¹ Biino bano noo babiile byaala; Nehemia, mmata gwa mbuga, mwanagwa Hakania,na Sedekia; ² Selaya. Azalia, Yelemia; ³ Pashuli, Amalia, Malkiya; ⁴ Hamshi, Shekania, Maluki; ⁵ Halimu, Melemothi, Obadia; ⁶ Daniele, Ginethoni, Baluku, ⁷ Meshulamu, Abiya, Miyamini,; ⁸ Maazia, Biggai, Shemeya; babo noo babele ba bibuli. ⁹ Na Balawi; noo, Yeshua,mwaana gwa Azania, Binui wa baana ba Henadadi, Kadmieli; ¹⁰ na bashiwabo, Shebania, Hodia, Kelita, Pelaya, Hanani; ¹¹ Mika, Lehobu, Hashabia; ¹² Zakuli, Shelebia, Shebania; ¹³ Hodia, Bani, Beninu; ¹⁴ Na bauulu ba batu; Paloshi, Pahath-Moabu, Elamu, Zatu, Bani; ¹⁵ Buni, Azgadi, Bebai; ¹⁶ Adonikamu, Bigwai, Adini; ¹⁷ Ateli, Hezakia, Azuli; ¹⁸ Hodai, Hashumu, Besai; ¹⁹ Halifu, Anathothi, Nobai; ²⁰ Magpiashi, Meshulamu, Hezili; ²¹ Meshezabeli, Sadoki, Yadua; ²² Pelatia, Hanania, Anaya; ²³ Hoshea, Hanania, Ashubu; ²⁴ Haloheshi, Pilha, Shobeki; ²⁵ Lehumu, Hashabna, Maaseya; ²⁶ Ahia, Hanani,Anani; ²⁷ Maluku, Halimu, na Baana. ²⁸ Na batu bene bashigele, bibuli, Balwi, bagimenyi ba umichango, bagimbi, Babachi ba batu, na baya bose bane balibaguli hawingi ha batu ba sii yulu ya m'bindi gwa Abetcha; baachi babi na baana babo, na misiha gyabo, kila guya gese mine gwina malango na lwenyi; ²⁹ balamene na bashiwabo, bauulu babo, nabo bagingile mnda buloga na ulilahicha, ugana bigyata mnda m'bindo gwa Abetcha, gwine guhanenywe mnda uboo wa Musa, mgichi gwa Abetcha, na ugulola,na ugugila, alago ose a MLUME, Mlume gwetu, na uonona wage, na m'bindo gwage. ³⁰ na tushibagonje batu ba gino sii misiha gyetu, na nangu ugondele bawalubaga betu misiha gyabo; ³¹ iyaka batu ba gino sii babehisha bya udagulanya, biliwa byobyose, lusugu lwa sabato, ata lusugu lwa luhaha; iyaka ugana tuguleye mwaa gwa njwii, na usaba gyabatugambile yoyose. ³² Iyaka tulibiile malagano, uhana mlambu mwaa wa mwaa ibaa ya butatu ya shekeli yulu ya bugichi bwa ndu gya Abetcha etu; ³³ wa mikati gwa umonya, na wa lutangi lwa busu bwa masugu mose, na wa lutangi lwa uchigya lwa masugu mose, lwa sabato, nalwa lusugulwa mwechi gwa abalu, na lusugu lwa ulitucha, iyaka wa bitundu biya bihaha, na lutangi lwa buubi, lwa ubaitila Baisilaeli usambanya, na wa yulu ya migilogyose gya ndu gya Abetcha etu. ³⁴ Hanyuma tutele luti, bibuli, na Balawi, na batu, yulu ya lutangi lwa kunyi, bululi bwa uchihila u ndu gya Abetcha etu, ulamana na bibushi bya bamasetu, wa mengo mene maganinywe, mwaa wa mwaa, uhota aahya u butambikilo bwa MLUME, Abetcha etu, nahi byabigolilwe mnda m'bindo. ³⁵ iyaka uhila mtomwe gwa bisolaganywa byetu, na mtomwe gwa biguma byose bya miogagyose gya miti. mwaa wa mwaa, u ndu gya MLUME. ³⁶ iyaka bubele bose bwa bawalubaga bwa batu, na ba nyama chetu, nahi byabigolilwe mnda m'bindo, na babuswa ba ng'ombe chetu na miyoo gyetu, yulu ya ubalusha mnda ndu gya Abetcha etu, u bibuli byine bili hugila mnda ndu gya Abetcha etu; ³⁷ iyaka tulushe mtomwe gwa busu bwetu, na lutangi lwetu lwa uginuna,na na biguma bya mioga gyose gya miti, byunywa, na mauta, u bibuli u byumba bya ndu gya Abetcha etu; na ibaa ya umi ya bilimwaganywa byetu uhila u Balawi; bululi babo Balawi basuguha ibaa ya umi mmabuga mose bya ulima wetu. ³⁸ Nayo ibuli, mwaanagwa Haluni, gubiho hamwechi na Mlawi, higuha Mlawi ibaa ya umi; nabo Balawi bihila ibaa ya umi uiya ibaa ya umi yabo mnda ndu ya Abetcha etu, mbyumba bya mndu gya lindo. ³⁹ Bululi baana ba Isilaeli na baanaba Lawi bihila lutangi lwa uginuna lwa biguma na matete, na byunywa, na mauta, mbyumba, yulu noo muli bitundu btya bihaha, na bibuli bagichi, na bagemenyi ba umichango, na bagimbi; na beswe tushigileya ndu gya Abetcha etu