¹ Mlue gudogomine na Musa, na umsambila, ² Gogwe udogome na baana ba Isilaeli, ubasambile, Nene noo Mlume, Abetcha enyu. ³ Benywe mushigile bigilanywa nahi biya bya sii gya Misili gyam'bele bashame; na mushigile bigilanywa nahi biya bya sii gya Kanaani, gyandimmila wagili; na mushigile alago abo boo babo. ⁴ Mwionona uonona wanyi, na benywe mwiusa alago anyi, yulu mwagyate nao; nene noo Mlume, Abetcha enyu. ⁵ Wa yulu ya bibyo mwiusa alago anyi nauonona wanyi; nambo mtu gabeawasha gwihamaa yulu yao; nene noo Mlume. ⁶ Mtu ge gese gwa wenyu gashi mshenene mshiwabo gwa ilongo mine guli hoka yulu ya ummununa butaa; nene noo Mlumr. ⁷ Butaa bwa sobe, ao butaa bwa mnobe, ushibubulule, bululi noo mnobe; ushibuluchi butaa bwage. ⁸ Butaa bwa mmachi gwa sobe, ushibubulule, bululi, noo butaa bwa sobe. ⁹ Butaa bwa kachobe, msiha gwa sobe, ao msiha gwa mnobe, uba gubutilwe mnda ndu gyenyu ao ugana gubutilwe lunge luubi, butaa bwa babo ushibubulule. ¹⁰ Butaa bwa msiha gwa mwanobe gwa mlumyana, ao bwa msiha gwa msiha gobe, butaa bwabo babo ushibubulule; bululi noo butaa bobe gogwe mine. ¹¹ Butaa bwa msiha gwa mmachi gwa sobe, mine gubutilwe na sobe, gugo m kachobe, ushibuluchi butaa bwage, ¹² Ushibuluchi butaa bwa mnobe kachi; bululi, gee m yilongo yine ili hoka na sobe. ¹³ Ushibuluchi butaa bwa misiha gya mnobe; bululi, gee m yilongo ya hoka na mnobe. ¹⁴ Ushibuluchi butaa bwa mshiwabo na sobe, ushimshenene mmachage gwa mshiwabo na sobe; gee noo mnobe kachi. ¹⁵ Ushibuluchi butaa bwa mmachi gwa mwanobe; gee mmachi gwa mwanobe; ushibuluchi butaa bwage gugo. ¹⁶ Ushibuluchi butaa bwa mmachi gwa mshiwenyu; bululi, m butaa gwa mshiwenyu bubo. ¹⁷ Ushibuluchi butaa bwa mna baana na bwa msiha gwage; ushimguhe msiha gwa mwanobe gwa mlumyana ao gwa mmachana, na ubulula butaa bwage; babo noo ilongo ya hoka noobe; m yusona waata. ¹⁸ Na ushiguhe mmachana hamwechi na mshiwabo, gabe msusuchi gwage, na ubulula butaa bwage, nambo gugo gwa bubili uba gwili na mwego. ¹⁹ Na gogwe ushimshenene mmachana wa ubulula butaa bwage mengo ma ubagulwa wage yulu ya bunyenye bwage. ²⁰ Ushilale na mmachi gwa miinobe, naulibiya bunyenye nage. ²¹ Na gogwe ushitambikile ibushi yobe yo yose na ubahisha wa Moleki, na ushilibiye bunyenye china lya Abetcha obe; nene noo Mlume. ²² Ushilale na mlumyana nahi mlingilisho gwa ulala na mmachana; m yuchigilicha wa Mlume. ²³ Na ushilachi na nyama gyo gyose, na ulibiya bunyenye wagyo; na ata mmachana gasigimane u mbele wa nyama yulu ya ulala nagyo; m yuchigilicha. ²⁴ Ushilibiye bunyenye wa bikoko bibyo byose; bululi mmoga gwandihunya u mbele wenyu gubele na bunyenye wa bibyo bikoko byose. ²⁵ na gigyo sii gisili na bunyenye; wa yulu ya bibyo nagilungila usona wagyo hegulu hagyo, na gigyo soo gyisela bashami bagyo na ubachinga. ²⁶ Wa yulu ya bibyo mwiusa alago nanyi na uonona wanyi, mushigile ugugila ubo ose; wa guya guli m'buswa, na wa guya mgenyi mine gulu mshame hawingi henyu. ²⁷ (bululi babo batu ba gigyo sii bagila bya uchigilicha ubo ose, babo bene batulile uba hambele henyu, na gigyo sii gisili na bunyenye;) ²⁸ yulu ya ugana gigyo sii gishimsele na benywe nabo, haya hene hamweigiita uba na bunyenye, nahi byagiselile guya mmoga gwine gutulile uba hambele hanyu. ²⁹ Bululi mtu ge gese mine gwiita bya uchigilicha umwe oose ubo, bichuli-chuli bibyo bya mwego byichingwa koo na batu babo. ³⁰ Wa yulu ya bibyo muuse mihano gyanyi, yulu ya ugana mushigile abisa gino mishaminyi gyne gili huchigicha, gyine gilombole ugilwa hambele henyu, na mushilibiye bunyenye wa yulu ya bibyo bikoko; nene noo Mlume Abetcha enyu.