¹ Hanyuma Mlume guganine na Musa, na umsambila, ² Dogoma na baanaba Isilaeli, na ubasambile, Masugu na ulitucha ma Mlume, mene mamwitela mtambila uba noo masumbilo ma mahaha; mano noo masugu manyi ma ulitucha. ³ Mwigila migilo masugu mtuba; alakini lusugu lwa njwii noo Sabato gya ulitucha abisa, sumbilo lya lihaha; mushigile mgilo gwa mmoga go gose; m Sabato wa Mlume mnda bushamo bwenyu bose. ⁴ Masugu ma ulitucha ma Mlume noo mano, m masumbilo ma mahaha, noo mene mamwitela mitambila ha mengo mamo. ⁵ Mwachi gwa gutangi, lusugu lwa umi nabuna lwa mwechi mengo ma igolo, noo Pasaka gya Mlume. ⁶ Na lusugu lwa umi na butano lwa mwechi goka guya m lusugu lwa ulitucha lwa Mlume lwa mikati gishi gyagibiwe mshimi; mwigiya mikati gishi gya gibahubu mengo ma masugu njwii. ⁷ Lusugu lwa lutangi mubi na sumbilo lya lihaha mushigile mgilo go gose gwa bugichi. ⁸ Alakini mwishenya lutangi wa Mlume wa ndila gyaahya mengo ma masugu njwii; lusugu lwa njwii m sumbilo lya lihaha; mushigile mgilo go gose gwa bugichi. ⁹ Hanyuma Mlume gudogomine na Musa, na umsambila, ¹⁰ Dogoma na baana ba Isilaeli, ubasambile, Haho hamubimwahuhwa ugingila gigyo sii gyandihumma, na usola bisolaganywa byage, haho noo hamwimlushisha ibuli mkanda gwa ngano gwa mtomwe gwenyu; ¹¹ nage gwigumaa mkanda u mbele wa Mlume yulu ya ugana gugitabichiwe yulu yenyu; lusugu lwa bubilihnyuma ha Sabato ibuli yigumaa. ¹² Nalulo lusugu lwamwigumaa mkanda, na mwimtangila mwana-mmoo gwa mlumegwa m'bwilile gwa mwaa gwa gutangi gaabe lutangi la uchigya wa mlume. ¹³ Na lutangi lwage lwa buusu lubi lwa ihindi ya umi ya bibili ya itanga ya buusu bwa nekuneku bwa busupaganyiwe na mauta, m nyama gyagishenyiwe wa Mlume wa ndila gya aahya uba mahembwe ma ubenjiwa, na lutangi lwage lwa binyuwaganywa lubi lwa mmena, divai, ibaa ya buna ya ilego. ¹⁴ Benywe mishiye mkati, na mituchi gya isaa ya iange, na ata ya lubuga, ndaa na lusugu loka lulo, ndaa na hamubi mwahuhwa ulusha lutangi wa Abetcha enyu; ano noo alago a milumbu u bibushi byenyu mnda bushamo bwenyu bose. ¹⁵ Benywe mwibala utula lusugu lwa bublili hanyuma ha Sabato, utula lusugu luya lwamulushishe lutangi lwa umaa; chiwilila Sabato njwii; ¹⁶ ndaa na lusugu lwage lwa bubili lwa gigyo Sabato gya njwii mwibala masugu maumi matano; benywe mwimshenenya Mlume lutangi lwa buusu bwa buhya. ¹⁷ Mwihanana uhuma u madu menyu mikati gibili gwa umawaa, gibi gya ihindi ya umi ya bubili ya itanga; ibi ya buusu ba nekuneku, bwisupaganyiwa na mshimi, gwabe mtomwe gwa Mlume. ¹⁸ Benywe, hamwechi na gigyo mikati, mwitangila na baana ba moyoo njwii, ba bawilile, ba mwaa gwa gutangi, na ng'ombe gya mlume gimwechi, na myoo gya milume gibili; gibi lutangi lwa uchigya wa Mlume, hamwechi na lutangi lwabo lwa buusu, na lutangi lwabo lwa binyuwaganywa, lutangi lwa mahembwe lwa ubenjiwa lwine lutangilwe wa Mlume wa ndila gyaahya. ¹⁹ Benywe mwitangila lunga lya mbuchi limwechi uba lutangi lwa buubi, na baana ba miyoo babili ba milume ba mwaa gwa gutangi uba lutangi lwa nyama lwa talala. ²⁰ Hanyuma ibuli gwibimaa hamwechi nagigyo mikati gya mitomwe uba lutangi lwa umawaa u mbele wa Mlume, hamwechi na baya baana babili ba miyoo; babi bahaha wa Mlume, baabe ba iyo ibuli. ²¹ Benywe mwita mtambila luka lulo lusugu; mushigile mgilo go gose gwa bugichi; m yalago a milumbu mnda bushmo bwenyu bose; u bibushi byenyu. ²² Benywe haho hene hamwisola bisilanywa bya sii gyenyu, mushosole abisa abisa masunga ma lubalo lobe, na ushiongole abisa byushigala mlubala ha usola obe; wibishiga wa yulu ya gugo mbuchu, na mgenyi; nene noo Mlume, Abetcha enyu. ²³ Hanyuma guganine na Musa, na umsambile, ²⁴ Dogoma na baana ba Isilaeli, ubasambile, Mwechi gwa njwii, lusugu lwa lutangi lwa mwechi, lubi lwa ulitucha abisa lwa uya na unywa wenyu, m kengelecho gya ugila tusiba, m sumbilo lihaha. ²⁵ Mushigile mgilo go gose gwa bugichi; benywe mwitangila lutangi wa Mlume lwa ndila gyaahya. ²⁶ Hanyuma Mlume guganine na Musa, na umsambila, ²⁷ Alakini lusugu lwa umi lwa mwechi gugo gwa njwii m lusugo lwa usambanya; lubi sumbilolya lihaha wenyu, benywe mwisusula bichuli-chuli byenyu bya mwego; benywe mwitangili lutangi wa Mlume wa ndila gyaahya. ²⁸ Benywe mushigile mgilo go gose lulo lusugu; bululi m lusugu lwa usambanya, bululi bwiita usambanya yulu yenyu u mbele wa Mlume, Abetcha enyu. ²⁹ Bululi mtu ge gese mine gushilisusula gee mine loka lulo lusugu, gwichyingwa koo na batu bage. ³⁰ Na mtu ge gese mine gwigila mgilo gwa mmoga go gose lulo lusugu, gugo mtu nimchimya gahume hawingi ha batu bage. ³¹ Mushigile mgilo gwa mmoga go gose; m yalago a milumbu u bibushi byenyu, u bushamo byenyu bose. ³² Lubi wenyu Sabato gya ulitucha abisa wa uya na unywa, na benywe mwisusula bichuli-chuli byenyu bya mwego; lusugu lwa yahabulalwa mwechi mengo ma igolo, utula igolo ndaa na igolo, mwigiusa gigyo Sabato gyenyu. ³³ Hanyuma Mlume godogomine na Musa, na umsambila, ³⁴ Dogoma na baana ba Isilaeli, ubasambile, Lusugu lwa umi na butano lwa mwechi gugogwa njwii m lusugu lwa ulitucha lwa bitula-tula mwilitucha masugu njwii u mbele wa Mlume. ³⁵ Lusugu lwa lutangi lubi sumbilo lya lihaha; mushigichi mgilo go gose gwa bugichi. ³⁶ Mwitangila wa Mlume lutangi lwa aahya lusugu lwa njwii; na lusugu lwa inana habi sumbilo lwa lihaha wenyu; na benywe mwimshenenya Mlume lutangi lwa aahya; m sumbilo lwa chigilwe lino; mushigile mgilo go gose gwa bugichi. ³⁷ Masugu ma ulitucha ma Mlume noo mano, mene mitelwa mitambila ugana mabi masumbilo ma mahaha, yulu ya umshenenya Mlume lutangi lwa aahya, lutangi lwa uchigya, na lutangi lwa buusu, na lutangi lwa nyama, na lutangi lwa byunywa, lutangi lo lose walusugu lwalo. ³⁸ wa uhima chicho Sabato cha Mlume, na uhima miaso gyenyu, na uhima ubo ulibindila wenyu ose, na wa uhima lutangi lwenyu lwa uhana wa ubenja, lwine lwamusuuma Mlume. ³⁹ Alakini lusugu lwa umi na butano lwa mwechi gwa njwii, haho hamwihwa usola bisolwa bya sii, mwiita lusugu lwaulitucha lwa Mlume wa mengo ma masugu njwii; lusugu lwa lutangi lubu lwa uya na unywa na ulitucha abisa, na lusugu lwa inana lubu lwa uya na unywa na ulitucha abisa. ⁴⁰ Benywe lusugu lwa lutangi mwilihombela biguma bya miti bya bisoga, na milala gya bigachi, na matabi ma miti gya gyata, na tusugwe twa u ngudi; na benywe mwiseelela u mbele wa Mlume, Abetcha enyu, mengo ma masugu njwii. ⁴¹ Benywe mwiusa uba lusugu lwa ulihocha wa Mlume mengo ma masugu mnda mwaa; m yalago a milumbu u bibushi byenyu; mwibiusa mwechi gwa njwii. ⁴² Mwishama mnda bitula-tula masugu njwii; babuswa bose ba Isilaeli bishama mnda bitula-tula; ⁴³ bululi bibushi byenyu bimane ugana nibashaminye baana ba Isilaeli mnda bitula-tula, haya hene handibachwishiche uhuma sii gya Misili, Nene noo Mlume, Abetcha enyu. ⁴⁴ Nage Musa noo ubasambila baana ba Isilaeli mamo masugu ma ulihocha ma Mlume.