¹ Na m'bindo gwa lulolutangi lwa abachi noo luno; ii luhaha abisa. ² Bilushinja lutangilwa abachi hokahaya hene habasushinjicha lutangi lwa uchigiwa; na maashi malo gwimahongolola u butambikilo ngubi chose. ³ U lulo lutangi gwishenya mauta malo mose; noo, mmila gwage gwine guli na mauta, na mauta mene mali mawile byamnda byose, ⁴ na pigu chage chopi, na mauta ma mawatane nacho, mene mali hoka nalubunda lwagyo, na lwinga lwine luli koha na iinyi, hamwechi na pigu chage chopi, bibyo byose gwibihunya. ⁵ na ibuli yibichigya hegulu ha butambikilo, uba lutangi lwa MLUME wa ndila gyaahya; noo lutangi lwa abachi. ⁶ Mtu ge gese mmanga gw bibuli gwiiya u lulolutangi; lwiliwa ha ihana ya ihaha; bululi ii luhaha abisa. ⁷ Nahi lulolutangilwa buubi byaluli, na lutangi lwa abachi byoka bibyo; m'bindo gwage mgumwechi; iyo ibuli yine ilihuita usambanya wa luli, noo gubi nalo. ⁸ Iyakaibuli yine yishenya lutangi lwa uchigyalwa mtu ge gese, iyoibuli yiguha gabe nayo iyo ibambi ya gigyo nyama gya lutangi lwa uchigya lwine lwelisheninye. ⁹ Na lutangilo lose lwa buusu luchelilwe mmiginga, nabyose byine bilongechiwe mlweso, ao mmiangilo, byose bibi bya iyo ibuli yine ibishenyinye. ¹⁰ Na lutangi lo lose lwa buusu, nambo lubelongowa na mauta, ao nambo mlwamu, biluguha baana bose ba Haluni biluguha , batu bose lulingo lumwechi. ¹¹ Na m'bindo gwa lutangi lwa talala, lwihana mtu wa MLUME, noo luno. ¹² Nambo ugana gwihana wa yulu ya buswachi, noo helihana na lutangilwa lwa buswachi mikati gishi na mshimi, gwagilongiwe na mauta, na mikati gya tuoma gishigyagibiwe mshimi, gyagishiniwe mauta wigulu, namikati gya buusu bwa nekuneku bwabudobu na mauta. ¹³ Gwilusha lutangi lwage, hamwechi na mikati gyagibiwe mshimi, na hamwechi na lutangi lwage lwa talala, yulu ya buswachi. ¹⁴ Na hamwechi na bibyo gwilusha imwechi kila utangila lube lutangi lwa uginunywa uli MLUME; lubi mlwa ibuli mine gwihongolola maya maashi malutangi lwa talala. ¹⁵ Na chiya nyama cha lutangi lwa talala chine chishinjiwe wa yulu ya buswachi chiliwa lusugu loka lulo lwa utangilwa wagyo; gishishigale gyo gyose ndaa na halwelo. ¹⁶ Nambo luno lutangi lwa uhana wage mlwa ulibindila, ambo lutangi lwa ulibindila, lwiliwa lusugu lulo lwelilushiche lutangi lwage; hanyuma lusugu lwa bubili lwge yose yine yishigala yiliwa; ¹⁷ haho iya yine yishigala, u chicho nyama cha lutangi, ndaa na lusugu lwa butatu yichigiwa waahya. ¹⁸ Iyaka nambo nyama gyo gyose u chicho nyama chage cha lutangi lwa talala chibeliwa lusugu lwa butatu, bishigitabichiwa, na bishibalwa wage guya mine gwaihana; ibi ya uchigilicha, na mtu mine gwiiya gwiguha usona wage. ¹⁹ Iyaka nyama gyine gyiuda ituyine ili ya bunyenye gishiliwa; gyichigiwa waahya. Na u chicho chinge nyama, kilamtu mine guli mmaha gulingye ugiya. ²⁰ haho mtu guya mine gwiiya nyama cha lutangi lwa talala, chiya cha MLUME, na bunyenye bwagewahuba hegulu hage, gugo mtu gwichingwa koo na matu bage. ²¹ Hanyuma mtu ge gesemine gwiuda itu yine ili na bunyenye, buchafu bwa mtu ao bwa nyama gyine gili na bunyenye, ata uchigilicha o ose wine uli na bunyenye, hanyuma gabeya nyama cha lutangi lwa talala, chiya cha MLUME, mtu gugo gwichingwa koo nabatu bage. ²² MLUME gudogomone na Musa, na umsambila, ²³ Dogoma na baana ba Isilaeli, ubasambile, Mushiye mauta mo mose, mang'ombe ata ma miyoo, ata ma mbuchi. ²⁴ Iyaka mauta ma nyama gyine giwile gyo giine, na mauta ma nyama gihagilwe na byiila, munaosha ugila namowa ginge migilo; bibyo mushimaye abisa. ²⁵ Bululi gugo mtu mine gwimaya mauta ma nyama, gyine gili u lubalo lwa nyama chine batu basuhana yulu ya lutangi lwa MLUME wa ndila gyaahya, gugo mtu mine gwiiya mamo mauta gwichingwa koo namatu bage. ²⁶ Iyaka mushiiya maashi mo mose, ata ma tunonyi, aya ma nyama, mmadu menyu mose. ²⁷ Mtu ge gese mine gwiiya maashi, gugo mtu gwichingwa koo na batu bage. ²⁸ MLUME gudogomine na Musa, na umsambila, ²⁹ Dogoma na baana ba Isilaeli ubasambile, Guya mine gwihana lutangi lwage lwa talala wa MLUME, gwimlushisha MLUME byuhana byage, uhuma mnda nyama cha lutangi lwage lwa talala; ³⁰ maboo mage gee mine mimlushishalulo lutangi lwa uchigiwa waahya; mauta magyo hawechi na yaali gwiilusha, yulu ya ugana iyo yaali imawe ibe lutangi lwa umawa u mbele wa MLUME. ³¹ Ibuli yichigya mamo mauta hegulu ha butambikilo; haho iya yaali ibi ya Haluni na baana bayo. ³² Igima ya ugulu wa ulume mwimma ibuli uba lutangi lwa uginuna uhuma mnda chicho tangi chenyu cha talala. ³³ Hanyuma baana ba Haluni, guya mine gwishenya maashi mamlutangi lwa talala, na mauta malo, gee gwihewa igima ya ugulu ya ulume uba ibaa yage. ³⁴ Wa bululi, iyo yaaliya umawa, naiyo igima ya ugininywa, nabiguha u baana ba Isilaeli, u nyama chabo cha lutangi lwa talala, nene namma Haluni na baana bage, uba kiine gyabogya milumbu uhuma u baana ba Isilaeli. ³⁵ Ino noo ibaa ya Haluni , na ibaa na baana bage, yulu ya ubongiwa mauta wabo, u chicho nyama chisuhilwa wa MLUME wa ndila gyaahya, lusugu luya lwelibabiile yulu bamgilile MLUME u mgilo gwa bwiibuli; ³⁶ ibaa yinw MLUME yelilagile bahewe a baana ba Isilaeli, lulo lusugu lweli bashininye mauta. M kiine gyabo gya milumbu mnda bibushi byabo byose. ³⁷ M'bindo gwa lutangilwa uchigiwa noo guno, na gwa lutangi lwa buusu, na gwa lutangi lwa buubi, na gwa lutangi lwa abachi, na lwa ushinyiwa mauta wa MLUME,na lwa lutangi lwa talala. ³⁸ lwine MLUME lweli msambile Musa u loono lwa Sinai, lusugu luya lwelilagile baana ba Isilaeli bamtangile MLUME byumtangila wabo, uya mnda lwanaganywa lwa Sinai.