¹ Mlume gudogomine na Musa, hanyuma hauuwa wa babo baanababiina Haluni, habagihyile u mbele wa Mlume, boo nuuwa; ² Mlume gumsambileMusa, dogoma na Haluni mshiwenyu, uganagashigingile mengo mo mose ha ihana ya ihaha mnda mwa pashiya, u mbele wa isuba ya uleelela, yine ili hegulu ha lindo, gashichwe uuwa; bululi, nene nimoneya m liya timba hegulu ha iya isuba ya uleelela. ³ Haluni gubi ugingila ha ihana ya ihaha na bino bitundu; mwana ng'ombe gwa mlume gwa mgendagwa lutangi lwa buubi, na mmoo gwa mlume gwa lutangi lwa buubi, na mmoo gwa mlume gwa lutangi lwa uchigya. ⁴ Gwichwalana liya kanjo lya luhaha lya malekani, gubi na biya bichwalaganywa bya umagulu bya malekani u m'bili gwage, gwahambwa guya mchingo gwa malekani, nage gwichwala aya akusu-kusu a malekani; bibyo noo bichwalaganywa bya bihaha, nage gwiligoga ,'bili gwage u luudi, noo ubichwala. ⁵ Hanyuma gwiguha m maboo ma sumbilo lya Baisilaeli mabuchi mabili ma malunga, yulu ya luyangi lwa buubi; na mmoo gwa mlume yulu ya lutangi lwa uchigya. ⁶ Na Haluni gwitangila giya ng'ombe gya lutangi lwa buubi, m gya yulu ya ichuli-chuli yage ya mwego, na uita msambanyo yulu ya ichuli-chuli yage ya mwego gee mine, na wa yulu ya ndu gyage. ⁷ Hanyuma gwiguha maya mabuchi mabili na umabiya u mbele wa Mlume u mbele wa mchango gwa itulaya busambeno. ⁸ Na Haluni gwita luuti yulu ya maya mabuchi mabili; luuti lumwechi yuluya Mlume; na luuti lwa bubili m yulu ya Azazeli. ⁹ Na Haluni gwilusha giya mbuchi gyine gyigwilwa na luuti yulu ya Mlume, naugitangila gibe lutangi lwa buubi. ¹⁰ Na giya mbuchigyine gwagilwa na luuti yulu ya Azazeli gyibiwa namwego u mbele wa Mlume yulu ya ummitila msambanyo, yulu ya ugihila mgala wa yulu ya Azazeli. ¹¹ Haluni gwitambikila ng'ombe gya lutangi lwa buubi, m gya yulu ya ichuli-chuli yage ya mwego, na uita msambanyo wa yulu ya ichuli-chuli yage ya mwego gee mine, nayulu ya ndu gyage; nage gwishinja giya ng'ombe gya lutangi lwa buubi, gyine gili yulu ya ichuli-chuli yage ya mwego. ¹² Hanyuma Haluni gwiguha ihulilo yineili igiluchu na maala ma aahya muhuma u butambikilo bwine buli u mbele wa Mlume, na maganda mabili ma mafusho na ma lebelebe mamasube abisa, m maboo mage, nage gwimachwisha mnda mwa pashiya. ¹³ Hanyuma gwibiya maya mafusho hegulu ha aahya u mbele wa Mlume, yulu ya mii gwa maya mafusho gwabise iya isuba ya uleelela yine ili hegulu ha mangisiyo, gashichwe uuwa. ¹⁴ Hanyuma gwiguha mamwe maashi ma giya ng'ombe, na ubiya matata na mnywe gwage hegulu ha iya isuba ya uleelela luubi lwa mlugulu; na umbele wa isuba ya uleelela gwibiya matata ma maya maashi na mnywe gwage nyendo njwii. ¹⁵ hanyuma gwishinja giya mbuchi gya lutangi lwa buubi, giya gyine gili yulu ya batu, na ulusha maashi magyo mnda pashiya, na wa maya maashi gyigila byoka biya nahi maya maashi ma ng'ombe, na ubiya matata hegulu ha isuba ya uleelela, na umbele wa isuba ya uleelela. ¹⁶ nage gwiita msambanyo wa yulu ya ihana ya ihaha, ibalo ya bikoko bya baana ba Isilaeli, na wa yulu ya uluba wabo, ehe, wa yulu ya buubi bwabo bose; nage gwigila byoka biya wa yulu ya itulaya busambeno, ili hushama hamwechi nabo hawingi usona wabo. ¹⁷ Na hashi mtu mnda itula ya busambeno, mengo meligingila uita msambanyo ha ihana ya ihaha, ndaa na byelitobowa hambuga, hanyuma ha uita msambanyo yulu ya ichuli-chuli yage ya mwego, na wa yulu ya ndu gyage, na wa yulu ya sumbilolyose na baana ba Isilaeli. ¹⁸ Hanyuma gwitobowa na ugya u butambikilo bwine buli umbele wa Mlume na uita msambanyo yulu yage; gwiguha mamwe maashi ma ng'ombe, na maashi ma giya mbuchi, na umabiya u masunga ma buya butambikilo ngubi chose. ¹⁹ Iyaka gwibiya matata ma mamwe maashi hegulu ha butambikilo na mnywe gwage nyendo njwii, na ubuhahacha, yulu ya usona ose wa baana ba Isilaeli ubuhume. ²⁰ Nage gabehwa uita msambanyo wa yulu ya ihana ya ihaha, na itula ya busambanino, na butambikilo, gwilusha giya mbuchi gya mwego. ²¹ Na haluni gwibiya maboo mage mabili u mswe gwa giya mbuchi gya mwego, na ulibecha wa gili usona ose wa baana ba Isilaeli, na uluba wabo, ehe, buubi bwabo bose; nage gwibubiya hegulu ha mswe gwa giya mbuchi, hanyuma gwigihila gigye mgala m muboo wa mtu mine guli lumiima. ²² Na giya mbuchi gyiguha hegulu hagyo usona wabo ose, ugihila ndaa na sii gyine gishi na batu; nage gwigishiga mbuchi mnda mgala. ²³ Na Haluni gwigingila mnda itula ya busambeno, nage gwichula bichwalaganywa byage bya malekanyi, byelichwalile mengo maligingile ha ihana ya ihaha, gwibishiga mmo; ²⁴ nage gwiligoga m'bili gwage na maadi ha ihana ya ihaha, na uchwala bichwalaganywa byage, na ugya, na utambikila lutangi wa uchigya wa yulu yage gee mine, na lutangi lwa uchigya lwa batu, nage gwiita msambanyo wa yulu ya ichuli-chuli yage ya mwego, na wa yulu ya bange batu. ²⁵ Na mauta ma lutangi lwa buubi gwimachigya hegulu ha butambikilo. ²⁶ Na guya mtu gugya uhiga giya mbuchi gya Aazeli gigye, na gwiligoga magulu mage, na hanyuma gwingila u bushamo. ²⁷ Na giya ng'ombe gya lutangi lwa buubi, na giya mbuchi gya lutangi lwa buubi, mene maashi magyo malushiwe mnda maite kengelecho ha ihana ya ihaha, bihilwa hambuga na bushamo; nabo bichigya bibambi byacho, na nyama chacho, na tubi twacho. ²⁸ Na guya mine gwichigya waahya gwifula bichwalaganywa byage, na uligoga m'bili gwage na maadi, nahanyuma gwigingila u bushamo. ²⁹ Ano alago abi alago a milumbu wenyu; ha mwechi gwa njwii, masugu ma mwechi umi, mwilisusula luhuda lwenyu, mushigile mgilo gwa mmoga go gose, mwana m'buswa na mgenyi mine gulimshame hawingi henyu. ³⁰ Bululi lulo lusugu msambanyo gwigiliya wa yulu yenyu, yulu ya ummahacha; na benywe mwihahachiwa buubi bwenyu bose u mbele wa Mlume. ³¹ M Sabato gya ulitucha gya chigilwe wenyu na benywe mwilisusula luhua lwenyu; m yaalago a milumbu. ³² Na ibuli yine yishinyiwa mauta na ubagulwa yulu ya Mlume hanyuma ha sage, gwiita gugo msambanyo, nage gwichwala ichwalaganywa ya malekani, noo, biya bichwalagaywa bya bihaha. ³³ Nage gwiita msambanyo yulu ya ihana ya ihaha, nage gwiita msambanyo yulu ya itula ya busambeno, na yulu ya butambikilo; nage gwiita msambanyo yulu ya bibuli, na wa yulu ya bato bose ba sumbilo. ³⁴ Ano alago abi alago a milumbu wenyu, yulu ya uita msambanyo gwa baana ba Isilaeli wa yulu ya buubi bwabo bose, lwendo lumwechu u mwaa. Nage guitile byoka biya nahi Mlume byelimlagile Musa.