¹ Hanyuma Mlume gudogomine na Musa, na umsambila, ² Dogoma na baana ba Isilaeli, na ubasambila, Hamwigigila mnda sii gyenyu gyusha, gyandimma, ³ benywe hamwisimba umtangila Mlume lutangi lwa uchigya, ao lwa nyama gya ushinja, yulu ya uhunya ulibindila wenyu, ao uba m lutangi lwa uhana wa ubenja, ao ha masugu menyu ma ulitucha menemalagilwe, yulu ya ummitila Mlume mahembwe masoga, uba ma ng'ombe uba ma myoo. ⁴ haho guya mine gwitangila tambiko lyage na gamme Mlume lutangi lwa buusu imwechi ya umi ya itanga ya buusu bwa nekuneku bwa busupaganyiwe na imwechi ya buna na ahindi a mauta; ⁵ na ibugu ya lutangi lwa byunywa, imwechi ya buna ya ahindi, wibisumbicha hamwechi na lutangi lwa uchigya, ao nyama gya ushinja, yulu ya mwana ge gese gwa mmoo. ⁶ Ao lwabe mmoo gwa mlume, wilongya lutangi lwa buusu imwechi ya umi nyendo chopi cha itanga ya buusu bwa nekuneku bwa busupaganyiwe na imwechi ya butatu ya ahindi a mauta; ⁷ na yulu ya lutangi lwa byunywa witangila imwechi ya butatu ya ibugu, uba mahembwe wa Mlume. ⁸ Iyaka holilongya ng'ombe gya mlume uba lutangi lwa uchigya, ao uba nyama bya ushinja, yulu ya uhunya ulibindila, ao uba lutangi lwa talala wa Mlume; ⁹ haho holihana, hamwechi na gigyo ng'ombe, lutangi lwa buusu imwechi ya umi ya itanga ya buusu bwa nekuneku bwa busupaganyiwe na ahindi a mauta. ¹⁰ Iyaka witangila ahindi ya ibugu yulu ya lutangi lwa byunywa, u lutangi lwine lutangilwe waahya, lwa mahembwe masoga wa Mlume. ¹¹ Bibyo noo byoliita u ng'ombe gyo gyse, ao wa mmoo go gose gwa mlume, ao mwana mmoo ge gese. ¹² nahi lubalo byaluli lwa chiya chamwilongya, noo byamwiita u gyo gyose, ulamana na lubalo lwacho. ¹³ Bose bene bibuswa wenyu biita bibyo byose ulamana na gugo mlingilisho, wa utangila lutangi waahya, lwa mahembwe wa Mlume. ¹⁴ Iyaka nambo mgenyi gabeshama hamwechi nenyu, ao mtu ge gese gabeshama hamwechi nenyu u bibushi byenyu, nage gulihusimba uhana lutangi lwa uchigya waahya, na mahembwe masiga wa Mlume; nahi byamusugila benywe, nage gwigila bibyo. ¹⁵ Mnda lilyo sumbilo, ubi na alago amwechi wenyu na wa mgenyi mine guli mshame hamwechi nenyu; m yalago a milumbu u bibushi byenyu; nahi benywe byamli, na mgenyi byoka biya u mbelewa Mlume. ¹⁶ gubi m'bindo gumwechi na alago amwechi wenyu na wa mgenyi mine guli mshame hamwechi nenyu. ¹⁷ Hanyuma Mlume gudogomine na Musa, na umsambila, ¹⁸ Dogoma na baana ba Isilaeli, ubasambile, M'begingil mnda sii gyandihummila, ¹⁹ bibyo habi ugana haya hamwiya biliwa bya gigyo sii, mwimshenenya Mlume lutangi lwa uginunywa. ²⁰ Buusu bwenyu bwa butangi bwa see mwishenya mkati gube lutangi lwa uginunywa; byokabiya nahi byamuitile lutangi lwa uginunywa lwa butatilo bwa buhulilo bwa biliwa, noo byamwiginuna; ²¹ Mtomwe gwa buusu bwenyu bwamwimma Mlume lube lutangi lwa uginunywa, u bibushi byenyu byose. ²² Iyaka hamwihulwa, nangu uusa malagano mamo mose Mlume melimsambileMusa, ²³ mamo mose Mlume melimlagile uhitila uboo wa Musa, utulila luya lusugu Mlume lwalilushiche malagano, na hanyuma u bibushi byenyu, ²⁴ bibyo habi, nambo m yuluba wa subisubi, na ata sumbilo lisaba na malanga, bibyo sumbilo lyose bitangila ng'ombe gimwechi gya mlume gya gichogichi uba lutangi lwa uchigya, uba mahembwe masoga wa Mlume, hamwechi na buusu , na lutangi lwa byunywa, nahi alago byaali, na mbuchi gya lunga gimwechi uba lutango lwa buubi. ²⁵ Nayo ibuli yiita usambanya yulu ya sumbilo lyose lya baana ba Isilaeli, nabo bileelelwa; bululi ubele m yuluba, nabo bahuhwa ulusha tambiko lyabo, lutangi lushenyiwe wa Mlume wa ndila gyaahya, na lutangi lwabi lwa buubi iyaka balulusha u mbele wa Mlume yulu ya uluba wabo; ²⁶ nalyo sumbilo lyose lya baana ba Isilaeli bileelellwa, na mgenyi mine guli hushama hamwechi nabo; bululi, bwa mwano gwa babo bose iyo ikoko igiliye wa subisubi, ²⁷ Iyaka nambo mtu gumwechi gabeluba wa subisubi, haho gwitangila mbuchi gimwechi gya ota gya mwaa gumwechi gwa gutangi uba lutangi lwa buubi. ²⁸ Nayo ibuli yiita usambanya wa yulu ya gugo mtu mine gulubile wa subisubi, umbele wa Mlume, yulu ya uita usambanya yulu yage; gwileelelwa. ²⁹ Mubi na m'bindo gumwchi yulu ya guya mine gwaluba wa subisubi, bululi butilwe wenyu hawingi ha baanaba Isilaeli, na ata wa mgenyi mine gulihushama hawingi henyu. ³⁰ Alakini nambo mtu gabeluba wa ulangila, nambo m m'buswa, nambo m mginyi, gugo gwamtuwa Mlume; nagogu mtu gwichingwa koo na batu bage. ³¹ Bululi gwanenuna inywa ya Mlume, na udogya malagano mage; gugo mtu gwichingwa koo, usona wage ubi hegulu hage. ³² Hanyuma mamo mengo baana ba Isilaeli babele mlwanaganywa, bamonine gumwe mtu gulihuongola kunyi lusugu lwa Sabato. ³³ Baya bene bammonine gulihuongola kunyi bamlushishe uli Musa na Haluni, na u umbilo lyose. ³⁴ Nabo bam'biile m'bulogo, yulu ishibele naganywa byeliiswa. ³⁵ Mlume gumsambile Musa, Gugo mtu godogodo gwihagwa; sumbilo lyose lyimta mawe bambuga ga bitula . ³⁶ Bibyo sumbilo lyose limmilile hambuga ha bitula, nabo bamtele mawe, gee nuuwa; nahi Mlue byelimlagile Musa. ³⁷ Hanyuma Mlume gudogomine na Musa, na umsambila, ³⁸ Dogoma na baana ba Isilaeli, na ubalaga ugana bahambe byama bya buluba u masongo ma bichwalaganywa byabo, bibushi byabo byose, iyaka myugana baabiye byama bya buluba u masongo mose ma bichwalaganywa bya langi lya ibule; ³⁹ nayo ibi wenyu m yiiama, yulu mwabe huilingamina, na umaengelecha malagano mose ma Mlume, naumagila; iyaka mushigye nahubagana-hubagana ulamana na mitima gyenyu, na meeso menyu benywe bene, byine byamubele hugya uita masei hata haala; ⁴⁰ yulu mwaoshe uengelecha na ugila malagano manyi mose, nauba bahaha wa Abetcha enyu. ⁴¹ Nene noo Mlume, Abetcha enyu, nimlushishe uhuma mnda sii gya Misili, yulu ya ugana naabe Abetcha enyu; nene noo Mlume, Abetcha enyu.