¹ Hanyuma Musa gudogomine na baya miswe gya bilongo bya baana ba Isilaeli, na ubasambila, Ino inywa noo ilagilwe na Mlume. ² Mtu helim'biila Mlume ulibindila, ao helilaha pa yulu ya uhamba ichuli-chuli yage ya mwego mmihambo, bashiigalule inywa yage; gwigila byoka biya na biya byose byine bihumione m manywa age. ³ Iyaka msiha gubem'biila Mlume ulibindila, na uhamba ichuli-chuli yage ya mwego m mihambo, nagegwili mshame mndu gya sage, u bunyundu bwage; ⁴ sage nage nuuhulicha mwano gwa ulibindila wayo; na uya ulihamba wage welihambile ichuli-chuli yage ya mwego, na sage gabeshama pii haho noo uya ulibindila wage ose wigiliya, na uya ulihamba wage welihambile ichuli-chuli yage ya mwego wigiliya. ⁵ Alakini nambo sage gabemmaninya loka lulo lusugu lwelihuliche; ulibindila wage o ose, ata na u ulihamba wage welilihambile ichuli-chuli yage ya mwego ushiwilichiwa; na Mlume gwaimleelela, bululi sage gwammaninya. ⁶ Iyaka nambo gwahuhwa ugonjwa na mlume, mamo mengo ma ulibindila wage, au wa inywa iya yeliganine na milomo gyage nangu ulanga, yelilihambile; ⁷ na mlumyage gabehulicha mwano, nage gabemshamina pii lulo lusugu lwelihuliche iyo inywa; haho ulibindila wage wigiliya, na uya ulihamba welihambile ichuli-chuli yage ya mwego byigilwa. ⁸ Alakini nambo mlumyage gummaninye loka lulo lusugu lwelihuliche; haho gwibindula ulibindila wage wine uli hegulu hage na iya inywa yelidogomine na milomo gyage nangu umana, yelilihambile; na Mlume gwimleelela. ⁹ Alakini ulibindila wa m'bwile, au wa mmachana guchingilwe na mlume, inywa yo yose yine yelilihambila ichuli-chuli yage ya mwego yigiliya hegulu hage. ¹⁰ Iyaka nambo gubiile ulibindila guli mndu mwa mlumyage, ao nambo guhambile ichuli-chuli yage ya mwego wa ihambo ao wa ulaha pa, ¹¹ na mlumyage gabehulicha na ushama pii, na gushimmaninye; haho ulibindila wage ose wigiliya na ulihamba wage ose welilihambile wigiliya. ¹² Alakini nambo mlumyage gugalule na ubindula loka lulo lusugu lwelihuliche, haho inywa yine ihumine mnda milomo gyage mnda ubo ulibindila wage, ao mnda uya ulihambaichuli-chuli yage ya mwego, ishigilwa; yulu gugo mlumyage gwaibindula; na Mlume gwimleelela. ¹³ Na ulibindila o ose, na ulaha pa wa ulihamba, yulu ya uiwilicha ichuli-chuli yage ya mwego ya mmachana mlumyage gunaosha uwilicha ao mlumyage gunaosha ubindula. ¹⁴ Alakini mlumyage gabemshamina pii abisa mmachage lusugu wa lusugu haho gwiiwilicha ulibindila ose wa mmachage, ao bihambo byage byose byine bili hegulu hage; gee gwiwilicha bululi bumshanime pii mmachage luya lusugu lwelihuliche mwano gwa ulibindila wage. ¹⁵ Alakini nambo gummanyinye na ugubindula hanyuma ha uhulicha; haho gee gwiguha usona wa mmachage. ¹⁶ Ao noo alago, ene alagilwe Musa na Mlume, hawingi ha mlume na mmachage, hawingi ha shibana na msiha gwage, u bunyundu bwage, gwili mndu mwa sage.