¹ Hanyuma baana ba Isilaeli, sumbilo lyose, bangile mnda mgala gwa Sini, mwechi ga gutangi, batu bashamine Kadeshi; Miliamu guwile haya. ² Haya hashibele maadi yulu ya liya sumbilo; balisumbiche uli Musa na uli Haluni. ³ batu bahapene na Musa, bagaine, badogomine, Byisuba lingye twabawa maya mengo mene mawile bashiwetu u mbele wa Mlume. ⁴ Yulu yai mwachwisha sumbilo lya Mlume ndaa na mguno mgala yulu tuwe uno, beswe na nyama chetu. ⁵ Yulu yai mutuitile tuhuma Misili yulu ya utuchwisha ndaa na ino ihana ya ibii? Ishi ihana ya biguma, na ishi na machungwa, na ishi mizabibu, na ishi biboga, na ishi na maadi ma unywa. ⁶ Musa na Haluni bahumine haya hene habele sumbilo, bagile u mchango gwa Hema lya busambeno, bagwile mmachwi; ugengeda wa Mlume ubachwilile. ⁷ Mlume gudogomine na Musa, guganine, ⁸ Guha luya lubango, wasumbiche sumbilo, gogwe na Haluni mshiwenyu, walisambile huo u mbele wa meeso mabo lihongolowe maadi malyo, gogwe wibahongolwela maadi sumbilo na nyama chabo. ⁹ Musa guguhile luya lubango u mbele wa Mlume nahi byalimsambile. ¹⁰ Musa na Haluni babasumbiche sumbilo u mbele wa huo, gubasambile, Hulichiwe hano, benywe balubengo; wi wii! Tummunyinye maadi mnda lino huo? ¹¹ Musa guginune uboo wage na uhula liya huo lubango lwage nyendo chibili; maadi mahongolowe meengo, sumbilo linywine na nyama chabo nacho. ¹² Mlume gumsambile Musa na Haluni, bululi mushibwashiche nene, yulu ya uunyemya u mbele wa meeso ma baana ba Isilaeli, bino wa iyo ibalo, mushigingicha lino sumbilo mnda giya sii gyandimmele. ¹³ Mamo maadi m maadi ma Meliba; bululi baana ba Isilaeli bagumene na Mlume, nage gulimoninye mmaha hawingi habo. ¹⁴ Hanyuma Musa gutumine batu uli oolo lya Edomu, na ugana, Mshiwenyu Isilaeli gwagana, Gogwe ugidi asusu a ose ene atususula; ¹⁵ nahi bamasetu byabaundumwine Misili, beswe tushamine Misili myaa gingi, nabo Bamisili batuhishiche bisone abisa, na ata na bamasetu nabo. ¹⁶ iyaka hatumlilile Mlume, gutuhuiche madi metu, gumtumine malaika, na utuhunya tuhume Misili; bino tuli hano Kadeshi, mbuga gya ulugumba lobe lwa wisula. ¹⁷ Ibumbu ino luhusa tuhita mnda sii gyobe; tushihitila mmabala, na ata mmabala ma mizabibu tushihitamo, na tushiywa maadi ma bishima; twigila m ndila gya gyata gya oolo, tushigaluwa luubi lwa uboo ulume, ata luubi lwa uboo wa uachi, ndaa na byatihita lugumba lobe. ¹⁸ Oolo lya Edomu gumsambile, ushihita mnda sii gyanyi, nashichwe uutobwela ulwa nobe na ahilu. ¹⁹ Baana ba Isilaeli bamsambile, Twihitila mndila gya gyata ka; iyaka nambo twinywa maadi mobe, nene na nyama chanyi chusugwa, haho niuha wa uugulila wa ugula wage, upe luhusa nahite wa mgulu manyi na nishihusimba inge inywa yo yose. ²⁰ Oolo lya Edomu gumsambie, ushihita mnda sii ganyi. Hanyuma oolo lya Edomu gumtobwele yulu ya ulwa nage, na baatu beengi, na wa uboo wa uoma. ²¹ Bibyo Edomu guhaninye uuma luhusa Isilaeli lwa uhuta u ng'umba chage; wabibyo Isilaeli gugalwile na ummleya. ²² Hanyuma bahumine na ugya Kadeshi; baana ba Isilaeli, sumbilo ligima, bahiile loono lwa Holi. ²³ Mlume gudogomine na Musa na Haluni u loono lwa Holi, hoka na ng'umba cha sii gya Edomu, gubasambile, ²⁴ Haluni gwisumbichiwa gabi hamwechi na batu bage; bululi gushigingila mnda sii gyandibahele baana ba Isilaeli, bululi mubengile inywa yanyi haya ha maya maadi ma Meliba. ²⁵ Ubaguhe Haluni na mwanage Eleazali ubahyichi u loono lwa Holi; ²⁶ wamchule Haluni bichwalaganywa byage na wamchiye Eleazali mwanage bibyo bichwalaganywa; hanyuma Haluni gwisumbichiwa u batu bage, nage gwiwa ubo. ²⁷ Musa gugilile nahi bimlagile Mlume; baselile u loono lwa Holi u mbele wa meeso ma sumbilo lyose. ²⁸ Hanyuma Musa gumchulile Haluni bichwalaganywa byage, gumchwiche mwanage Eleazali byoo; Haluni gee nuuwa haya u songo loono; Musa na Eleazali bo nuusala uhuma u loono. ²⁹ Sumbilo lyose halimonine ugana Haluni gwawa, babiile malilo ma Haluni mengo ma masugu maumi matatu, bulili ndu gyose gya Isilaeli bamlilile.