¹ Na mtu ge gese gabeita buubi uba guhuliche liidi lyine lili humlahya, nage uba ii gwa ubangisiya, ugana gumonine ao gugidi, gusahulisamba iya inywa, haho noo gwiguha udoga wage gee mine; ² ao nambo mtu gabeuda itu yo yose yine ili na udoga, uba iyitumba ya nyama gya mgala gyine gili na udoga , au uba iyitumba ya nyama gwa usugwa gya udoga, ao uba iyitumba ya ichimu ya isone, nage iyoihisho yam'bisamina, nage nuuba udoga, haho gwiguha udoga wage. ³ ao uba gabeuda buchafu bwa mtu, buchafu bo bose bwine ulamana na bubo gusili na abachi, na iyo ihisho yam'bisamina, haya hene haliosha uimana, noo hene halibi na abachi; ⁴ nambo nahi mtu gabelilahya, waudogoma wa abilo abilo wa milomo gyage, ugila usona, ambo ugila bisoga, inywa yo yose mtu yelidogoma wa ulilahila wa nangu ulanga, naiyo inywa ibem'bisamina; haho heliimana, noo hene helibi na udoga mnda bihishi bibyo. ⁵ hanyuma bibi, haya helibi na udoga mnda imwe ihisho iyo, noo helilibecha yulu ya iyo ihisho yelilubile; ⁶ nage gwimlushisha MLUME lutangi lwage lwa udoga wa yulu ya bubo buubi bwage bweligilile, mwana gwa mmoo wa ota, ao mbuchi gya ota, uhuma mnda bisuganywa byage, uba lutangi lwa buubi; hanyuma ibuli gwimmitila usambanya wa yulu ya bubo buubi bwage. ⁷ Gusahuosha una na mwana gwa mmoo, haho noo helimchwila MLUME na madiba mabili ao baana ba tukundulu babili, uba noo lutangi lwage lwa udoga wa ihisho iyo yelilubile; aninyi amwechi abe lutangi lwa buubi, na abubili abe lutangi lwa uchigiwa, ⁸ Nage gwituchisha wa ibuli, mine gwishenya lutangi aya a lutangi lwa buubi, nage gwihyugutula mswee u oshi lyao, na gashiagade bibaa bibili; ⁹ hanyuma mamwe mashi malulo lutangi lwa buubi gwimahongolola mlubachu mwa butambikilo; na mashi mamashigachu mihongololwa haya hasi ha butambikilo; m lutangi lwa buubi. ¹⁰ Hanyuma aya anonyi a bubili gwiashenya abe lutangi lwa uchigya, ulamana na m'bindo, na ibuli gwimmitila usambanya yulu ya bubo buubi bwage bweligilile, nage gwileelelwa. ¹¹ Nambo gushiosha tuto tubili, ao baana babili ba tukundulu, haho noo helilusha lutangi lwage wa yulu ya iyo inywa yelilubile, ibaa ya umi ya luuha lwa buusu bwa nekuneku, uba lutangi lwage lwa buubi; gashibiya mauta hagulu halo, na buswenge bushibiwe hegulu habo; bululi, ii lutangi lwa buubi. ¹² Nage gwimlushisha ibuli, naibuli gwiguha ganda lyage lya bubo buusu uba kangelecho gyage, naubuchigya hegulu ha butambikilo,na hegulu ha lutangi lwine lushenyiwe wa MLUME wa ndila gyaahya; noo lutangi lwa buubi. ¹³ Na iyo ibuliyimmitila usambanya wa yulu ya buubi bwage bwine hawingi ha bibyo bihishi gugilile buubi, nage gwileelelwa; na buusu byine bushigelebubi bwa ibuli, nahi luya lutangi lwa buusu byalubele. ¹⁴ Hanyuma MLUME gudogomine na Musa, nanugana, ¹⁵ Mtu ge gese gabebenga na ugila buubi wa matupi, mnda bihisho bya bihaha bya MLUME; haho noo helimchila MLUME na lutangi lwage lwa udoga, mmoo gwa mlume gwa guwilile mnda bisuganywa byage, ulamana na lubalo lolimgolwela u shekeli cha lufeza, wa shekeli cha ihanaya ihaha, ubalutangi lwa udoga. ¹⁶ nage gwimma MLUME bululi galitoleleche yulu ya buubi bwage yulu ya itu iya ya yihaha, hanyuma gwilibiya na ibaa ya bitano, na umma ibuli; nayo ibuli gwiita usambanya wa yulu ya yage u gugo mmoo gwa mlume gwa lutangi lwa udoga, nage gwileelelwa. ¹⁷ Na nambo mtu gabegila buubi, na uhogonowa wa ugila iyo imwe ihisho yine ibindile MLUME ishigilwe, inangwa gushibimanine, bibyo guli mdogu,nage gwiguha usona wage. ¹⁸ Nage gwilusha mlume gwa mmoo gwa liiha lyage, gwaguwilile, ulamana na byolimsambila, ubalutangi lwa udoga, gamshenenye uli gugo ibuli; na ibuli gwimmitila usambanya wa yulu ya iyo ihisho yelilubile wa matupi, gushiimanine,nage gwileelelwa. ¹⁹ Noo lutangi lwa udoga; chigilwe gyage guli mdogu u mbele wa MLUME.