¹ Hanyuma gudomomine na Musa, na umsambila, ² Ubasambile iyaka baana ba Isilaeli, Mtu ge gese hawingi ha baana ba Isilaeli, ao hawingi ha bagenyi bene bali bashame m Isilaeli, gwitangila lutangi na umma Moleki, ishala butala gwihagwa; bene na sii bimta mawe. ³ Na nene nimmunjwila meeso manyi gugo mtu, na nene nimchinga koo na batu bage; bululi gumtangile uhuma mnda ibushi yage na umma Moleki,yulu ya uhaita bunyenye ha ihana yanyi, na uliita china lyanyi lya lihaha bunyenye. ⁴ Iyaka nambo bene na sii babem'bumbila meeso gugo mtu wa ndila gyo gyose; haya hene helitangila uhuma mnda ibushi yage na umma Moleki, bashimmage; ⁵ noo handiunjwila gugo mtu meeso manyi, na ilongo yage, na nene nimchinga koo, nabaya bose bene balihulamana nage wa masei,yulu ya uita masei hamwechi na Moleki, babagulwe koo na batu babo. ⁶ Na mtu guya mone gwigila mine gwina mnaga, na gwa luganga-ganga, yulu ya uita nabo masei, niunjula meeso manyu yulu ya guya mtu, nim'bagula na batu bage. ⁷ Bino lihahachiwe, m'be bahaha, bululi nene noo Mlue, Abetcha enyu. ⁸ Benywe muuse m'bindo gwanyi, na ugigila; Nene noo Mlume mine gusumahacha benywe. ⁹ Bululi mtu ge gese mine gwimloga sage ao mnage wa chigilwe gwihagwa, ge gese mine gwimloga sane ao mnage; maashi mage mabi hegulu hage gee mine. ¹⁰ Na mtu mine gwiita masei na mmachi gwa gunge mtu, ehe, guya mine gwiita masei na mmachi gwa m'binji nage, mtu gwa mlumyana gabeita masei, na mmachana gabeita masei, wa chigilwe bihagwa. ¹¹ Na mtu gwa mlumyana mine gwilalana mmachi gwa sage na uununa butaa bwa sage; bose babili bihagwa; maashi mabo mabi hegulu habo. ¹² Na mtu gwa mlumyana gabelala na mma mwanage bose babili chigilwe bihagwa; bagila bya ludogya; maashi mabo mabihegulu habo boo bene. ¹³ Iyaka nambo mlumyana gabelala na mlumyana nage, nahi gwalala na mmachana, basobabili bagila bya uchigilicha; chigilwe bihagwa; na maashi mabo mabi hegulu habo. ¹⁴ Iyaka mtu gabegonda mmachi hamwechi na mnage, m ludogya lwa lwata; bichelwa m maahya; guya mlumyana na baya baachana; yulu hawingi henyu hashibe iyaka uya usona. ¹⁵ Iyaka mlumyana gabelala na nyama, chigilwe gwihagwa; na benywe mwigihaga giya nyama. ¹⁶ Iyaka nambo mmachana gabegishenena nyama gyo gyose, na ulala hamwechi nagyo, mwimmaga gugo mmachana, na nyama nagyo; chigilwe bihagwa; na maashi mabo mabi hegulu habo. ¹⁷ Iyaka mlumyana gabemgonda kachage, miha gwa sage, au siha gwa mnage, na ubumona butaa bwage, nagugo mmachana ubumona butaa bwa gugo mlumyana; m yikoko ya abule; bichingwa koo uhuma u meeso ma baana ba batu babo; gwabulula butaa bwa kachage; nage gwiguha usona wage. ¹⁸ Iyaka mlumyana gbelala na mmachana mine gwina usumwa wage, na ubulula butaa bwage; gwabulula ichiba ya maashi mage; bose babili bichingwa koo na batu babo. ¹⁹ Ushibuluchi butaa bwa msiha gwa mnobe, na ata msiha gwa sobe; bululi gugo gwabulula butaa bwa ilongo ya hoka nage; biguha usona wabo. ²⁰ Iyaka nambo mtu gabelele na mmachi gwa mmwabo; biguha usona wabo; biiwa nangu ubuta mwaana. ²¹ Iyaka mlumyana gabemguha mmachi gwa mshiwabo, m ludogya; gwabulula butaa bwa mshiwabo; babo bashibi na mwaana. ²² Bino muuse alago anyi ose, nauonona wanyi ose, na uaita; yulu ya ugana gigyo sii, gyandihummila benywe ugishama; gishimsele. ²³ Na benywe mushigyate nahi mishaminyi gya mmoga, gwandihunya u mbele wenyu; bululi boo bagilile bikoko bibyo byose, na wa yuluya bibyo nibaonywine. ²⁴ Alakini nene namsambila benywe, Mwigihyana sii gyabo, na nene nimma benywe ugihyilila; sii gya gigiluchu mabele na bui; nene noo Mlume, Abetcha enyu, nene nim'bagule benywe na mioga. ²⁵ Bululi bwa bibyo nene nibagula hawingi ha nyama cha chisoga na nyama cha bunyenye, na hawingi ha tunonyi twa tusoga na tunonyi twa tusone; nabenywe mushibiite bichuli-chuli byenyu bya mwego uba bya uchigilicha yulu ya ndila gya nyama na wa ndila gya tunonyi, ao yulu ya ndila gya ibya yo yose yine ili igigluchu mnda gino sii, byandim'bagule nabyo ugana bili bunyenye. ²⁶ Na benywe mubi bahaha wandi nene; bululi nene Mlume lini Mmaha na nene nam'bgula benywe na mioga, yulu ya ugana mabe wandi. ²⁷ Iyaka nambo mlumyana ao mmachana gwahuba na mnaga, ao uba gwa luganga-ganga, chigilwe gwigagwa; bitewa mawe; maashi mabomabi hegulu habo.