¹ Haho Balaamu helimonine ugana bili bosoga wa Mlume uhalila Isiaeli mihaa, gushigile, nahi haya hatangi, yulu ya uenga maganga, bibyo guhugulule yenyi yage mlwanaganywa. ² Balaamu guginune meeso mage bugamonine Baisilaeli bali bashame ilongo wa ilongo; luhuda lwa Abetcha lumchwilile. ³ Gusulule mihingu gyage, guganine, Balaamu mwaana gwa Beoli gwagana, Guya mtu gwa m'bumbwe meeso gwagana; ⁴ Gwagana, guya gwihulicha binywa bya Abetcha, Guya gwimona malo ma Dambe, Gabegwa m machwi, gwibululwa meeso; ⁵ Bitula byage m bisoga nahi ii, Ee Yakobo, Bushamo bobe, Ee Isilaeli! ⁶ Mlingilisho gwa bibetabeta bya biganjwe, Mlingilisho gwa mabala bibamba mwa luudi, Mlingilisho gwa mikalatushi gyiuninywe na Mlume. Mlingilisho gwa miamba mibamba mwa maadi. ⁷ Maadi mitupuwa mnda atondo age, Na biguma byage bibi mnda maadi mengi. Na oolo lyage lyinyemiwa uhima Agagi, Na buolo bwage bwitonywa. ⁸ Abetcha amlushishe uhuma Misili, Gwina uoma mlingilisho gwa uoma wa mbugo; Gwimina mioga gyine gili tumangu twage, Gwinoga mauda mabo bihindi bihindi. Gwibatunga na migwi gyage. ⁹ Guginamine, gusendame mlingiisho gwa tambwe, Na nahi tambwe gya ota; m nanyi gwim'babula? Na gahalilwe mihaa mine gwiuhalila mihaa, na galogwe ge gese mine gwiuloga. Sungu cha Balaki chilamine hegulu ha Balaamu gutele kwasa; Balaki gumsmbike Balaamu, Niugitile yulu undugele tumangu twanyi, na loola, wabahalila himaa nyengo chitatu chino. ¹¹ Mndi bino ubesinina obe; nabahusimba uunyemya abisa; alakini, loola, Mlume gwahuginya bunyemu. ¹² Balaamu gumsambile Balaki, Wi wii! Nishibasambile batu bobe bolihile, niganine, ¹³ Ata nambo Balaki gwabapa ndu gyage gya gigiluchu lusuu na nolo, nishinaosha uitowa inywa ya Mlume, ugila inywa ya isoga ao ugila inywa ya isone, wa malanga manyi nene mine; yine yidogoma Mlume noo yandidogoma na nene. ¹⁴ Mndi bino, loola, nahugya u batu banyi; bino niuha mwano gwa bikoko bya bano batu byabigila batu bobe masugu mene michwa. ¹⁵ Gusulule mihingu gyage guganine, Balaamu mwaana gwa Beoli gwagana, guya mtu gwa m'bumbwe meeso gwagana, ¹⁶ Gwagana, guya mine gwihulicha binywa bya Abetcha, Na umana malango mage Guya guli hegulu. Guya gulihumona malo na Dambe, Gabegwa machwi hasi, gwabululwa meeso. ¹⁷ Nammona, alakini hashi hano; Namlingamine, alakini hashi hoka; Ambala-mbala itobwela wa Yakobo, Na lubango lwa buolo lwiginyuwa wa Isilaeli; Nalo lwihula-hula miswe gya Moabu, Na ubanoga-noga baana bose ba alugi. ¹⁸ Na Edomu gubi ihana ya Isilaeli, na Seili nagyo gibi ihana ya Isilaeli, bene babele tumangu twage; Isilaeli heligila wa byilume pambwa. ¹⁹ Guya mine gwihyilila gwichwa uhuma wa Yakobo, Gwibachimya bene bishiga m mbuga. Balaamu Gwagana lwendo lwa isula. ²⁰ Hanyuma gwimlingamina Ameleki, gusulule mihingu gyage, guganine, Ameleki gubele m gwa mtangi u mioga; Alakini isula yage gwihyila ugugila. ²¹ Hanyuma gwimlingamine Mkeni, gusulule mihingu gyage, guganine, Bushamo bobe buli na uoma, na iisa yobe yabiwe hegulu ha mahuo. ²² Hamwechi na bibyo Bakeni bichimiwa, Ndaa na byuwata Ashulu kole. ²³ Gusulule mihingu gyage guganine, Luhanga lubi! M nanyi gwihogonowa, Abetcha heligila bibyo? ²⁴ Alakini maato michwa uhuma mgala wa Kipulo, Namo mimsusula Ahulu, na Ebeli mimsusula, Gee nage gwihyila ugugila. ²⁵ Haho Balaamu guginyuwe, gugimene na ugiwila wage; Balaki nage gugile lwage.