¹ Hanyuma babo batu babele nahi bali hununa, balihugana bya bisone u matu ma Mlume; Mlume helihliche bibyo, sungu chage chiselile; na aahya a Mlume alamine hawingi habo, achigiche u ng'umba cha bisula ba bitula, ² Haho batu bamlilille Musa; nage Musa nuumsaba Mlume, na aya aahya nuuchima. ³ China lya iyo ihana noo ugiswa Tabela; bululu ao aahya a Mlume alamine hawingi habo. ⁴ Hanyuma sumbilo lya batu bene balamene nabo bene babele hawingi habo, bawatilwe na itima; baana ba Isilaeli nabo balilile iyaka, baganine, M nanyi gwituha nyama iyaka tuye? ⁵ Tulihuengelecha swii chatubele huya uya Misili bunene; na biboga, na tuundu, na iliwe na lengalenga, na bitungulu na bitungulu sumu; ⁶ akalini mitima gyetu gyahubagana; hashi ibya yo yose; hashi ibya ya uudagila nambo gino mana ka. ⁷ Na gigyo mana gibele nahi matete ma mabele na umoneya nahi bedola. ⁸ Batu bachunguluwe-chunguluwe na uongola, hanyuma bahelile u mawe ma uhelela, ao umaswa mnda bisungu, hanyuma noo ubicha mngeso, nuulongya mkati; na saa gyage gibele na saa gya mauta ma mahya. ⁹ Imundimundi haiwilile bitula mengo ma busugu, gigyo mana gisalile hamwechi nayo. ¹⁰ Haho Musa gubahuliche batu balihulila bilongo byabo byose, mtu ge gese ha mchango gwa itula yage; na sungu cha Mlume chiselile abisa; Musa nage guchigililwe. ¹¹ Musa gumsambile Mlume, Yulu yai wangilila nene mgichi gobe uno usona? Yulu yai nisahewa keene u meeso mobe, na uuswiiche mchigo gwa batu bano bose hegulu hanyi? ¹² Wi wii! M nene nibatungiche magumo bano batu bose wi wii! M nene nibabutile, bichwe gogwe uusambila, Bino, ubabeye u yaali yobe, mlingilisho gwa shibana mine gulihubeya uswala mwaana mine guli hukoka, ugye nabo ndaa na sii gyine gyolibalahila bamasabo? ¹³ Nihunya uhi nyama cha ubaha batu bano bose? Bululi bali hundilila, balihugana, Tuhe nyama, tuye, ¹⁴ Nene nishinaosha ubaswala batu bano bose nene bushima, bululi m mchigo gwa bushito abisa gwa upima. ¹⁵ Na nambo ubengila bino, nihuusaba upagile koo, na nambo nahewa yano u mbele wa meeso mobe; nene nashimone ano adugwa anyi. ¹⁶ Hanyuma Mlume gumsambile Musa; Kungolele batu maumi njwii, hawingi ha baana ba Isilaeli, bene boligodo gogwe ugana noo baulu ba bano batu, na baata ba mabuga hegulu habo; ubalushe ndaa na u hema lya busambeno, baagimane uya hamwechi nobe. ¹⁷ Nene nisala nadogome nobe uya, nene niguha ibaa ya luhuda lwine lulihegulu hobe na ulubiya hegulu habo; nabo biswala mchigo gwa bano batu hamwechi nobe, yulu ushiguswale gogwe buchima. ¹⁸ Hanyuma wabasambile bano batu, Lihahachiwe bichuli-chuli byenyu bya mwego mmeshi hambele bushinaya, benywe mwiiya nyama; bululi mwalila m matu ma Mlume, muganine, M nanyi gwituha nyama, tuye? Bululi uya Misili tubele na byose. Bino a yulu ya bibyo Mlume gwimma nyama, na benywe mwiiya. ¹⁹ Mushichiya lusugu lumwchi, ao masugu mabili, ao masugu matano, ao masugu umi, ao masugu maumi mopi; ²⁰ alakini mwichiya mengo ma mwechi gugima, ndaa na haya nyama hachitula ummuma mnda tulongelonge twa mihyembe gyenyu, na benywe mwilisusula yulu mwammanya Mlume mine guli hawingi henyu, na ulila u mbele wage, muganine, Tuhumine Misili yulu ya ibalo nai? ²¹ Musa guganine, Batu bano bene bandi hawingi habo, m batu sambi mtuba uki bene balihugyata na magulu; gogwe uganine, Nibaha nyama, yulu baaye mengo ma mwechi gugima. ²² Wi wii! Migima gya myoo na gya ng'ombe gyishinjiwa yulu yabo, bululi chibawilile? Ao swii chose cha m'bahali chiongolwa hamwechi wa yulu yabo, yulu chibawilile? ²³ Mlume gumsambile Musa, Wi wii! Uboo wa Mlume waswiha? Bino wimanaugana inywa yanyi yiwilila oli, ao nangu. ²⁴ Musa guhumine, gubasambila batu binywa bya Mlume; gubasumbiche batu maumi njwii hawingi ha baulu na batu, gubabiile uchunguluwa hema. ²⁵ Haho Mlume gusalile mnda liya timba, gudogomine nage, guguhile ibaa ya luhuda lwine lubele hegulu ha Musa, na ulubiya hegulu ha baya baulu maumi njwii; haya hene habasalile luya luhuda, batulile ubuwa, alakini bashiitilebibyo iyaka lunge lwendo. ²⁶ Alakini batu babili bashigele u bitula, china lya gwa mtangi gugitilwe Eldadi na china lya gwa bubili gugitilwe Medadi; naluya luhuda lubasalile; nabo babele hawingi ha baya bene bagolilwe, alakini bashigimene ugya u liya hema; nabo babuwile uya u bitula. ²⁷ Gumwe mmwalubaga guhingila abilo, gugile umsambila Musa, guganine, Eldadi na Medadi bali hubuwa uya ubitula. ²⁸ Yoshua mwaanagwa Nuni, mgichi gwa Musa utula buwalubaga bwage, gugaile guganine, Ee mlumyanyi Musa, ubaambile, ²⁹ Musa gumsambile, Wi wii! Wina buwa yulu yanyi; byisuba lingye batu bose ba Mlume bisuba ba mbuwa na nambo Mlume gwabababiya luhuda lwage. ³⁰ Hanyuma Musa gugile ugingila uyau bitula, gee na baya baulu ba Baisilaeli. ³¹ Hanyuma mnaga gututile uhuma wa Mlume, nago gulushiche kwali uhuma luubi lwa bahali, nago gubashigile chigwe hoka na bitula, nahi lulingo lwa lwendo lwa lusugu lumwechi lulu luubi, na nahi lulingo lwa lwendo lwa lusugu lumwechi lulu luubi, ubachunguluwa, nachi chibele mtala gwa lulingo lwa magulu mabili ugya hegulu uhuma hasi. ³² Batu bagile chuba lilyo lyose, na busugu bubo bose,nalusugu lwa bubili lose, uchiongola kwali; guya mine guongole chicho uhima beenage guongole nahi bitanga umi; nabo bachiganyiye chose mibamba mwa bitula uchunguluwa ngubi chose. ³³ Hanyuma ha haho nyama chilibele m meeno mabo, bashinachitauna, sungu cha Mlume chisalile hegulu ha batu, Mlume gubahulile batu wa bihulo byata. ³⁴ China lya iya ihana igitilwe Kibloth-hataava; bululi, haya noo habachiile baya batu bene babele na itima. ³⁵ Uhuma haya Kibloth-hataava batu bagyatile ugya Haselothi; bashamine uya Haselothi.