¹ MLUME gudogomine na Musa na Haluni, na ubasambila, ² Dogomwe na baana ba Isilaeli, mwabasambile, Chino nyama noo nyama chine chili na mwego chine chamwiya, u nyama chose chine chili hegulu ha ibaloo. ³ Kila nyama gyo gyose gyine gilina tubidi u bigombo byagyo, gyine gili na tubidi twa tugadubu hawingi, gyine gisutiula, u nyama chicho noo chamwiya. ⁴ Hamwechi na bibyo, na mushiya chiya nyama chine chili hutiula, na chiya chine chilana tubidi; nahi ngamia, yulu gisutiula na gishi na tubidi, gyoo gili gya bunyenye wenyu. ⁵ Na sengi, bululi asutiula nao ashi na tubidi, gyoo gili na bunyenye mwamli. ⁶ Na alulu, bululi asutiula,nashi na tubidi, oo ali a bunyenye wamli. ⁷ Na ngulube, wa bululi gyoo gyina tubidi, gyina tubidi twa tugadubu hawingi, na gishi batiula gyoo gili gya bunyenye wenyu. ⁸ Mushiya nyama chacho, na mushiume bitumba byacho; choo chili cha bunyenye wenyu. ⁹ Bibyo chose chine chili mnda maadi mwiiya chicho; gyo gyose gyine gili na gutatu u mgongo na mmbachu, na gya magamba, mnda mamo maadi, na mnda mwa bahali, na mnda ngudi, mwiiya chicho. ¹⁰ Na chiya chose chine chishi na miigwa gutatu gwa mgongo na gwa mmbachu, na magamba, mnda bahali na mnda ngudi, chicho chine chisugyata mmaadi, na chose chine chili na mwego, chine chili mmaadi, chicho mchisone wenyu. ¹¹ chibi chisone wenyu; mushiye nyama chacho, na bitumba byacho bibibisone wenyu. ¹² Yo yose yine ishi na migwa gutatu gwa mgongo na mmbachu na ishi na magamba yine ili mnda maadi iyisone wenyu. ¹³ Na utunonyi tuno noo tuli tudogu wamli; tushiliwa, noo tusonyu; ubi, na kuchu, na ihungwe, ¹⁴ na iubauba, na loochi ulamana na mioga gyalo, ¹⁵ na bimombomombo ulamana na mioga gyabo, ¹⁶ na mbuni, na abemba, na mmuwe, na mombo ulamana na mioga gyage; ¹⁷ Na yugulu, na igomagoma, na byugulu bya byata; ¹⁸ Na kolongu, na byogaoga, na mdeli,; ¹⁹ na magomba, na mchinji na mioga gyagyo gyose, na awewe, na achuguchugu. ²⁰ Iyaka byose byine bisulibula byina bihwahwa bisugyata na magulu mana, bibyo m bisone wenyu. ²¹ Hamwechi na bibyo, byine bili hulibula nabyina bihwahwa na bisugyata na magulu mana bili bisoga wa uliwa, biya byine bili na magulu malahu, bya ugulwila hegulu ha ibaloo; ²² u bibyo muli na alago a ubiya; njige na mioga gyacho, na njige cha chata ulamana na mioga gyacho, panji na mioga gyacho, ilumbi-lumbi ya panji. ²³ Ata bibyo byose byulibula na byina bihwahwa, na bili namagulu mana m bisone wenyu. ²⁴ Benywe mubi na usoma yulu ya chicho nyama; ge gese mine gwiuda itumba yagyo gubi bunyenye ndaa na igolo. ²⁵ na mtu ge gese minegwiguha yo yose ya itumba yayo gwifula bichwalaganywa byage, nage gubi na bunyenye ndaa na igolo. ²⁶ Nyamagyo gyose gyine gili gigadubu abidi, nagyo gishinatubidi tubili, na gishi hutiula, gigyo gili na bunyenye wenyu; ge gese mine gwiuda gigyo nyama gubi na bunyenye. ²⁷ Iyaka nyama gyo gyose gyine gilihugyata na biganda ganda byage, u chicho nyama chose chine chilihugyata na magulu mana, chocho chili bunyenye wenyu; ge gese mine gwiuda itumba yacho, gubina bunyenye ndaa na igolo. ²⁸ Nagegese mine gwiswala itumba ya chicho nyama gwifula bichwalaganywa byage, nage gubi na bunyenye ndaa na igolo; chicho chili bunyenye wenyu. ²⁹ Iyaka bitu byose byine bilihulibula, ulibula hegulu ha bitete, bibyo bili bunyenye wenyu; imbulu, na mbeba, na msumbulu, wa ulamana na byose, ³⁰ na mbulu, na kange, na ibulamti, na luhuti. ³¹ Chicho nyama noo chili bunyenye wenyu u chichi cha ulibula; gegese mine gwichiuda, chahuhwa uuwa, gubi na bunyenye ndaa na igolo. ³² Iyaka ituyoyose yine yigwila chicho nyama chahuhwa uuwa, ibi na bunyenye; uba iyitundu ya mtu, uba iyichalaganywa, uba iyibambi, ao ahwaba, ibya yo yose yine yigwilwa, uba iyugilila mgilo go gose yibiwa mnda maadi, hanyuma noo ibo isoga. ³³ Na itundu yo yose ya bitete, chicho nyama chochose chibeigwila, yoyose yine ili mnda mwayo iba binyenye, na iyo itundu yibelwa. ³⁴ Iliwa yo yose yine ilimo, iya ya uliwa, iya yine maadi masubiwa hegulu hayo ibi bunyenye, na yunywa yine iyunyuwa, yine ili mmiya itundu nahi iyo, ibi bunyenye. ³⁵ Na ituyoyose yine yigwilwa na ihindi yo yose ya itumba yayo ibi bunyenye; noo ugana myangabila, ao mmasuga ma buhiilo, yibelwa biba-biba, bibi bunyenye bibyo bitundu, nabyo bibi bunyenye wenyu. ³⁶ Hamwechi na bibyo, misula gya maadi, ao biina bya maadi byine bili husumbila maadi bibi bisoga; haho biya byine byiuda bitumba byabyo bibi bunyenye. ³⁷ Na ihindi yo yose ya itumba ibegwila matete ao biguma byuuna hane habyiunywa, bibi bisoga. ³⁸ Ugana matete ao biguma byabiwa maadi momose ma bitumba byabo, bibi bunyenye wenyu. ³⁹ Nambo gibewa nyama gyo gyose, gyine gyamli balagwe ugiya, guya gwigiuda gubi na bunyenye ndaa na igolo. ⁴⁰ Na guya mine gwiiya nyama cha iya itumba gwifula bichwalaganywa byage, nage gubi na bunyenye ndaa na igolo; guya nine gwiguha itumba yagyo gwifula bichwalaganywa byage, nage gubi na bunyenye ndaa na igolo. ⁴¹ Na kila itu yine ili hulibula u bitete iyisone; ishiliwa. ⁴² Yo yose yine ilihubula na gumo lyage u bitete, nayoyose yine ilihugyata na magulu mayo mana, nayo yose yine ilihugyata na magulu mayo meengi, noo byose byine bilu hulibula ulibula heguluha bitete, mushiiya, bululi ili isone. ⁴³ Mushiiite bichuli-chuli byenyu bya mwego uba bisone yulu ya itu yo yose yine ili hulibula, ilihulibula, na mushigile bichuli-chuli byenyu bya mwego uba bunyenye yulu ya bibyo bitu, ulisonya yuluya bibyo. ⁴⁴ Bululi nene nili MLUME, Abetcha enyu; biino lihahachiwe bichuli-chuli byenyu bya mwego, ; m'be bahaha, bululi nene nili Mmaha; biino mushibiye usona mnd bichuli-chuli byanyu bya mwego wa itu yulibula ya mmoga go gose, yine ilihugyata hegulu ha bitete. ⁴⁵ Bululi nen nili MLUME gumchwishiche uhuma sii gya Misili, yulu nabe Abetcha enyu; biino mubi bahaha yulu nene nili Mmaha. ⁴⁶ Guno noo m'bindo yulu ya chicho nyama, na tunonyi, na yulu ya ibumbwa yoyose yine ili na mwego, yine isugyata mnda maadi, na ibumbwa yoyose yine ili hulibula hegulu ha bitete. ⁴⁷ bululi bwaubagula byine bili bunyenye na byine bili bisoga, na hawingi ha ibumwa yine ili na mwego inaliwa, na yine li na mwego yine ishinaliwa.