¹ Hanyuma Mlume gudogomine na Musa, gumsambile, ² Hila batu, yulu bagye ugidinda sii gya Kanaani, gyandibaha baana ba Isilaeli; ulamana na mioga gya bamasabo mtu gumwechi, guya mtu gabe mmosobu gwa iya ilongo. ³ Haho Musa gubahilile uuma mnda mgala gwa Palni nahi byelilagilwe na Mlume; bose babele m miswe gya baana ba Isilaeli. ⁴ Na machina mabo noo mano; Leubeni, Shamua mwaana gwa Zakuli. ⁵ M milongo ya Simeoni, Shafati mwaana gwa Holi. ⁶ M milongo ya Yuda, Kalebu mwaana gwa Yefuni. ⁷ M milongo ya Isakali, Igali mwaana gwa Yusufu. ⁸ M milongo ya Eflaimu, Hoshea mwaana gwa Nuni. ⁹ M milongo ya Benyamini, Palti mwaana gwa Lafu. ¹⁰ M milongo ya Zabuloni, Gadieli mwaana gwa Sodi. ¹¹ M milongo ya Yusufu, noo, ya ilongo ya Manase, Gadi mwaana gwa Susi. ¹² M mlongo ya Danim Amieli mwaana gwa Gemali. ¹³ M milongo ya Asheli, Sethuli mwaana gwa Mikaeli. ¹⁴ M milongo ya Naftali, Nabi mwaanagwa Wofsi. ¹⁵ M milongo ya Gadi, Geueli mwaana gwa Maki. ¹⁶ Mamo noo machina ma babo btu bene batuminywe na Musa bagye udinda sii, Na guya Hoshea mwana gwa Nuni, Musa gumgitile china lyage Yoshua. ¹⁷ Musa gubatumine yulu bagidinde sii gya Kanaani, gubasambile, Chinywe bino uya Negebu mwachine u koono, ¹⁸ mwalingamine sii m gwa wii; na batu bene bali mnda mwagyo, ugana nambo bili na uoma au mtulema, ugana nambo m bacho ao nambo m beengi; ¹⁹ na sii gyabali bashame nambo m gisoga ao m mgigugichu; nambo balibashame m bitula ao mmigumbo; ²⁰ nagyo sii m gya wii, ao m sii gya ginagu ao gya ndala, nambo m gya bisowa ao nangu. Mube na mitima gyata, mwalushe biguma bya sii. Bibyo maya mengo mabele mengo ma zabibu cha chitangi utula ugela. ²¹ Haho baselile ugidinda sii utula mgala gwa Sini ndaa na Lehobu, ndaa na ugingila Hamathi. ²² Baselile Negebu, bahiile Hebloni; na Ahimani, na Sheshai, na Tlmai, na baana ba Anaki, babele uya. Nagyo Hebloni gigubailwe myaa njwii hambele ha Soali gya Misili. ²³ Bahiile ibetabeta ya Eshkoli, na na uya bagedile tabi lyine lili na iama imwechi ya buluba bwa zabibu, baliswalile u mtambwa hawingi ha batu babili; balushishe mahu na adibi ²⁴ Iya ibetabeta igitilwe ibetabeta ya Eshkoli bululi bwa iyo iama ya buluba bwabaswalile uhuma haya baana ba Isilaeli. ²⁵ Bagiwile hanyuma ha udinda sii, hanyuma masugu maumi mana. ²⁶ Bagiwile bahiile wa Musa, na wa Haluni, na u sumbilo lyose lya baana ba Isilaeli, mnda mgala gwa Palani, uya Kadeshi; babalushishe mwano, boo na sumbilo lyose, babamoninye biguma bya giya sii. ²⁷ Babasambile baganine, Tuhiile giya sii gyine gyolitutumine, wa chigilwe gyage, m sii gya gigiluchu mabele na bui, na bino noo biguma byagyo. ²⁸ Alakini batu bene bali bashame mwagili bina uoma, na mabuga mabo mina migumbo, namo m mamata abisa; na hamwechi na bibyo tubamonine baana ba Anaki uya. ²⁹ Ameleki guli mshame mnda sii gya Negebu; na Mmiti, na Myebusi, na Mmamoli m'bashame u koono, na Mkanaani gulimshame hoka na bahali; na mibamba mwa luudi Yolodani. ³⁰ Kalebu gubaleiche batu mdodo u mbele wa Musa, guganine, Na tugye ka, twigihyilila; yulu twiosha ugihima hashi ata adugwa. ³¹ Alakini baya batu bene hamwechi bagile nage baganine, Tushiosha ugya tulwe na baya batu; bululi bali na uoma utuhima bweswe. ³² babalushishe baana ba Isilaeli mwano gwa gubi gwa giya sii gyabadindile, baganine, Giya sii gyine gyatwahita hawingi hagyo ugidinda, m sii gyine gisuya batu bene bali bagishamine; na batu bose bene batumonine mnda mwagyo m batu balahu uhima abisa. ³³ Hanyuma, uya tubamonine Banefili, baana ba Anaki, bene babutilwe u Banefili; tulimonine bichuli-chuli byetu bya mwego uba nahi panji; nabo noo byabatumonine beswe.