¹ Hanyuma Mlume gudogomine na Musa, na gumsambile, ² Balage baana ba Isilaeli ugana bulushishe mauta ma zeituni masoga ma mahinywe wa yulu ya luya lwenge, yulu ya lilyo tala lyalame masugu mose. ³ Haya hambuga ha pashiya lya ubangisiya, m'ya mnda itula ya busambeno, Haluni gwibilongya utula igolo ndaa na halwelo u mbele wa Mlume mashugu mose; m yalago a milumbu u bibushi byenyu. ⁴ Gwimalingya mamo matala u guya mti gyamo gwine guli gusogau mbele Mlume masugu mose. ⁵ Gogwe wiguha buusu bwa nekuneku, na uchela mikati umi na gibili gya bubo buusu; ihindi ya umi na bubili ya itanga, ibi u mkati gumwechi. ⁶ Na gogwe wagibiya milongo gibili, hegulu ha mamo mesa ma mahaha, u mbele wa Mlume. ⁷ Gogwe wibiya aswenge hegulu lebelebe hegulu ha mlongo go gose, yulu gibe kengelecho gya giya mikati, lutangi lwa utangilwa wa Mlume wa ndila gyaahya. ⁸ Masugu mo mose ma Sabato gibi hubiwa u mbele wa Mlume; m wa yulu ya baana ba Isilaeli, malagano ma milumbu. ⁹ Nagyo gibi gya Haluni na baana bage; nabo bigiila ha ihana ya ihaha; bululi wage m bihaha abisa u luya lutangi lwine lusutangilwa wa Mlume wa ndila gyaahya, wa alago a milumbu. ¹⁰ Nambo mwaana gwa mmachana gwa Iisilaeli, guya mine sage gubele Mmisili, gabegya hawingi ha baana ba Isilaeli; Na gugo mwna gwa Iisilaeli, na Mmisilaeli gomwechi, babehulana mnda mbuga; ¹¹ hanyuma gugo mwaana gwa mmachana gwa Iisilaeli gabelisebulula lilyo China, na umlahya, nabo bamlushishe wa Musa. Na china lya mnage gubele hugiswa Shelomithi, msiha gwa Dibli, gwavilongo ya Dani. ¹² Nabo bam'biile m'bulogo, yulu baoshe usambilwa inywa yine yihuma mnda anywa a Mlume. ¹³ Haho Mlume gudogomine na Musa, na umsambila, ¹⁴ Mtobole gugo mine gulahile hambuga ha bushamo; nabaya bose bene bammuliche na babiya maboo mabo u mswe gwage, hanyuma sumbilo lyose na bammage wa uta mawe. ¹⁵ Gogwe dogoma na baana ba Isilaeli na ubasambila, mtu ge gese mine gwimloga Abetcha age gwiguha buubi bwage. ¹⁶ Na guya mine gwilibedula china lya Mlume chigilwe gwihagwa; sumbilo lyose lyimmaga wa umta mawe; nambo m mgenyi na nambo m'buswa, haya helilisebulula liya china lya Mlume gugo gwihagwa. ¹⁷ Nambo mtu gabemmula mtu na uhiya uuwa, godogodo nage gwihagwa. ¹⁸ na mine gwihula nyama nagyo nuuwa gwihana bumona; mwego wa mwego. ¹⁹ Na mtu bagem'biya miinage bugongole; byoka biya nahi byeliitile, nage gwigililwa byoka biya; ²⁰ lase wa lase, liiso wa liiso, liino wa liino; byoka biya nahi byelim'biile mtu bugongole, nage gwiiswa bibyo. ²¹ Nambo mtu gabehaga nyama gwinaha bumona; na guya mine gwihaga mtu nage gwihagwa. ²² Mubi na m'bindo gumwechi ka, wa guya mgenyi na wa guya m'buswa; bululi nene noo Mlume, Abetcha enyu. ²³ Musa guganine na baana ba Isilaeli, nabo bamtobolile guya mine gulahile hambuga ha bushamo, bammagile wa umta mawe. Baana ba Isilaeli baitile nahi biya bisambilwe Musa na Abetcha.