁴ Hanyuma baana ba Gadi bagubae Diboni, na Atalothi, na Aloeli; ³⁵ na Atlothi-shofani, na Yazeli, na Yogbeha; ³⁶ na, Beth-nimle, na Beth-halani,; mabuga mene mali na migumbo, na liha lya miyoo. ³⁷ Na baana ba Leubeni bagubae Heshboni, na Eleale, na Kiliathaimu; ³⁸ na Nebo, na Baal-meoni, (machina mamo mabele hugalulwa) na Sibma; nabo bamagitile mabuga mabagubae mange mnachina. ³⁹ Na baana ba Makili mwaana gwa Manase bagile Gileadi, na ugiguha, na ubasapula Baamoli bene babelemo. ⁴⁰ Haho Musa gummele Makili, mwaana gwa Manase, giya Gileadi, nage gushamine mmo. ⁴¹ Hanyuma Yaili mwaana gwa Manase gugile na utuguha tusoi twa Gileadi. Gutugutile machina lyage, Hawoth-yaili. ⁴² Hanyuma Noba gugile na usapa Kenathi na tusoi twage, na utugita china lyage Nobe, ulamana na china lyage gee mine.