¹ Mamo mengo bahiilegiya misiha gya Selofehadi, mwaana gwa Hefeli, mwaana gwa Gieladi mwaana gwa Makili, mwaana gwa Manase, gwa ilongo ya Manase mwaana gwa Yusufu; na machima gigyo misiha gya Selofehadi noo mano; Mala, na Noa, na Hogla, na Milka, na Tilsa. ² Nabo bagimene u mbele wa Musa, na Eleazali ibuli, na umbele wa baosobu, na sumbilo lyose, ha mchango gwa itula ya busambeno, gaganine, ³ Setu guwile mgala, nage gushibele m liya sumbilo lya baya bene balisumbiche pinda piswa wa Mlume u liya sumbilo lya Kola; alakini guwile na buubi bwage gee mine; nage gushibele na mwaana gwa mlumyana. ⁴ Yulu yai china lya setu uchimwa mnda bilongo byage wa ibalo gushibele na mwaana gwa mlumyana? Tuhe na beswe buhyana hamwechi na bashiwabo na setu. ⁵ Bibyo Musa gulushishe inywa yabo uli Mlume. ⁶ Mlume godogomine na Musa, na umsambila, ⁷ Gigyo misiha gya Selofehadi badogoma bya kiine; chigilwe wibaha buhyana hamwechi na bashiwabo ba sabo; nagogwe wibaha buhyana bwa sabo. ⁸ Hanyuma widogoma na baana ba Isilaeli, na ubasambila, Nambo mtu gabewa, nage gusahuba na mwaana gwa mlumyana, haho wiguha guya msiha gwage buhyana bwage. ⁹ Iyaka nambo gushi na msiha, wiha mshiwabo buhyana bwage. ¹⁰ Na na,bo gushi na mshiwabo, wibaha bashiwabo ba sage gugo buhyana bwage. ¹¹ Iyaka nambo sage gushi na bashiwabo, wimma guya gwa hoka na ilongo yage bubo buhya bwage, nage gubi nabo; na ino inywa ibi ya alago a uonona u baana ba Isilaeli, nahi Mlume byelimlagile Musa. ¹² Mlume gumsambile Musa, Sele gogwe hegulu ha luno loono Abalimu, ugilingamine sii gyandibahele baana ba Isilaeli. ¹³ Na holihwa ugimona, na gogwe wisumbichiwa hamwechi na bamasobe, nahi Haluni mshiwenyu byelisumbichiwe; ¹⁴ bululi mubengile yulu ya inywa yanyi mnda mgala gwa Sini mengo ma asusu a sumbilo, yulu mushinyeminye, ha maya maadi, u mbele wa meeso mabo. (Maadi mamo noo maadi ya Meliba gya Kadeshi mnda mgala gwa Sini.) ¹⁵ Musa gudogomine na Mlume, ¹⁶ Mlume, Abetcha a luhuda lwa bene bali na mibili bose, na gabiye mtu hegulu halino sumbilo, ¹⁷ gwigyata hambele habo, na ugingila hambele habo; gwibagolwela habichuwa, na ubahyicha mnda sii; yulu sumbilo lya Mlume lishibe nahi myoo gishi na mmushi. ¹⁸ Mlume gumsambile Musa, Mguhe Yoshua, mwaana gwa Nuni, mtu mine gwina luhuda mnda mwage, wam'biile uboo obe hegulu hage; ¹⁹ hanyuma wam'biwe u mbele wa Eleazali ibuli, na umbele wa sumbilo lyose; wamme mihano u mbele wa meeso mabo. ²⁰ Gogwe wibiya hegulu hage ibaa ya bunyemu bobe, bululi sumbilo lyose lya baana ba Isilaeli bamnyemye. ²¹ Nage gwigimana u mbele wa Eleazali ibuli, nage gwim'budicha wa uonona wa Ulimu (ehe) u mbele wa Mlume; wa inywa yage bichuwa, na wa inywa yage bigingila; gee na baana na Isilaeli bose hamwechi nage, na sumbilo lyose nalyo. ²² Musa gugilile nahi biya bimsambile Mlume; gumguhile Yoshua, gum'biile u mbele ha Eleazali ibuli, na u mbele wa sumbilo lyose; ²³ hanyuma gubiile uboo wage hagulu hage, hummele mihano, nahi Mlume byeliganine uhitila uboo wa Musa.