¹ Manyuma Miliamu na Haluni bamdogomene Musa yulu ya ibalo ya mmachana gwa Mkushi gwelibele mgonde; yulu, gubele mgonde mmachana gwa Mkushi. ² Baganine, Wi wii! M winene Mlume gwadogoma na Musaka? Gushidogomine na beswe nabo? Mlume guhuliche binywa byabo. ³ Haho gugo mtu, gugo Musa, gubele mmochu abisa uhima batu bose bene babele hegulu ha gino sii. ⁴ Wa ubabula Mlume gudogomine na Musa, na Haluni na Miliamu, na ubasambila, Tobowe hambuga benywe batatu, mugye witulaya busambeno. Bibyo babo batatu batobowile hambuga. ⁵ Mlume gusalile mnda ihanda ya timba gugimene haya ha mchango gwa Hema, gubagitileHaluni na Miliamu, nabo batobowile hambuga bose babili. ⁶ Hanyuma gubasambile, Hulichiwe bino binywa byanyi; Nambo habi mbuwa hawingi henyu, Nene, Mlume, niliununa wage wa ndila gya malo. ⁷ Bishi bibyo wa mgichi gwanyi Musa; Gee m m'bwilile mnda ndo gyanyi gyose; ⁸ Wage nene nidogoma nage anywa wa anywa, Noo, wa hululu ushi wa mihingu; Na byeeli Mlume gee gwiimona. Yulu yai benywe musamona booba, Umdogomena mgichi gwanyi, gugo Musa? ⁹ Sungu cha Mlume chiselile hegulu habo; nage nuugya lwage. ¹⁰ Hanyuma lilyo timba lyo nuuhuma haya hegulu ha hema; na loola, Miliamu gee nuba na bushindo bwa buhaha nahi imundimundi; Haluni gumlolile Miliamu, na loola, guli na bushondo. ¹¹ Hanyuma Haluni gumsambile Musa, Ee mlumyanyi nihuutendelela abisa ushitubiile buubi hegulu hetu bululi twagila gya buhugi, na ugila buubi. ¹² Ibumbu ino, gashibe nahi gumwe gwa mmube, mine nyama cha m'bili gwage nahi chachilibe haya hesuhuma mnda mwa mnage. ¹³ Musa gumlilile Mlume, guganine, Mmonye, Ee Abetcha, ibumbu ino abisa. ¹⁴ Mluje gumsambile Musa, Wi wii! Nambo sge gwabamsulila mate u yenyi ka, gusabamona abule mengo ma masugu njwii? Na uhambwa hambuga ha bitula masugu njwii, hanyuma ha bibyo nulushiwa iyaka mnda. ¹⁵ Haho Miliamu guhambile hambuga ha bitula mengo ma masugu njwii; ata na batu bashigyatile ndaa na biya Miliamu byeligingichiwe iyaka mnda. ¹⁶ Hanyuma ha bibyo batu bachuwile uhuma Haselothi, bashamine iyaka mnda mgala gwa Palani.