¹ Mlume gumsambile Haluni, Gogwe na baana bobe na ndu gya bamasobe hamwechi na gogwe mwiguha usona wa ihana ya ihaha; gogwe na baana bobe mwiguha hamwechi nobe bwibuli bwenyu. ² Na basiwenyu nabo, ibushi ya Lawi, ibushi ya sobe, ubalushe hoka nobe, yulu balungwe nobe, na uugilila; alakini gogwe na baana bobe mubi u mbele wa hema lya mangisiyo. ³ Nabo bigila bulochi bwa alago obe, na bulochi bwa heme lyose; alakini bashihiye hoka na bitundu bya hahaha, ao butambikilo, bashiwe, boo hamwechi nenyu. ⁴ Boo bilungwa nobe, na ugila bulochi bwa hema lya busambeno, wa yulu ya bugichi bose bwa hema; na mgenyi gashimshenene benywe. ⁵ Benywe mwigila bulochi bwa ihana ihaha, na bulochi bwa biyambikilo, hashibe buhuchi yulu ya baana ba Isilaeli iyaka. ⁶ Nene, loola, nibaguhile bashiwenyu hawingi ha baana ba Isilaeli; wenyu benywe m bumana buhelwe Mlume, babugile bugichi bwa hema lya busambeno. ⁷ Gogwe na baana bobe hamwechi nobe mwiusa bu ibuli bwenyu, wa yulu ya ibya yo yose ya butambikilo, na wa yulu ya biya byose byine bili mnda mwa pashiya, benywe mwigila, Namma bu ibuli uba bugichi bwa bumana; na mgenyi minegwishena gwihagwa. ⁸ Hanyuma Mlumr gumsambile Haluni, Loola, nuuha gogwe bulochi bwanyi bwa lutangi lwa uginuna, noo, bitundu byose bya babo baana ba Isilaeli bibagulwe yulu ya Mlume; nuuha gogwe na baana bobe bibyo bitundu yulu ya uya ushinyiwa mauta wenyu, uba kiine gyenyu milumbu. ⁹ Biya bitundu bibi byobe u bya byine bili bihaha abisa, bishichigiwe waahya; tambiko lyabo lyose, noo, lutangi lwabo lose lwa buusu, na lutangi lwabo lwa buubi, na lutangi lwabo lwa abachi lwabitangila, bibi bihaha abisaa wa yulu yobe gogwe na baana bobe. ¹⁰ Wibiya bibyo bibya uba m bihaha abisa; mmumyana ge gese gwiya bibyo bibya; bibi bihaha obe gogwe. ¹¹ Iyaka ino ibya m yobe; luya lutangi lwa uginunywa lwa bumana bwabo, noo, lutangi lwa udigicha lose lwa baana ba Isilaeli; lulo nuuha gogwe, na bawalubaga bobe na misiha gyobe hamwechi nobe, m kiine gyenyu milumbu; mtu ge gese mnda ndu gyage mine guli mmaha gwiiya bibyo. ¹² Mauta mose ma masoga, na zabibu chose cha chisoga mengo ma usola, na bisolwa bya biliwa, mtomwe gwage gwabimma Mlume, nage guuha gogwe byoo. ¹³ Biguma bya bitangi byine byigela u byose mnda sii gyabo, byabimlushisha Mlume, bibi byobe, mtu ge gese mnda ndu gyobe mine guli mmaha gwibiya bibyo bibya. ¹⁴ Ibya yo yose yine igabulwe yulu ya Mlume mnda Isilaeli ibi yobe. ¹⁵ Yose yine yisula gumo, ya bose bene beli na mibili yabimshenenya Mlume utulaya batu ndaa na ya nyama, m yobe; alakini m'buswa gwa mtangi gwa mtu, godogodo wimmogonona, na m'buswa gwa mtangi gwa nyama cha chisoga wimmogonona. ¹⁶ Na baya bene bihogononywa hawingi ha nyama chabo, utula minegwina mwechi gumwechi wimmogonona, nahi byolibiya ugulwa wagyo, wa lusuu lwa shekeli chitano, wa shekeli cha ihana ya ihaha ( nacho m gela maumi mopi). ¹⁷ Alakini m'buswa gw mtangi gwa ng'ombe, ao gwa m'buswa gwa mtangi gwa mmoo, ao m'buswa gwa mtangi gwa mbuchi, ushichihogonona chicho; yulu, m chihaha chicho; wisamuna maashi macho u butambikilo, nuchigya mauta macho uba lutangi lutangilwe wa Mlume waahya, lube mahembwe ma ubenjiwa. ¹⁸ Iyaka nyama chacho chibi chobe gogwe, nahi giya kuu gyumawa, nahi igima ya unyuma ya luubi lwa ulume, ibi yobe. ¹⁹ Lutangi lose lwa Uginunywa lwa bitundu bihaha, baana ba Isialeli lwagishenya wa Mlume, nuuha gogwe na bawalubaga bobe na misiha gyobe hamwechi nobe, m kiine gyenyu gya milumbu; m malagano ma miinyu ma milumbu u mbele wa Mlume wa yulu yobe, na ibushi yobe hamwechi bone. ²⁰ Hanyuma Mlume gumsmbile Haluni, Gogwe ushibi na bhyana mnda sii gyabo, na ushibi na mtala go gose hawungi habo; nene noo mtala gobe, na buhyana bobe, hawingi ha baana ba Isilaeli. ²¹ Na baana ba Lawi, nabaha imwechi ya umi ya baana ba Isilaeli uba buhyana bwabo, bululi ba bubo bugichi bwabalihugila, noo, bubo bugichi bwa itula ya busambeno. ²² Utula hano bino baana ba Isilaeli bashishene wiitula ya busambeno, bashichwe uguha buubi, nabo nuuwa. ²³ Alakini Balawi bigila bugichi bwa hema lya busambeno, nabo noo buguha usona wabo; ano abi alago a milymbu u bibushi byenyu byose, na hawingi ha baana na Isilaeli bashibi na buhyana. ²⁴ Bululi imwechi ya umi ya baana ba Isilaeli, yabitangila uba lutangi lwa uginuna wa Mlume, noo lwandabaha Balawi uba buhyana bwabo; wa bibyo nabasambila, ugana hawingi ha baana ba Isilaeli hashibi na buhyana bo bose. ²⁵ Hanyuma Mlume godogomine na Musa, na umsambila, ²⁶ Widogoma na Balawi tiyaka na ubasambila, Haya hamwiguha imwechi ya umi m maboo ma baana ba Isilaeli yandimmele benywe uhuma wabo ibe buhyana bwenyu, haho noo hamwitangila lutangi lwa uginuna wa Mlume u bibyo, lube imwechi ya umi ya imwechi ya umi. ²⁷ Na lutangi lwenyu lwa uginuna lwibalwa wenyu, nahi matete, biliwa bya lubuga lwa buhulilo, na nahi ugilula wa isunyu ya uswila zabibu. ²⁸ Byokabibyo na benywe mwitngila lutangi lwa uginuna wa Mlume u imwechi ya umi yenyu ya byose, byamwigaa u maboo ma baana ba Isilaeli; wa bibyo mwimma Haluni ibuli lutangi lwa uginuna lwa Mlume. ²⁹ U myaso gyenyu gyose gyamwitangila lutangi lo lose lwa uginuna wa Mlume, lwa mis gyage gyose, iya iba yage yose yine ibiilwe ihaha. ³⁰ Wa yulu ya bibyo wibaambila, Hamwiginuna mmo biya bya misa, noo habyibalwa uba bya Balawi, nahi ulibiya walo lubuga lwa uhulila biliwa, na nahi ubucha m misunyu ya uswila zabibu. ³¹ Benywe mwiya bibyo u bihana byo byose, benywe na batu ba mmadu menyu; bululi m yalambwe enyu yulu ya bugichi bwenyu mnda heme lya busanmbeno. ³² Benywe mushiguha buubi yulu yage, haho hamwihwa uginuna mmo giya misa gyage; alakini mushibyite bunyenye biy bitundu bya bihaha bya baana ba Isilaeli, yulu mushiwe.