¹ Na lutangi lwage ugana ilwa talala; ugana gatangile ng'ombe, gya mlume ao gya ota, gwihana giya gili giwilile wa MLUME. ² Nage gwibiya uboo wage hegulu ha mswe gwagyo guya mine gwagihana, na ugishinjicha ha mchango gwa hema lya busambeno; na baana bage Haluni, baya ba bibuli, bihongolola mashi magyo ngubi chose cha butambikilo. ³ Nage gwishenya ulutangi lulo lwa talala, lutangi wa MLUME lwine lwiiswa wa ndila gyaahya; noo, mauta mene masuwila miila, na mauta mose mene mali hegulu ha miila, ⁴ na pigu chage chibili, na mauta mene mali mawatane nacho, mali hoka na lubunda, na luya lwiinga luli hoka na biinyi, hamwechi na chicho pigu; bibyo byose gwibihunya. ⁵ Na baana ba Haluni bibichigya waahya hegulu ha butambikilo, hegulu halutangi lwa uchigya, lwine luli hegulu ha kunyi chine chili hegulu ha aahya; noo, lutangi lwausheniwa wa ndil gyaahya, bushio bwa ubenjiwa na MLUME. ⁶ Na byelitangila wa lutangi lwa talala lwelimshinjicha MLUME, ugana imnda ihichi ya iyoo; mlume ao ota, gwihana giya gyine gili giwilile. ⁷ Nambo gabehana mwaana gwa mmoo uba lutangi lwage, hahi noo helimtangila MLUME. ⁸ nage gwibiya uboo wage hegulu ha mswe gwagyo guya mine gwatangila, na ugishinja ha mchango gwa hema lwa busambeno; na baana ba Haluni bihongolola mashi ngubi chose cha mutambikilo. ⁹ Nage gwishenya lutangi lulo lwa talala iilutangi lwa MLUME, lwiiswa wandila gyaahya; noo, mauta mage, na mmila gwa mauta gose gugima, gwiguhunya wa ugugeda haho hoka na uda lya konya; na mauta ma maunine byamnda, na mauta mose mene mali ubyamnda. ¹⁰ na pigu chage chopi, na mauta mene mali mawatane nacho, menemali hoka na lubunda lwage, na lwinga lwine luli u binyii, hamwechi na chicho pigu; bibyo byose gwibihunya. ¹¹ Nayo ibuli yibichigya waahya hegulu ha butambikilo; noo iliwa ya lutangi lwa ushenya wa MLUME wa ndila gyaahya. ¹² Na byutambikila byage, uba m mbuchi, haho noo heligihana u mbele wa MLUME; ¹³ nage gwibiya uboo wage hegulu ha mswe gwagyo, na ugishinja haho ha mchango gwa hema lya busambeno; na baana ba Haluni bihongolola mashi magyo u butambikilo ngubi chose. ¹⁴ Nage gwishenya lutangi lwa byutambikila byage, lutangi lwa MLUME wa ndila gya aahya; noo, mauta mene malimawile byamnda, na mauta mose mene mali u byamnda. ¹⁵ Na pigu chage chopi, na mauta mene malimawatane nacho, mene mali hoka na lubunda lwage, na lwinga lwine luli u biinyi hamwechi na chicho pigu chibili; bibyo byoe gwibihunya. ¹⁶ Nayo ibuli yibichigya waahya hegulu ha butambikilo; noo iliwa ya lutangi lwa ushenya wa ndila gyaahya, lube bushio bwa ubenjiwa; mauta mose iima MLUME. ¹⁷ Ino inywa ibi alago a masugu mose, u bibushi byenyu byose, mnda ndu menyu mose, ugana mushiya mauta na mashi abisa.