¹ Hanyuma baya baulu ba ndu gya bamasabulu ba baana ba Gileadi, mwaana gwa Makili, mwaana gwa Manase, ba ilongo ya baana ba Yusufu, bahiile, badogomine u mbele wa Musa, na u mbele wa maulu bene bali hegulu ya madu ma bamasabulu ba baana ba Isilaeli; ² baganibe, Mlume gumlagile mlumyetu gabahe baana ba Isilaeli sii wa uta luti gibe buhyana bwabo; iyaka mlunyanyi gulagilwe na Mlume gabahe misiha gya Selofehadi mshiwetu bubo buhyana bwa sabo. ³ Babegonjwa na batu ba baana ba binge bilongo bya baana ba Isilaeli, haho buhyana bwabo bwiguhwa na uhunyiwa u buhyana bwa bamasetu, na biya bilongo byabibiwa wa bili noo byilibilwa buhyananbwabo; bino bubo buhyana bwihunyiwa wa uta luti buhyana bwetu. ⁴ Iyaka hagubiho mwaa gwa uengelecha (Yubile) gwa baana ba Isilaeli, haho buya buhyana bwa biya bilongo byine byabali mo byilibiilwa bubo buhyana bwabo; bibyo buhyana bwabo byuhunyiwa hawingi ha buhyana bwa ilongo ya bamasetu. ⁵ Bibyo Musa gubalagile baana ba Isilaeli nahi inywa ya Mlume byaibele, guganine, Ilongo ya baana ba Yusufu yadogoma bya kine. ⁶ Mlume gwalaga ino inywa yulu ya misigha gya baana ba Solofehadi, guganine, Na bagonjwe na balume bene babiunda; alakini na bagonjwe mnda bilongo bya bamasabo. ⁷ Bibyo hashi buhyana bo bose bwa baana ba Isilaeli bwihuma ii ilongo na uhewa iinge ilongo; bululi baana ba Isilaeli bishama mtu ge gese mnda buhya bwa ilongo ya bamasage. ⁸ Na msiha go gose gwine gyihyilila buhyana bwa ilongo yo yose ya hawingi ha baana ba Isilaeli, gwugonjwa mnda imwe ilongo ya sage, yulu baana ba Isilaeli baoshe uhyilila mtu ge gese buhyana bwa bamasage. ⁹ Bibnyo hashi buhyana bo bose bwine bwihuma ilongo imwechi na ugya inge ilongo; bululi bilongo bya baana ba Isilaeli byishama ilongo yo yose mnda buhyana byayo yo yine. ¹⁰ Bino gigyo misiha gya Selofehadi biita nahi Mlume byelimlagile Musa; ¹¹ bululi Mala, na Tilsa, na Hogla, na Milka, na Noa, Msiha gwa Selofehadi bagondilwe na balume, baana ba bashiwabu na bamasabo. ¹² Bagondilwe na baana ba Manase, mwaana gwa Yusufu, na buhyana bwabo busjhamine mnda bilongo ya ibushi ya sabo. ¹³ Mano noo malagano ma uonona, mene Mlume melimlagile baana ba Isilaeli, uhitila uboo wa Musa, uya mnda sii gya ibandabanda ya Moabu, hoka na Yolodani, haya Yeliko.