¹ MLUME gudogomine na Musa, na umsambila; ² Mguhe Haluni, na baana bage hamwechi nage, na biya bichwalaganywa na mauta ma ushinya, na ng'ombe gya mlume gya lutangi lwa buubi, na miyoo gibili gya milume, na ahwaba a mikati gishi gyagibiwe mshimi; ³ hanyuma wasumbiche sumbilo lyose haya ha mchango gwa hema lya busambeno. ⁴ Haho Musa gugilile nahi byelisambilwe na MLUME; na lilyo sumbilo lisumbile ha mchango gwa hema lya busambeno. ⁵ Musa nuusambila sumbilo, Inywa ilagilwe na MLUME ugana igilwe, noo ino. ⁶ Bibyo Musa gulushiche Haluni na baana bage, gubagogila na maadi. ⁷ Hanyuma gumchwiiche Haluni liya kanjo, na ummamba mchingo, na uumchwiya ichibabo, na uuchwiya naivela, na ummamba guya mchingo gwa mgilo gwa bwiino gwa naivela na ummamba naivela wa gugo mchingo. ⁸ Hanyuma gum'biile aya ahwaba uyaali; gubiile maya mawe ma Ulimu (Ehe) na Thumimu (Nangu) wa aya ahwaba a uyaali. ⁹ Gum'bwilile na luya lushungi lwa umswe gwage, luubi lwa uyenyi, buwilile iya ihindi ya nolo, liya sala lya lihaha; nahi MLUME byelimlagile Musa. ¹⁰ Hanyuma Musa guguhile maya mauta ma mahaha na umshinya, gushininye bushamo mauta, na byose byine bibelemo, na ubihahacha. ¹¹ Hanyuma guhongolwele maya mauta hegulu ha butambikilo nyendo njwii, na ushinya butambikilo mauta na bitundu gyabo byose, na mbiliga na bushamo bwage, yulu ya ubihahacha. ¹² Hanyuma guhongolwele mauta maya ma ushinya umswe gwa Haluni, na umshinya mauta, yulu gammahache. ¹³ Hanyuma Musa gubalushiche baana ba Haluni, na ubachwiya makanjo, na ubahamba michingo, na ubawila shungi; nahi MLUME byelimlagile Musa. ¹⁴ Hanyuma gulushiche ng'ombe gya mlume gya lutangi lwa buubi; Haluni na baana bage babiile maboo mabo hegulu ha mswe gwa gigyo ng'ombe gya lutangi lwa buubi. ¹⁵ Hanyuma gugishinjiche; na Musa nuuguha maashi magyo, numabiya u masunga ma butambikilo ngubi chose na mnywe gwage, nuuhahacha butambikilo, hanyuma gugesile maya maashi hasi ha butambikilo, na ubuhahacha, yulu gaite usmbanya yulu yabo. ¹⁶ Hanyumaguguhila mauta mose mene mabele u byamnda mwagyo, na lwinga lwine lubele wiinyi, na pigu chagyo chibili, na mauta mage, Musa gumachigichehegulu ha butambikilo. ¹⁷ Ata bibyo ng'ombe gyogyine, na ibambi yagyo, na nyma chagyo, na tubi twagyo, gubichigiche na aahya hambuga ha bushamo; byoka biya nahi MLUME byelimlagile Musa. ¹⁸ Hanyuma gugusheninye guya mmoo gwa mlume gwa lutangi lwa uchigya; Haluni na baana bage babiile maboo mabo umswegwa gugo mmoo. ¹⁹ Hanyuma gee nuushinja; na Musa nuuhongolola maashi mago u butambikilo ngubi chose. ²⁰ Hanyuma gugedila mmoo bihindi byage; Musa guchigiche mswee , na biya bihindi na mauta. ²¹ Hanyuma gugogile byamnda na bigima byage na maadi; Musa guguchigiche guya mmoo gose hegulu ha butambikilo; gubele m lutangi lwa uchigya wa abongelela a ubenja; gubele m lutangi luchenyiwe wa MLUME wa ndila gyaahya; nahi MLUME byelimlagile Musa. ²² Hanyuma gwishenya guya gunge mmoo gwa bubili, gugo mmoo gwa ubabagula yulu ya MLUME; na Haluni na baana bage babiile maboo mabo u mswee gwa gugo mmoo. ²³ Hanyuma gugushinjiche; Musa guguhile mamwe maashi mago, na ubiya usongo gya liitu lya ulumu lya Haluni, na u yaala yage ya minywe gya uboo wa ulume, na u yaala yage ya minywe gya ugulu wa ulume. ²⁴ Hanyuma gubahyiiche baana ba Haluni, na Musa gubabiile maya maashi u masingo ma matu ma luubi lwa ulume, na u byaala bya minywe gya maboo ma ulume, na u byaala minywe gya magulu ma ulume; hanyuma Musa huhongolole maya maashi ngubi chose cha butambikilo. ²⁵ Hanyuma guguhile maya mauta, na mmila gwine guli na mauta, na mauta mose mene mabele u byamnda, na lwinga lwine lubele wiinyi, napigu chage chopi,na mauta mage, na igima ya ugulu ya luubi lwa ulume. ²⁶ hanyuma mnda ahyaba a mikati gishi gyagibiwe mshimi, ene abelehaya ha mbele ha MLUME, guguhile mkati gumwechi gushi gwagubiwe mshimi, na mkati gumwechi gwine gulongiwe ma mauta na mkati gumwechi gwa gugumu gwa lubambasali, gubibiile hegulu ha mauta na hegulu ha iyo igima ya ugulu ya luubi lwa ulume. ²⁷ hanyuma gubiile byose mmaboo ma Haluni, na mnda maboo ma baana bage, na ubimaa ubo na ubo bibe lutangi lwa umaa u mbele wa MLUME. ²⁸ Hanhuma Musa gubiguhile iyaka mmaboo mabo, na ubichigya hegulu ha butambikilo, hegulu ha lulo lutangi lwa uchugya bibele bya ubabagula yuluya MLUME, noo abongelela asoga; gibele nyama gishenyiwe wa MLUME wa ndila gyaahya. ²⁹ Hanyuma Musa guguhile iya yaali, guimaile ubo na ubo, ibe lutangi lwa umaa u mbele wa MLUME; noo ibaa ya Musa u gugo mmoo gwa mlume gwa ugagulwa yulu ya MLUME; nahi MLUME byelimlagile Musa. ³⁰ Hanyuma Musa guguhile mamwe mauta ma ushinya, na mamwe maashi mene mabele haya hegulu ha butambikilo, na umshinya mo Haluni, u bichwalaganywa byage, na baana bage, u bichwalaganywa byabo, hamwechi nage, gummaheche Haluni, na bichwalaganywa byage, na baana bage, na bichwalaganywa bya baana bage, hamwechi nage. ³¹ Hanyuma Musa gumsambile Haluni na baana bage, Bichiwe chicho nyama ha mchango gwa heme lya busambeno; mwagiya hokahaya, na mikati giya gili mnda aya ahyaba a ubabagula yulu ya MLUME, nahi byandilagilwe ugana, Haluni na baana bage bigiya. ³² Nayo yine yishigala u gigyo nyma na mikati mwiichigya waahya. ³³ Na mushitobowe hambuga ha mchango gwa hema lya busambeno wa mengo ma masugu njwii, ndaa na masugu menyu ma ubagulwa wa MLUME hamiwilila; bululi gwim'biya mengo ma masugu njwii. ³⁴ Byoka biya nahi byabigiliya lusugu lwa lino, noo bibyo bilagile MLUME ugilwa, yulu ya ugila usambanya bululi bwenyu. ³⁵ Benywe mwisham ha mchango gwa heme lya busambeno mengo ma masgu njwii mchuba na busugu, na bulochi bwa ulolelabya MLUME yulu ya ugana mushiwe; bululi bibyo noo byandilagilwe. ³⁶ Haho Haluni na baana bage bagile bihisho bibyo byose MLUME byelilagile wa uboo wa Musa.