¹ Haho Mkanaani oolo lya Aladi, gubele mshame luubi lwa Negebu, guhuliche mwano gwugana Isileli gulihuchwa wa ndila gya Athalimu; bibyo gulwile na Isilaeli, na ubawata kole bamwe batu hawingi habo. ² Haho Isileli gubiile bya ulibindila uli Mlume guganine, Nambo gogwe wibabiya bano batu mnda maboo manyi chigilwe bibyo nene nigigucha mabuga mabo abisa. ³ Mlume guhuliche liidily Isilaeli, gubabiile Bakanaani mmaboo mabo; nabo babagugiche hamwechi na mabuga mabo abisa; na china lya iyo ihana ho nugiswa Holma. ⁴ Bagileuhuma loono lwa Holi wa ndila gya bahali lya Shamu; yulu ya uchunguluwa sii gya Edomu, batu banogeye mitima yulu ya gigyo ndila. ⁵ Batu bamnunine Abetcha, na Musa, Yulu yai mtuchwishiche uno uhuma sii gya Misili, yulu tuwa mlwanaganywa? bululi hashi byuuya,na hashi maadi, na luhuda lwetu lwabedula iliwa ino ihugi. ⁶ Mlume guhilile madowa ma aahya hawingi ha batu, mabachigile, batu bengi bawile. ⁷ Batu bamgilike Musa, baganine, Twagila buubi wa ibalo ya umnunina Abetcha, na gogwe; utusabile wa Mlume, gatuhiminye mano madowa. Bibyo Musa gubasabile batu wa Mlume. ⁸ Mlume gumsambile Musa, Loongya ndowa gya mmubo, ugibiya hegulu ya mti, na ubi ge gese mine gwichigwa, gabegilola gwihama. ⁹ Musa gulongiche ndowa gya mmubo, gugibiile hegulu ha mti, nauba ndowa gyamchiga mtu, heligilolile giya ndowa gya mmubo, guhamine. ¹⁰ Hanyuma baana ba Isilaeli bagile, bagimiye bitula haya Obothi. ¹¹ Habahumine haya Obothi, bashamine Iye-abalimu, mnda lwanaganya luli hulingamina Moabu, luubi lusuhuma chuuba. ¹² Uhuma uya bagile bashamine wibetabeta ya Zeledi. ¹³ Uhuma haya bagile bashamine luubi lwa bubili lwa Alnoni, ali mlwanaganywa, luli huhuma u lugumba lwa Baamoli; bululi, Alnoni noo lugumba lwa Moabu, hawingi ha Moabu na Baamoli. ¹⁴ Bululi bilihuganywa mnda itabo ya Bita bya Mlume, Bahebu mnda Safu, na ibetabeta ya Alnoni, ¹⁵ Na myundumuo gya biya bibetabeta, Byine bili huundumwina bushamo bwa Ali, na ihyila lugumba lwa Moabu. ¹⁶ Uhuma haya bagile Beeli; myishima yine isambilwe Musa na Mlume, Ubasumbiche batu, na nene nibaha maadi. ¹⁷ Haho Baisilaeli bagimbile luno lwimbo; Suluwa yenywe ishima; igimbilwe; ¹⁸ Ishima yabadabile baulu, Yine ihulilwe na baulu ba batu, Wa mango cha buolo, wa mango chabo. Uhuma luya lwanaganywa bagile Matana; ¹⁹ na uhuma Matana bagile Nahalieli; na uhuma Nahalieli bagile Bamothi; ²⁰ na uhuma Bamothi bagile wibetabeta ya mabala ma Moabu, ndaa na u songo loono lwa Pisga, lilihulolela luubi lwa lwanaganywa. ²¹ Hanyuma Isilaeli guhilile batu bagye wa Sihoni oolo lya Baamoli, na ugana, ²² Upe luhusa nahita mnda sii gyobe; tushigaluwa mibamba ugya m mabala, na ugingila m mabala ma mizabibu tushinywa maadi ma bishima; twihita m ndila gya gyata ka gya oolo, ndaa na byatwihita lugumba lobe. ²³ Alakini Sihoni gushigitabiche uleya gahite u lugumba lwage; haho Sihoni gusimbiche batu bage bose, guchuwile naugya ulwa na Isilaeli mlwanaganywa, guhiile ndaa na Yahasa; gulwile na Isilaeli. ²⁴ Isilaeli gubahagile wa bwigi bwa ahilu, na ugihyilila sii gyage, utula luudi lwa Alnoni ndaa na luudi Yakobi, ndaa na sii gya baana ba Amoni; bululi lugumba lwa baana ba Amini lubele na uoma. ²⁵ Bibyo Isilaeli baguhile mabuga mamo mose ma Baamoli; uya Heshboni, na mabuga mage mose. ²⁶ Bululi Heshboni gibele mbuga gya Sihoni oolo lya Baamoli, mine gubelehulwa na oolo lya Moabu hambele, na umsapa sii gyabe gyose m maboo mage, ndaa na luudi lwa Alnoni. ²⁷ Wa bibyo, baya bene bali hugana wa mihingu bali hugana, Chuno Heshboni, Mbuga gya Sihoni gigubawe na umanyiya iyaka; ²⁸ Bululi, aahya ahuma Heshboni, ahiya Ali na Moabu, Lulindi lwa aahya lwahuma mbuga gya Sihoni; Baulu ba mbuga gyaginyubu Alnoni. ²⁹ Luhanga lubii oli Moabu! Wachimiwa, benywe batu ba Kamoshi; Gwabahunya bawalubaga bage uba basinyi, Na misiha gyage gigye ubucha, Bagye wa Sihoni oolo lya Baamoli. ³⁰ Twabata migwii;Heshboni achimina ndaa na Diboni, Na beswe twagugicha ndaa na Nofa, Gilihuhyila Medeba. ³¹ Bibyo Isilaeli gushamine mnda sii gya Baamili. ³² Hanyuma Musa guhilile batu ugya udinda Yazeli, nabo bawatile mabuga mage, babachingile Baamoli bene babelemo. ³³ Hanyuma bagaluwile na ugya ndila gya Bashani; Ogu oolo lya Bashani gugile ulwa nabo uya Edlie, gee na batu bage bose. ³⁴ Mlume gumsambile Musa, nangu ummona booba; bululi nahuhwa um'biya mnda uboo obe, na batu bage bose, na sii gyage; gogwe wimmita nahi byolimmitile Sihoni oolo lya Baamili, mine gubele mshame Heshboni. ³⁵ Bino bammagile, na baana bage, na batu bage bose, na bashishige wage mtu ata gumwechi; Nabo Baisilaeli bahyilie sii gyage.