¹ Hanyuma Mlume gudogomine na Musa, na umsambila, ² Dogoma na Haluni na baana bage, yulu balibagule boo bene na bibya bya bihaha bya baana ba Isileli byine byabapahadicha nene, iyaka m yugana bashilibiya bunyenye china lyanyi lya lihaha; nene noo Mlume. ³ Ubasambile, Mtu ge gese gwa ibushi yenyu yose hawingi ha bibushi byenyu, mine gwibishenena biya bibya bya bihaha, byine baana ba Isilaeli bammahadicha Mlume, nage gwina bunyenye, gugo mtu gwichingwa koo gashibe u mbele wanyi; nene noo Mlume. ⁴ Mtu ge gese gwa ibushi ya Haluni mine gwina bushondo, ao guli na aswende; gugo gashiye u biya bibya bya bihaha, ndaa na byelihahachiwa uba mmaha. Iyaka mtu ge gese mine gwiinyuka bya yo yose yine ili na bunyenye wa yulu ya babu, ao mtu mine gwahumwa na malimi; ⁵ ao mtu gabeuda inyama yine isulibula na yaali, yuumma bunyenye, ao ugana gwammuda mtu gwa umma bunyenye, wa bunyenye bo bose bwine bweli nabo; ⁶ gugo mtu mine gwiuda bibya yo yose nahi iyo gubi na bunyenye ndaa na igolo, nage gushiya bibya byose bya bihaha, nambo gusahuligoga m'bili gwage u maadi na u luudi. ⁷ Chuba libetobowa gubi mmaha; hanyumaha bibyo gwiiya bibya bya bihaha, yulu m yiliwa yage. ⁸ Byuuwa aamo, ao nyama gya uhagwa na byiila gashibiye, gashilibiye bunyenye yulu ya gigyo nyama; nene noo Mlume. ⁹ Bino wa bibyo biusa mihano gyanyi, bashichwe uswala buubi wa yulu ya bibyo, nabo nuuwa mmo, babebibiya bunyenye; nene noo Mlume mine guli hubahahacha. ¹⁰ Mgenyi ge gese gashiye yibya ya ihaha; mgenyi gwa ibuli mine gulihushama wage, ao mgichi mine guhigilwe, gashiye wiibya ya ihaha. ¹¹ Alakini nambo ugana ibuli igulile mtu ge gese, wa umgula wa lusuu lwage, gugo gwiiya u bibyo; na baya bene babutilwe mnda ndu gyage biiya iya iliwa yage. ¹² Na msiha gwa ibuli nambo gabegonjwa na mgenyi, gashiye u luya lutangi lwa uginunywa lwau bibya bya bihaha. ¹³ Alakini nambo msiha gwa ibuli m m'bwilwa, ao ugana gwashigwa na mlumyage, nage gushi na mwaana, hanyuma gwagiwila ushama mndu mwa sage, nahi biya ha bunyundu bwage, gugo gwiiya iliwa ya sage; alakini mgenyi ge gese gashiye wiiyo iliwa. ¹⁴ Iyaka nambo mtu ge gese gabeya wibya yine ili ihaha wa nangu umana, haho gwilibiya ibaa ya bitano hegulu ha iyo ibya, na umma ibuli iyo ibyaya ihaha, ¹⁵ Na bashibibiya bunyenye bibya bya bihaha bya baana ba Isilaeli, byine bisutambikilwa wa Mlume; ¹⁶ ndaa na ubaswiya uya usona wine usulusha abachi, haho hene habasuya bibya byabo bya bihaha; bululi nene noo Mlume mine gusummahacha. ¹⁷ Hanyuma Mlume gudogomine na Musa, na umsambila, ¹⁸ dogomana Haluni na baana bage, na baana ba Isilaeli bose, ubasambile, Mtu ge gese gwa ndu gya Isilaeli, ao mgenyiineguli mnda Isilaeli, mine gwitangila lutangi lwage, nambo m yulibindila wabo o ose, ao nambo m lutangi lo lose lwa uhana wa mtima, lwabimtangila Mlume ubalutangi lwa uchigya; ¹⁹ yulu mwagitabichiwe, mwilusha mlume gwa ng'ombe, gwa m'bwilile, ao gwa mmoo, ao gwa mbuchi. ²⁰ Alakini nyama gyo gyose gyine gili na bugongole mushigitambikile; bululi gishigitabichiwa yulu yenyu. ²¹ Na mtu ge gese mine gwimtangila Mlume lutangi lwa nyama u lutangi lwa talala, yulu ya uhunya ulibindila, ao lutangi lwa mtima gwa ubenja, lwa ng'ombe ao lwa mmoo, gibi gya giwilile, yulu gyagitabichiwe; gishibe nyama gya bugongole bo bose. ²² Ihobu, au gyine ginigeya ho hose, ao itende ao gili na bilonda, ao gili na bihele, ao gili na yaana, mushigitangila wa Mlume wa ndila gyaahya hegulu ha butambikilo. ²³ Ng'ombe, ao mwana-mmoo gyahuba na ibya ya ibuchu ha m'bili gwagyo, ao gyine gihungwilwe na imwe ibya bya ham'bii gwagyo, bili bisoga benywe ugitangila lutangi lwa mtima gwa ubenja; alakini wa yulu ya ulibindila benywe mushigitabichiwa. ²⁴ Nyama gyine gibongowile u mabenda magyo, ao uhunyiwa mabende, au unogwa, ao ugechwa, mushigitangile wa Mlume; na mushiolwe ugila bibyo mnda sii gyenyu. ²⁵ Na ushisenye iliwa ya Abetcha enyu wa gimwe gya chicho nyama chuhuma m maboo ma mgenyi; yulu ugugila wabo uli mnda mwabo, bina bugongole mnda mwabo; bashigitabichiwa wa yulu ya bibyo. ²⁶ Hanyuma Mlume gudogomine na Musa, na umsambila, ²⁷ Haho ng'ombe, ao mmoo, ao mbuchi, gibebuswa, gibi hamwechi na mnage mengo ma masugu njwii; na lusugu lwa inana na hanyuma gyigitabichiwa uba m lutangi lwa utangilwa wa Mlume wa ndila gyaahya. ²⁸ Iyaka nambo m ng'ombe, ao nambo m mmoo, mushigishinje gigyo hamwechi na mwanage chosechibili lusugu lumwechi. ²⁹ Iyaka hamwimshinjicha Mlume nyama gya buswachi, mwigishinja yulu mwagitabichiwe. ³⁰ Gyiliwa lokalulo lusugu; mushishige isunga yagyo yo yose ndaa na halwelo; nene noo Mlume. ³¹ Wa bibyo mwiusa alagano manyi, na umagila; nene noo Mlume. ³² Na mushilibiya bynyenye china lyanyi lya lihaha; alakini nene nihahachiwa hawingi ha baana ba Isilaeli; nene noo Mlume mine gusummahacha benywe, ³³ nimlushiche uhuma mnda sii gya Misili, bululi naabe Abetcha enyu; nene noo Mlume.