¹ Nene nili mtu gumonine asusu a kanga chwa buhuchi bwage. Gwabgolwela na ungyashamnda mdoo na ushi wa mnda lwenge. ³ Winene yulu yanyi gwaugalula uboo wage nyendo na nyendo chuba lyose. ⁴ Gwaimya nyama chanyi na ibambi yanyi; Gwamabele mauda manyi. ⁵ Gwagubaa nyimbo yulu yanyi, Na unyungulucha bululu na uima. ⁶ Gwashamya hene hali mdoo,Nahi batu bene bawile aala. ⁷ Gwanyunguluwa ngubi chose na nishinaosha uhuma; Gwaaita amangila anyi uba bushito . ⁸ Ehe, nabelila nausaba uwatilichiwa, Nuuhanya usaba wanyi. ⁹ Gwachiba madila manyina mawe mamabade; Gwahugulula mahitilo manyi. ¹⁰ Byeli wanyi ii nahi ameme aalibise, Nahi tambwe gyagilibise. Gwamagalula madila manyi, na usanuna-sanuna; Gwangila uba mauwa ¹² Gwahanba buta bwage, Na ungita uba itoto ya migwi. ¹³ Gwang'ingicha migwii gya luuku lwage. ¹⁴ Nisili ituya wenja ubatu banyi bose; Lwimbi lwabo chuba lyise. ¹⁵ Gwangilucha usuma, Gwangita mtima usemuwa na bululu ¹⁶ Gwandigula meno na mawe; Gwambwila na mtoo. 17 Waibiya koo ichuli-chuli yanyi ya mwegi na talala; Nigibilile uba na bitundu. ¹⁸ Niganine, Uoma wanyi wachimina, Na maudagilo manyi wa Mlume. ¹⁹ Uengeleche asusu anyi, na uwilwa wanyi, Bululu na bya bululu. ²⁰ Ichuli-chuli yanyi ya mwego yili huengelecha bibyo, Nya yaginama mnda mwanyi. ²¹ Nalyengecha ino inywa, Wa bibyo nina maudagilo. ²² II wa keene cha Mlume ugana tushi chimiwe, Yulu uleelela wage ushisunge. ²³ Lwelo ii luhya kila chuba; Winene wage obe ii wata. ²⁴ Mlume noo mtala gwanyi, ilihugana ichuli-chuli yanyi ya mwego, Wa bibyo nimudagila gee. ²⁵ Mlume ii m'bemju u baya bali hummemba , Na iya ichuli-chuli ya mwego ilihummenga. ²⁶ Ii bibenju ntu gahembe uhogononywa wa Mlume Na umemba wa mateamano. ²⁷ Ii bibenju Mtu gaswale uhambwa , Mengo ma buyana bwage. ²⁸ Na gashame gee buchima pii, Bululi Mlume gubiile bibyo yulu yage. ²⁹ Na gabiye anywa age mmihwili; Uba hange hali maudagilo. ³⁰ Na gamengele guya gulihumula u tama lyage; Gagyuswe bigilanywa bibii. ³¹ Bubluli Mlume gishimtela mtu milimbu. ³² Yulu inangwa gwimchigilicha gwimleelela, Wa bwingi bwa keene chage. ³³ Yulu mtima gwage gushihubenja ubasusula batu, Ata ubachigilicha. ³⁴ Ubahwilila hasi wa magulu, Bahambwa bose ba hano hasii. ³⁵ Uhugulula uonona wa mtu, Umbele gyage Guya guli hegulu. ³⁶ Na umgima mtukiine gyage, Bibyo Mlume gushihubibenja abisa. ³⁷ M nanyi gusugana inywa nayo nuugiliya, Uba Mlume gusailaga? ³⁸ Wi wii?Mmanywa age guya guli hegulu Mushihuhuma bubii na busoga? ³⁹ Yulu yai mtu gwang'ungunuka guli na mwego, Mtu gabeononywa yulu ya bubii bwage? ⁴⁰ Na tucheeleche madila metu na umatonda, Na ugiwilila Mlume iyaka. ⁴¹ Na tumginunine Abetcha ali hegulu ha gulu Mitima gyetu na maboo metu. ⁴² Beswe twaluba na umanya; Gugwe usaleelela. ⁴³ Watuwila na sungu na utulaminina; Wahaga, na usamona keene. ⁴⁴ Waliwila ichuli chuli yobe ya mwego wa timba, Usaba wetu ushihite. ⁴⁵ Watuita bibala-bibala, na bitete bidogu hawingi ha mioga. ⁴⁶ Yulu yetu tumangu twetu, Batugadulila tunywa twabo. ⁴⁷ Iduba yatuchwilila na iina, Mauwa na udoga. ⁴⁸ Liiso lyanyi lyagongolowa ngudi cha madi, Wa yulu ya unogeya wa bawamisiha ba batu banyi. ⁴⁹ Liiso lyanyi lyahuma byosochi lisasunga na lisaleya. ⁵⁰ Ata Mlume helilengamina Na ulola uhuma heli hegulu. ⁵¹ Liiso lyanyi lyambiya huzuni mmichuli-chuliyanyiya mwego , Wa yulu ya bawamisiha ba batu banyi . ⁵² Baya bene bali tumangu twanyi hashi ibalo Balihupiba abisa nahi anonyi; ⁵³ Bagutelela koo mwego gwanyi mmihambo, Na utele liwe hegulu hanyi. ⁵⁴ Madi mengi mahita hegulu ha mswe gwanyi, Niganine nalungwa koo. ⁵⁵ Niligitile chila lya Mlume , uhuma mmiiya iina, Yigibe hasi abisa. ⁵⁶ Uhuliche lidi lyanyi; Ushibise litu lyobeyulu uhuliche luhuda lwanyi,wa ulila wanyi ⁵⁷ Unjwilile luya lusugu lwandiulilile; Uganine nangu uwa booba. ⁵⁸ Ee, Mlume wandogomena u baya balihugamba ichili-chuli yanyi ya mwego; Waguhogonona mwego gwanyi. ⁵⁹ Wamona uhyililwa wanyi,Ee Mlume ; Ukononene inywa yanyi. ⁶⁰ Waimona ibushiyabo yose, Na mihungo gyabo gyose yulu yanyi. ⁶¹ Gogwe Mlume, wagihulicha misobo gyabo, Na mihungo gyabo gyose yulu yanyi. ⁶² Milomo gyabo baliginune yulu yanyi, Na mihungo gyabo chuba lyose. ⁶³ Ulole ushama wabo, Na ugimana wabo; Lwimbo lwabo noo nene. ⁶⁴ Wibaha alambwe abo, Gogwe Mlume, Ulamana na migilo gya maboo mabo. ⁶⁵ Wibaha unyema wa mitima gyabo; Buloga bobe hegulu habo. ⁶⁶ Wibalaminina wa sungu ,Na ubachimyabashibe iyaka hasi ha gulu lya Mlume.