¹ Hanyuma Mlume gudogomine na Musa, gumsambile, ² Lagaga babo baana ba Isilaeli, ubasambile, Tambiko lyanyi, iliwa yanyi ya lutangi lusutangilwa waahya, lwa mahembwe mene mandisubenja nene, mwilingamina ubutangila wandi ha mengo mage. ³ Gogwe wibasambila, Luno noo lutangi lusutangilwa waahya lwamwimtangila nalo Mlume; baana ba myoo ba milume ba mwaa gwa gutangi ba bawilile, babili lusugu wa lusugu, baabe lutangi lwa uchigya lwa masugo mose. ⁴ Mwana-mmoo gumwechi wigutangila halwelo, na mwana-mmoo gwa bubili wigutangila ha igolo; ⁵ hamwechi na itanga ta buusu bwa nekuneku uba lutangi lwa buusu, bwa busupaganyiwe na imwechi ya buna ya ahindi a mauta ma mahinywe. ⁶ M lutangi lwa uchigiwa lwa masugu mose, lwine luganinywe uya u loono lwa Sinai lube mahembwe, lutangi lwa utangilwa wa Mlume wa ndila gyaahya. ⁷ Na lutangi lwage lwa byunywa lubi imwechi ya buna ya ahindi wa mwana-mmoo gumwechi; lulo lutangi lwa byunywa, lwa byuolwa, wiluhongolwela Mlume haya ha ihana ya ihaha. ⁸ Na mwama-mmoo gwa bubili wigutangila igolo; nahi luya lutangi lwa buusu lwine lutangilwe halwelo, na nahi lutangi lwage lwa byunywa, noo byolitangila, m lutangi lwa utangilwa waahya, m mahambwe wa Mlume. ⁹ Iyaka lusugu lwa Sabato witangila baana ba myoo babili ba milume ba mwaa gwa gutangi, babawilile, hamwechi na ibaa ya umi na bubili ya itanga ya buusu bwa nekuneku bube lutangi lwa buusu,bwa busupaganyiwe na mauta, hamwechi na lutangi lwage lwa byunywa. ¹⁰ luno noo lutangi lwa byuchigya sabato chose, wa uhima bibyo lutangi lwa uchigyalwa masugu mose, hamwechi na lutangi lwa byunywa, ¹¹ Iyaka ha butulilo bwa mwechi byenyu mwimtangila Mlume lutangi lwa uchigya; nalo m ng'ombe chibili cha milume cha tulenge, na mmoo gumwechi gwa mlume, na baana ba myoo ba milume ba mwaa gutangi, babawilile njwii; ¹² hamwechi na ibaa ya umi ya itanga ya buusu bwa nekuneku uba lutangi lwa buusu, bwa busupaganyiwe na mauta, wa ng'ombe gyo gyose; na ibaa ya umi ya bubili ya buusu bwa nekuneku uba lutangi lwa buusu, bwabusupaganyiwe na mauta, wa bigyo ng'ombe gimwechi; ¹³ na ibaa ya imwechi ya buusu bwa nekuneku bwa busupaganyiwe na mauta uba lutangi lwa buusu wa mwana-mmoo go gose; uba mahembwe wa Mlume, noo lutangi lwa utangilwa wa Mlume lwa ndila gyaahya. ¹⁴ Iyaka lutangi lwa byunywa lubi lwa ahindi a lubada lwa ibugu u ng'ombe, na ahindi a butatu ya lubada wa mmoo gwa mlume gumwechi, imwechi ya buna ya ahindi a lubada wa mwana-mmoo; luno noo lutangi lwa uchigya lwa myechi gyose gya mwaa. ¹⁵ Iyaka lunga lya mbuchi limwechi yulu ya lutangi lwa buubi wa Mlume lwitangilwa wa uhima lulo lutangi lwa uchigya lwa masugu mose, hamwechi na lutangi lwage lwa byunywa. ¹⁶ Iyaka, mwechi gwa gutangi, lusugu lwa umi na buna lwa mwechi, m Pasaka gya Mlume. ¹⁷ Lusugu lwa umi na butano lwa goka gugo mwechi lubi lusugu lwa ulitucha; mkati gushi gwa gubiwe mshimi gwiliwa mengo ma masugu njwii. ¹⁸ Lusugu lwa lutangi habi sumbilo lihaha; mushigila mgilo go gose gwa bugichi; ¹⁹ alakini mwitangila lutangi wa ndila gyaahya, lutangi lwa uchigya wa Mlume ng'ombe cha milume chibili cha migenda, na mmoo gumwechi gwa mlume, na myoo gya milume gya migenda njwii; gibi gya giwilile abisa. ²⁰ hamwechi na lutangi lwa buusu, buusu bwa nekuneku bwa busupaganyiwe na mauta; mwishenya ibaa ya umi ya butatu u ng'ombe gimwechi, na ibaa ya umi bibili wa mmoo gumwechi. ²¹ na ibaa ya umi imwechi yishenyiwa wa mwana-mmoo go gose, giya migenda gya myoo njwii. ²² iyaka mwishenya lunga lya mbuchi limwechi uba lutangi lwa buubi, yulu ya uita usambanya yulu yenyu. ²³ Mwitangila chicho nyama abisa wa lutangi lwa uchigya lwa halwelo, lwine luli lwa uchigya lwa masugu mose. ²⁴ Mwitangila lutangi wa guno mlingilisho gwa masugu mose mengo ma masugu njwii; iliwa ya lutangi lwa utangilwa waahya, lwa mahembwe wa Mlume; lwitangilwa abisa ubavlutangi lwa uchigya masugu mose, hamwechi na lutangi lwa byunywa. ²⁵ Na lusugu lwa njwii mubi na sumbilo lihaha; mushigila mgilo go gose gwa bugichi. ²⁶ Iyaka ha masugu ma mtomwe, haya hamwimtangila Mlume lutangi lwa buusu bwa buhya ha masugu menyu ma ulitucha ma mayinga mubi na sumbilo lihaha; mushigila mgilo go gose gwa bugichi. ²⁷ alakini mwitangila lutangi lwa uchigya lwa mahembwe wa M.ume; ng'ombe cha migenda cha milume chibili; mmoo gwa mlume gumwechi, na baana ba myooba milume ba mwaa gutangi njwii; ²⁸ hamwechi na lutangi lwa buusu, buusu bwa nekunekubwa busupaganyiwe na mauta, ahindi a umi butatu wa ng'ombe gyo gyose, na ahindi a umi a bubili u mmoo gwa mlume. ²⁹ na ahindi a umi limwechi wa mwana-mmoo gwa giya myoo gya migenda, gya giya myoo njwii gya migenda; ³⁰ na lunga lya mbuchi limwechi, yulu ya uita usambanya yulu yenyu. ³¹ Wa uhima bibyo lutangi lwa uchigya lwa masugu mose na lutangi lwa buusu, mwitangila chicho nyama (chibi chihaha chiwilile wenyu ), hamwechi na lutangi lwage lwa byunywa.