¹ Mlume gumsambile Musa, guganine, ² Sambila Haluni, na baana bage, na baana baose ba Isilaeli, ubasambile, ino nywa noo iganine Mlume, guganine, ³ Mtu ge gese ga ndu gya Isilaeli mine gwishinja ng'ombe, ao mbuchi, mnda mwa bushamo, ao mine gwishinja hambuga ha bushamo, ⁴ na gusagilusha u mchango gwa itula ya busambeno, yulu gagitangile gibe lutangi yulu ya Mlume u mbele wa itula ya Mlume; gugo mtu gwibalwa uba gwina abachi a maashi; gwagesa maashi; na gugo mtu gwichingwa koo na batu bage. ⁵ Wa ibalobaana ba Isilaeli balushe lutangi lwabo, lwabali hushinja u mabala, ehe, bachilushe wa Mlume, ndaa na ha mchango gwa itulaya Mlume ya busambeno, uli guya ibuli, bululi baashinje chabe lutangi lwa talala wa Mlume. ⁶ Nayo ibuli yibiya matata ma maashi hegulu ha butambikilo bwa Mlume, ha mchango gwa itula ya busambeno, na uchigya mauta magyo, maabe mahembwe masoga u mbele wa Mlume. ⁷ Na bashitangila iyaka lutangi lwabo u giya miishi gya ngudi, gisubalama yulu giite nabo masei. Guno m'bindo gubi m'bindo gwa milumbu wabo, ibushi wa ibushi. ⁸ Gogwe wibasambila, mtu ge gese gwa ndu ga Isilaeli, ao ata gwahuba mgenyi, bene balihushama nabo, mine gulihutangila lutangi lwa uchigya ao lwa nyama, ⁹ nambo gusahululusha u mchango gwa itula ya busambeno, yulu galutangile wa Mlume bibyo gugo mtu gwibagulwa na batu bage. ¹⁰ Hanyuma mtu ge gese gwa ndu ga Isilaeli, ao ata gwahuba mgenyi mine gulihushama hawingi habo, mine gwiiya maashi, ma mmoga go gose, nihamba yenyi yanyi yulu ya gugo mtu mine gulihuya maashi, nene nimchinga koo na batu bage. ¹¹ Bululi mwego gwa gugom'bili guli mnda mamo maashi; na nene namma benywe mamo maashi hegulu ha butambikilo, yulu ya uita msambanyo gwa yulu ya bichuli-chuli byenyu bya mwego; bululi m mamo maashi mali huita usambanya yulu ya bichuli-chuli bya mwego. ¹² Wa bibyo nibasambile baana ba Isilaeli, Hashi mtu hawingi henyu mine gusambilwe gaye maashi, ata mgenyi mine gulu mshame hawingi henyu gashiya maashi. ¹³ Mtu ge gese gwa baana ba Isilaeli, ao gwa babo bagenyi beebali bashame hawingi henyu, gugo gabewata nyama, ao anonyi ene asuliwa, mnda buhibi bwage; gwigesa maashi magyo, na umahulila ma bitete. ¹⁴ Bululi wine uli gugo mwego gwa nyama, mamo maashi mali hamwechi na mwego gwagyo; wa bibyo nibasambile baana ba Isilaeli, Mushiye maashi ma nyama ma mioga gyose; bululi mwego gwa nyama chose guli mnda maashi magyo; ge gese mine gwimaya gwichingwa koo. ¹⁵ Iyaka mtu ge gese mine gwiiya nyama gya uuwa aamo, ao nyama gyuhagwa na byiila, nambo m mwana mbuga, nambo m mginyi, gwifula bichalaganywa byage, na uligoga u luudi, nage gubi na bunyenye ndaa na igolo; hanyuma noo gubi mmaha. ¹⁶ Alakini nambo ugana gusahufula, na nambo gusahuligoga m'bili gwage, haho noo ugana gwiguha usona wage.