¹ Hanyuma Mlume gudugomine na Musa, na umsambila, ² Bagiwidiche baana ba Isilaeli buubi wa buubi u Bamidiani; hanyuma wabasumbiche wabbe hamwechi na batu bobe. ³ Haho Musa gudogomine na batu, na ubasambila, Bachwiwe tulume gela batu hawingi henyu bagye u bita, bululi bagye ulwa na Midiani, yulu bamgiwidiche Mlume buubi wa buubi, u ba Midiani. ⁴ Mnda ilongo yo yose mwihuma batu uki, u ilongo byose bya Isilaeli, benywe mwibahila bagya u bita. ⁵ Bibyo bahunyiwe hawingi ha mauki ma Isilaeli, uki limwechi wilongo imwechi, malumyana batu uki umi na chibili bene bagimiwe ugya u bita. ⁶ Haho Musa gubahilile, batu uki ba ilongo yo yose bagye u bita, boo na Finehasi mwaana gwa Eleazali ibuli, bagye u bita na biya bitundu bya ihana ya ihaha, na tuya tusiba tugilwa wa liya liidi lya umanya m muboo wage. ⁷ Nabo balwile na Midiani; nabo bahagile mlumyana ge gese. ⁸ Namo maolo ma Midiani mahagilwe hamwechi na bange batu bene bahagilwe; Evi, na Lekemu, na Suli, na Huli, na Leba, mamo maolo matano ma Midiani; Balaamu mwaana gwa Beoli nage bammagile na ahilu. ⁹ Baana ba Isilaeli bawatile kole baachana na Midiani na baana babo; na ng'ombe chabo na myoo gyabo gyose, na bitundu byabo byose, bawatile kole. ¹⁰ Na mabuga mabo mose, bihana byose byababele hushama, na bushamo byabo bose babuchigiche na aahya. ¹¹ Nabo baguhile bahambwa bose, na kole chose, cha batu na cha nyama. ¹² Nabo babalushishe bawaswa na batu, na bawaswa ba nyama, na babo bawaswa bababiile u mbele wa Musa, na umbele wa Eleazali ibuli, na u mbele wa sumbilo lya baana ba Isilaeli, haya ha bushamo mnda sii gya ibanda-banda ya Moabu, yine ili hoka na Yeliko. ¹³ Nage Musa, na Eleazali ibuli, na baulu bose ba lilyo sumbilo, batobowile hambuga ugya ubagaa hambuga ha bushamo. ¹⁴ Musa guchigililwe yulu ya bilume pambwa ba basolokoto, na baya balochi ba uki uki, na bahela ba ma sambi sambi, babo bene bagiwile uhuma ulwa bita. ¹⁵ Musa gubabudiche, Wi wii! Mwabahogonona baachana bose uba na mwego? ¹⁶ Loolwe, bano noo babalubiche baana ba Isilaeli, wa mihungo gya Balaamu, bammitile Mlume buubi wa iya ikoko ya Peoli, na wa biya bihulo byine bibele hawingi ha sumbilo lya Mlume. ¹⁷ Bino wa yulu ya bibyo bahagwe baana bose ba balumyana, na mmachana ge gese mine gwahumana ulala na balumyana nage gahagwe. ¹⁸ Alakini baya baana bose ba baachana bene bashinamana ulala hamwechi na balumyana, mwibashiga na mwego yulu babi banyu. ¹⁹ Benywe iswe bushamo byenyu hambuga ha buno bushamo masugu njwii; mtu ge gese mine guhagile mtu,na ge gese mine guudile mtu mine guhagilwe, lihahachiwe bichuli-chuli byenyu bya mwego lusugu lwa matatu, na lusugu lwa njwii benywe na kole chenyu. ²⁰ Na yulu ya mwano gwa bichwalaganywa, na bibya byose byine bilongiwe wa bibambi, na mgilo gose gya maso ma mbuchi, na bibya byose byine bilongiwe bya miti, mwilihahacha benywe bene. ²¹ Hanyuma Eleazali ibuli gubasambile balumyana ba bita bose bene bagile u bita Ano noo alago a m'bindo gwa Mlume byelimlagile Musa; ²² alakini nolo, na lusuu, na mmubo, na bigela, na lufeta, na masasi, ²³ ibya yo yose yine inaosha ushama waahya, mwiihisha waahya, nayo ibi ihaha, hamwechi na bibyo yihahachiwa na mamo maadi ma msambuano; na ibya yo yose yine ishigele waahya mwiihisha m mamo maadi. ²⁴ Na benywe mwifula bichwalaganywa byenyu lusugu lwa njwii, na benywe mubi bahaha, hanyuma mwigingila mnda bushamo. ²⁵ Hanyuma Mlume gudogomine na Musa , na umsambila, ²⁶ Baala bawaswa bose na batu , na ba nyama nacho, gogwe, na Eleazali ibuli, na baulu ba madu ma bamasabo ba sumbilo; ²⁷ ugabe kole mitala gibili; hawingi ha batu bene baolobele bita, benebatobowile hambuga yulu bagye u bita, ba lilyo sumbilo lyose; ²⁸ Hanyuma ubasabe babo batu ba bita bene abhumine ugya u bita iba wa yulu ya Mlume; umwechi u sambi chitano, uhuma u batu, na u ng'ombe, na u punda, na u myoo; ²⁹ waguhe bimwe byabo, wamme Eleazali ibuli, uba lutangi lwa uginunywa wa Mlume. ³⁰ Na wa imwe ibaa ya baana ba Isilaeli wiguha gumwechi mine gwuhananywa u maumi matano, uhuma u batu, na u ng'ombe, na u myoo, bululi, u nyama chose, wabahe Balawi, baya basigila mgilo gwa bushamo bwa Mlume. ³¹ Musa na Elwazali ibuli baitile nahi Mlume byelimlagile Musa. ³² Bibyo, bisunga bya kole byabawatile batu ba bita, chibele m myoo uki sambi mtuba na maumi njwii na gitano (675,000). ³³ na ng'ombe uki maumi njwii na chibili. ³⁴ na punda uki maumi mtuba na imwechi, ³⁵ iyaka batu lubalo lwabo lubele uki maumi mabili na babili, u baya baachana bene bashubele namana ulala hamwechi na balumyana. ³⁶ Na iya ibaa yine ibele ya baya batu bene bagile u bita, ibaa yabo ibele myoo uki sambi chitatu na maumi matatu na njwii na sambi chitano ; ³⁷ na mlambu gwa Mlume u gigyo myoo gibele myoo sambi mtuba na maumi njwii na gitano. ³⁸ Iyaka, ng'ombe chibele uki mtuba; na u gigyo mlambu gwa Mlume gubele ng'ombe maumi njwii na chibili. ³⁹ Na bpunda, chibele uki maumi matatu na sambi chitano, u chicho mlambu gwa Mlume gubele punda maumi mtuba na gimwechi. ⁴⁰ Na batu babele uki umi na mtuba; u babo ibaa ya Mlume ibele m batu maumi matatu na babili. ⁴¹ Bibyo Musa gummele Eleazali ibuli iyo ibaa, yine ibele lutangi lwa uginunywa wa Mlume, nahi Mlume byelimlagile Musa. ⁴² Iyaka u iyo ibaa yine ibele ye baana ba Isilaeli, Musa yeibagule na batu bene bagile u bita, ⁴³ (bibyo iya ibaa ya sumbilo ibele myoo sambi chitatu na maumi matatu na njwii na sambi chitano 337,500, ⁴⁴ na ng'ombe uki maumi matatu na mtuba. ⁴⁵ na punda uki maumi matatu na sambi chitano. ⁴⁶ na batu uki umi na mtuba;) ⁴⁷ na iya ibaa yine ibele ya baana ba Isilaeli, Musa guguhile gimwechi gyine gibele gihananywe u maumi matano, gwa batu na gwa nyama, gubahele Balawi, bene bagilile mgilo gwa bushamo bwa Mlume; nahi Mlume byelimlagile Musa. ⁴⁸ Na bilume pambwa bene babele hulula uki uki gya basolokoto, na bagimenyi ba sambi sambi, bamchilile Musa; ⁴⁹ bamsambile Musa baganine, Beswe bagichi bobe twagile mgilo gwa ubala batu ba bita bene bali hasi ha maboo metu, na hashi ata gumwechi mine gwachimina. ⁵⁰ Na beswe twalusha lutangi wa Mlume, lwine upashile mtu ge gese, bya bibyo bya nolo, na mitali, na byumatu, na pete cha byala, na byuhamba njuli, na lunga lwa umagulu, yulu ya uita usambanya wa bichuli-chuli byetu bya mwego wa Mlume. ⁵¹ Musa na Eleazali ibuli bagaile wabo chiya nolo, noo biya bibya byose byine bilongiwe. ⁵² Na nolo chose cha lutangi lwa uginunywa lwine lutaqngilwa wa Mlume, na bagimenyi ba uki uki, na bagimenyi ba sambi sambi, chibele shekeli uki umi na mtuba na sambi njwii na maumi matano. ⁵³ (Bululi baya batu ba bita babele baguhe mtu ge gese kole, mtu ge gese na gwage mmcha.) ⁵⁴ Haho Musa na Eleazali ibuli bagaile chiya nilo m maboo ma baya bagimaninyi ba uki uki, na ba sambi sambi, yulu ya ubilusha mnda heme lya busambeno, yulu chibe kengelecho wa yulu ya baana ba Isilaeli u mbele wa Mlume.