¹ Sumbilo lyose lisediche madi mabo balilile; batu bahume byosochi buya busugu. ² Hanyuma baana ba Isikaeli bose bamnunine Musa na Haluni; sumbilo lyose libasambile, Byisuna lingye nambo twabawila mnda sii ya Misili, ao byisuba lingye nambo twabawila m guno mgala. ³ Yuluyai Mlume gwatulisha ndaa na gino sii yulu guwe na tuhilu? Baachi betu na baana betu babikole; wi wii! Ati bilingye tuguwile Misili? ⁴ Babasambike, Na tum'biye gumwe gaabe mmata gwa bita, gigiwile Misili. ⁵ Haho Musa na Haluni bagwile m machwi u mbele wa sumbilo lya baana ba Isileli. ⁶ Yoshua mwaana gwa Nuni, na Kalebu mwaana gwa Yefune, bene babele hawingi habo wa ugidinda sii, bagulile bichwalaganywa byabo; ⁷ badogomine, na sumbilo lyose lya baana ba Isilaeli baganine, Giya sii gyine gyatuhitile hawingi hagyo yulu ya ugidinda, m sii gisoga abisa nagya ugagicha. ⁸ Nambo Mlume gwaseelela yulu yetu, gwitugingicha mnda gino sii gatuhe gibe gyetu, nagyo m sii gyina mabele mengi na bui. ⁹ Baange mushim'benge Mlume, ao ubamona booba bashami ba giya sii, bululi boo myiliwa yetu; yulu ihochu yine ibele hegulu habo yahunyiwa, nage Mlume guli hamwechi netu; mshimone booba. ¹⁰ Alakini sumbilo lyose liganine batewe mawe. Hahu ugengeda wa Mlume umoneye hegulu ha itula ya busambeno, u mbele wa baana bose ba Isilaeli. ¹¹ Mlume gum'bidiche Musa, Wi wii! Bano batu binenune nene ata mengo nai? Bashimbwasha ata mengo nai? Inangwa nigilile bisaga biya byose hawingi habo. ¹² Nibahula wa bisumi, na ubahuminya buhyana bwabo, nene niuita ube mmoga gwata, gwine guli na uona ubahima boo. ¹³ Haho Musa gumsambile Mlume, Hene hihulicha Bamisili gugo mwano; bululi gogwe ulushishe bano batu wa uosha obe, uhuma hawingi habo; ¹⁴ hanyuma bibaambila bashami ba gino sii; bahuliche ugana gogwe Mlume uli hawingi ha bano batu; yulu, gogwe, Mlume usumoneya yenyi wa yenyi, natimba lyobe lyagimana hegulu habo, hanyuma gogwe wabalombwela hambele habo, mnda ihanda ya timba mengo ma chuba na mnda ihanda yaahya mengo ma busugu. ¹⁵ Bino nambo gogwe ubebahaga bano batu nahi uhaga mtu gumwechi, bibyo mioga hagyihulicha mwano gwa punda chobe habimona na ugana. ¹⁶ M waibalo gee Mlume gusaosha ubahyicha bano batu naubabiwa mnda sii gyelibalahile paa, mndi wa yulu ya bibyo nii gwabahagila mgala. ¹⁷ Mndi bino nihutendelela abisa, uosha wa Mlumyanyi na ube wata, nahi byoliganine, holidogomine, ¹⁸ Mlume m mmochu gwa sungu, m gwa yano iingi, gusuleelela usona na ugugila, nage gwishimmita gwina abachi uba gushi na uluba wa ndila gyo gyose; mine gusubabalila baana usona wa bamasabo, utula ibushi ya butatu ndaa naya buna. ¹⁹ Ibumbu ino, uleelele usona wa bano batu, nahi bili bwata bwa yano yobe byaiili, nahi byolibaleelele bano batu, utula uya Misili ndaa na aya bino. ²⁰ Mlume guganine, nabaleelela nahi bili inywa yobe byaili; ²¹ alakini chigilwe gyanyi; nahi byandi, iyaka nambo ino ibaloo igima byayigilula na ugengeda wa Mlume; ²² bululi bano batu bose, benebaminine ugengeda wanyi na bisaga byanyi, byandigiile uya Misili, na m'ya mlwanaganywa, hamwechi na bibyo baatonda chino nyendo umi, na bashibapuliche liidi lyanyi; ²³ chigilwe gyanyi bashigimona giya sii gyandibalahile bamasabo, na ata hawingi ha baya bose bene bambedule hashi mine gwigimona; ²⁴ alakini mgichi gwanyi Kalebu, bululigubele na luhuda lunge lushi-lushi mnda mwage, nage gukudagile wa mtima gose, nimmyich gee mnda giya sii gyeligingile; na ibushi yage yigihyilila. ²⁵ Bino Mmameleki na Mkanaani bishama u bibetabeta; mmeshi galuwe, mwagyi mlwanaganywa wa ndila gilihugya u Bahali lya Shamu. ²⁶ Hanyuma Mlume gudogomine na Musa na Haluni, na ubasambila, ²⁷ Wi wii! Nilitolelecha ata mengo nai na lino sumbilolya lidogu lili huununila? Nahulicha ununa wa baana ba Isilaeli, bene bali huununila. ²⁸ Basambile, Byandi na mwego, Mlume gwagana, winene wanyi nahi benywe byamudogomine m matu mwanyi, noo byandimgilila benywe; ²⁹ bitumba byenyu byigwa mnda guno mgala, na bose bebe babalilwehawingi henyu, nahi uongola lubalo lwenyu, utula bene babele na myaa maumi mabili na uhima, baya baanunile, ³⁰ winene wanyi benywe mishigingila nda giya sii. gyine gyandi ginunile uboo wanyi ugana nimshamya mwagili, m Kalebu mwaana gwa Yefuni, na Yoshua mwaana gwa Nuni ka. ³¹ Alakini baana benyu, bene bamuganine babi kole, noo bandihyiicha na ubabiya mnda giya sii, nabo bigimana sii gyine gyamuhaninye. ³² Alakini yulu ya mwano gwenyu, bitumba byenyu byigwa mnda guno mgala. ³³ Hanyuma baana benyu babi baushi mnda lwanaganywa mengo ma myaa maumi mana nabo biswala mchigo gwa masei manyu, ndaa na byihwa ugwa bitumba byenyu byagichimiwa mlwanaganywa. ³⁴ Wa lubalo lwa maya masugu mene mamudindile giya sii, noo, masugu maumi mana lusugu lumwechi luli hubalwa mwaa gugima, mwiguha usona wenyu, noo myaa maumi mana, bemywe mwimana uhalingana wanyi. ³⁵ Nene Mlue nahuhwa ugana, chigilwe gyanyi, noo byandiligilila sumbilo usona uno ose, bene basumbile yulu yanyi; bidigwa mnda lino lele, nao noo wine Wabiwa. ³⁶ Hanyuma babo batu, bene musa belitumine udinda giya sii, bene bagiwile, na uita sumbilo lyose ununa, baya balushishe mwano gusone gwa sii, ³⁷ babo batu balushishe mwano gusone gwa sii bawile na bisumi u meeso ma Mlume. ³⁸ Alakini Yoshua mwaana gwa Nuni, na Kalebu mwaana gwa Yefune, bashigele na mwego hawingi ha baya bene bagile udinda giya sii. ³⁹ Hanyuma Musa gubsambile baana ba Isileli bose bino binywa, na bao batu babiile malilo abisa. ⁴⁰ Baginywine halwelo, baselile hagulu ha loono ndaa na mpala loono, baganine, Loolwe, beswe tuli hano, beswe twisela nuugya ihana yine itulagile Mlume; bululi twagila buubi. ⁴¹ Musa gubasambile, Yulu yai benywe mwagugicha malagano ma Mlume? Bululi iyo ikoko ishigililwa. ⁴² Mushisele, bululi Mlume gushi hawingi henyu; mushihulwe na ugwa u mbele wa tumangu twenyu. ⁴³ Bululu Mmameleki na Mkanaani bali u mbele wenyu,benywe mwigwa wa ahilu, wa ibalo mwagiwila u nyuma musammudagila Mlume, yulu ya bibyo Mlume gushibi hamwechi nenyu. ⁴⁴ Alakini batondile usela u loono na uhiya mpala loono; ata bibyo lindo lya alago lishihumine uya ubushamo, ata Musa nage gushihumine. ⁴⁵ Haho Mmameleki, na Mkanaani bene babele hushama uya u loono, basalile, babahulile n ubagwisha, ndaa na uhyila Holma.