¹ Bibyo Isilaeli gushamine Shitimu, hanyuma batu batulile uita maei na maachana ba Moabu; ² bululi babagitila babo batu bagye u lutangi, lutangi klwabchinjiche miishi gyabo; batu balile bibyo biliwa, baginamine gigyo miishi gyabo. ³ Hahi Isilaeli gulisambanye na Baal-peoli; sungu cha Mlume chilamine hegulu ha Isilaeli. ⁴ Hanyuma Mlume gumsambile Musa, Ubaguhe baulu bose ba babo batu, umsundiile Mlume babo batu u mbele wa chuba, yulu yugana chicho sungu cha Mlume chibahumine ba Isilaeli. ⁵ Haho Musa gubasambile ba tululiya ba Isilaeli, Bahagwe mtu ge gese na batu bage bene balisambanye na Baal-peoli. ⁶ Na loola, gumwe mtu hawingi ha baana ba Isilaeli guchwile na ubalushicha bashiwabo mmachana gwa ba Midiani u mbele ma meeso ma Musa, na u mbele meeso ma sumbilo lyose lya baana ba Isilaeli, haya habilibele ha mchango gwa hema lya busambeno. ⁷ Nage Finehasi mwaana gwa Eleazali, mwaana gwa Haluni ibuli, halimonine iyo ihisho, guhumine haya hawingi ha sumbilo, guguhile sumo m muboo wage; ⁸ gumlamine guya mtu gwa Isilaeli na ugingila mnda itula unyuma wayo, nage gubatungile bose babili na sumo lyage, guya gwa Isilaeli na guya mmachana m gumo lyage. Hahi biya bihulo bichibilwe u baana ba Isilaeli. ⁹ Nabo bene bawili wa yulu ya biya bihulo babele batu uki maumi mabili na bana lubalo lwabo. ¹⁰ Hanyuma Mlume gudogomine na Musa, gumsambile, ¹¹ Finehasi mwaana gwa Eleazali, mwaana gwa Haluni ibuli, gwagalula sungu chanyi chishibe iyaka hegulu ha baana Ba Isilaeli, bululi bugele ba buwa hawingi habo yulu ya buwa bwanyi nene, ata nashibachimye baana ba Isilaeli na sungu chanyi. ¹² Bino wa bibyo, gana, Loola, namma ge malagano manyi ma talala; ¹³ iyaka, wage gee, na ibushi yage hanyuma hage, mabi malagano ma bwibuli bwa milumbu; wa ibalo gubele na buwa yulu ya Abetcha age, na ubaitila usambanya baana ba Isilaeli. ¹⁴ Mndi china lya guya Mmisilaeli mine guhagilwe na guya mmachana gwa Midiani gubele gugiswa Zimli, mwaana gwa Salu, mmele gwa ndu gya sage, gwa ilongo ya Simeoni. ¹⁵ Na china lya guya mmachana gwa Mmediani mine guhagilwe gubele hugiswa Kozbi, msuha gwa Suli; nage gubele mmswe gwa ndu gya bamasage gugo Mmidiani. ¹⁶ Hanyuma Mlume guganine na Musa, na umsambila, ¹⁷ Basusule ba Midiani, na ubahula; ¹⁸ Bululi boo balihumsusula benywe wa umnoga mitima, myugana wa bibyo bali bam'bidiche benywe wa ikoko ya Peoli, na wa ikoko ya gugo Kozbi, msuha gwa mmela gwa Bamidiani, kachabo, gugo mine guhagilwe luya lusugu yulu ya bihulo yulu ya ihisho ya Peoli.