¹ Mlume gudogomine na Musa, gumsambile, ² Dogoma na sumbilo lyose lya baana ba Isilaeli, ubasambile, Mubi bahaha; wa yulu nene nili Mlume, Abetcha enyu, nili mmaha, ³ Mtu ge gese bilingye gamnyemye mmage, na sage, na benywe mwiusa Sabato chanyi; nene noo Mlume, Abetcha enyu. ⁴ Mushigaluwe ugiila miishi, na mushibade tubetcha twa ubiya milomo hegulu ha matama mato nene noo Mlume, Abetcha enyu. ⁵ Haho hamwimshinjicha Mlume lutangi lwa talala mwilushenya yulu mwagitabichiwe. ⁶ Gyiliwa loka lulo lusugu lwine lwagishinjiwa, na lusugu la bubili lwage; nambo habeshigala yo yose ya gigyo nyama na uhiya lusugu lwa matatu yichigiwa waahya. ⁷ M yugana lutangi lulo lushiliwe lusugu lwa butatu ibi uchigilicha; ishigitabichiwa. ⁸ alakini mtu ge gese mine gwiiya gwiguha usona age gee mine, yulu gwaiita bunyenye iyo ibya ya ihahaya Mlume; na iyo ichuli-chuli ya mwego ibi koo na batu bage. ⁹ Hamwisola bisolwa bya sii gyenyu, mushisole byose abisa ngubi chose cha lubala lobe, na ushiongole bisolwa byose usola obe; ¹⁰ Na ushiongole byine bishigele bya mizabibu gyobe, na ushitole biguma bya mizabibu gyobe gyine gigyile na mnaga; ubileye yulu ya ba mbuchu na bagenyi; nene noo Mlume, Abetcha enyu. ¹¹ Nangu ugiba. Nangu ubichanya, na mushisambilane lulimi. ¹² Mushilahe lulimi yulu ya chinalyanyi, na ata ulibiya bunyenye china lya Abetcha obe; nene noo Mlume. ¹³ Ushimmonene m'binji nobe, na umsapa bitundu byage; alambwe age elihigilwe ashishame obe busugu too ndaa na halwelo. ¹⁴ Ushimloge ihuli, na ushibuye bya uhyatala u mbele wa ihobu, bilingye umnyemye Abetcha obe; Nene noo Mlume. ¹⁵ Mushigile bishi byakiine mengo ma uonona, ushimgegamine mtu mbuchu, na umnyemya mine gwina uoma; mndi wimmonona m'binji nobe wa kiine. ¹⁶ Ushigye ubo naubo hawingi ha batu bobe, nahi asongamanya; na ushigimane pinda piswa gya maashi ma m'binji nobe; nene noo Mlume. ¹⁷ Ushimmonywe mshiwenyu mnda mtima gobe; m bisoga ummambila m'binji nobe, na ushiguhe buubi yulu yage. ¹⁸ Ushigiwiche buubi wa buubi, na uba na mmonywa yulu ya baana ba batu bobe; bino ummunde m'binji nobe nahi ichuli-chuli yobe ya mwego; Nene noo Mlume. ¹⁹ Mwiusa alago anyi. Ushichileye nyama chobe cha usugwa ubutana mioga giingi; Ushiune m lubala lobe mioga gibili bya biliwa ha ihana imwechi; na ushichwale u m'bili gobe bichwalanywa bya mioga gibili byabisambanyiwe hamwechi. ²⁰ Iyaka mtu ge gese mine gwilala na mmachana gwa mgichi gwa mmachana, nage gwahusindilwa na mlume, na gushihogononywe na yo yose, na gushihelwe buhulu; biononywa; bashihagwa, bululi gugo mmachana gushibele na buhulu. ²¹ Na gugo mlumyana gwitangila lutangi lwage lwa abachi gwilutangila wa Mlume, ha mchango gwa itula ya busambeno; mmoo gwa mlume gwa lulo lutangi lwa abachi. ²² Hanyuma iyo ibuli yiita msambya wa yulu yage, wagugo mmoo gwa lutangi lwa abachi u mbele wa Mlume, wa yulu ya buubi bwage bweligile; nage gwileelelwa buubi bwage bwine bweligilile. ²³ Na benywe hamwigingila mnda giya sii, mwahuba mwauna mti gya mioga gyose wa yulu ya biliwa, haho mwibala biguma byage m nahi ushugya kumbi; mengo ma myaa gitatu gigyo miti gyibalwa nahi ushi ugya kumbi; biguma byagyo bishiliwa. ²⁴ Alakini mwaa gwa bunabiguma byagyo byose bibi bihaha, wa yulu ya umma Mlume buswachi. ²⁵ Na mwaa gwa butano mwiya biguma byagyo, yulu gyaoshe umma biguma byagyo; nene noo Mlume, Abetcha enyu. ²⁶ Mushiye itu yo yose hamwechi na maashi mayo; na mushiloge, na mushigye u magabo. ²⁷ Na mushibege njuli lumwe luubi na ushiga lunge luubi masunga masungam miswe, na mushigugiche masunga ma alembe enyu. ²⁸ Mushisale salo cho chose u nyama cha mibili gyenyu wa yulu ya babu, na mushigole bibala u mibili gyenyu; nene noo Mlume. ²⁹ Ushim'biye msiha gobe bunyenye, yulu ya umiita uba sengu; bululi gigyo sii gishigilule sengu, na sii ugiila usowa waata. ³⁰ Uuswe Sabato chanyi, muhanyemye ha ihana yanyi; nene noo Mlume. ³¹ Mushibagile bene bali na mnaga, na ata baluganga-ganga; mushibaenge; yulu ya ubiwa nabo bunyenye; nene noo Mlume, Abetcha enyu. ³² Mumgimanine mine gwina mbwii; munyemye yenyi ya mmungu; na gogwe umnyemye Abetcha obe, Nene noo Abetcha. ³³ Na mgenyi gabeshama nobe mnda sii gyobe, ushimmonene. ³⁴ Mgenyi mine gwisha nobe hamwechi gubi nahi minr gubutilwe wenyu; ummunde nahi ichuli-chuli yobe ya mwego; bululi na benywe mubele bagenyi mnda sii gya Misili; Nene noo Mlume, Abetcha enyu. ³⁵ Mushigile yine ishi ya kiine mnda uonona, na ata mengo maulingilila, ata na ulingilila bushito, na ata wa tubega. ³⁶ Ulingiila bushito bwa kiine, lulingo lwa kiine, bitanga bya kiine, ubengana wa kiine, noo byamubi nabyo. Nene noo Mlume, Abetcha enyu, nimmuminye mnda sii gya Misili. ³⁷ Uuswe m'bindo gwanyi, na uonona wanyi, na ubigila. Nene noo Mlume.