¹ Hanyuma MLUME gudogomine na Musa, na umsambila, ² Dogoma na babo baana ba Isilaeli, ubasambile, Mmachana gabeswala gumo na ubuta mwaana gwa mlumyana, haho gubi na bunyenye masugu njwiima ubagulwa wage wa yulu ya maashi mesuhumwa namo, noo mebi na bunyenye. ³ Lusugu lwa inana mwaana gwigishiwa kumbi ugechwa ibambi ya bwali bwage. ⁴ Na gugo mmachana gwishama yulu ya uhahachiwa ma maashi mage masugu maumi matatu na matatu; gashiude itu yine ili ihaha, na gashigingile ha ihana ya ihaha, ndaa na masugu mage ma uhahachiwa hamiwilila. ⁵ Na nambo gubutile mwaana gwa mmachana haho gubi na bunyenye mayinga mabili, nahi ubagulwa wage; nage gwishama mnda maashi ma uhahachiwa wage mengo ma masugu maumi mtuba na mtuba. ⁶ Hanyuma ha mamomasugu mage ma uhahachiwa wage hamiwilila, wa yulu ya mmwa lubaga ao iwa yulu ya msiha, gwilusha mwana mmoo gwa mwaa gumwechi uba lutangi lwa uchigya na mwana gwa akungulu, ao gwa diba, ubalutangi lwa buubi, gabichwishe ha mchango gwa hema lya busambeno, na uuma ibuli; ⁷ nage gwibashenya u mbele wa MLUME, na uita usambanya yulu yage, nage gwihahachiwa wa mgechi gwa maashi. Ano noo alago a gugo m'bushi, ugana m mwaana gwa mlumyana ao gwa mmachana. ⁸ Nambo bitundu byage gugo mmachana bishinaosha uhyiila mwana mmoo, haho noo haliguha baana babili ba madiba, ao baana babili ba tukundulu; amwechi nahi lutangi lwa uchigya, na abubili uba lutangi lwa buubi; nayo ibuli yiita usambanya wa yulu yage, nage mmachana gubi mmaha.