¹ Hanyuma ha haho maoolo mose mene mabele hushama m bwala bwa bubili bwa Yolodani, haya ha sii gya tubandagulu, nahaya Shefela, na luubi lose lwa bibega byose bya bahali lya lyata hoka na Lebanoni, noo, gugo Mmiti, na Mmamoli, na Mkanaani, na Mpelezi, na Mmivi, na Myebusi, habahuliche mwano gwa bibyo bikoko; ² bibyo habalisumbiche hamwechi boo bene wa boo bene, yulu ya ulwa bita na Yoshuau, na babo Baisilaeli, wa lango limwechi. ³ Alakini bashami ba Gibeoni habahuliche mwano gwa biya byose Yoshua byeligilile batu ba Yeliko na Ai, ⁴ boo baitile wa buhulihuli, nabo bagile nahi bene batuminywe, bagile na bilembelembe byaaha hegulu ha punda chabo, na bibila bya maalwa bibele byala na bya bibelebu-belebu na ubiwa bilaga; ⁵ na mikalabanda gya gichibuwe chibuwe na ulanjwa-lanjwa u magulu mabo, na mchwalichi gwa guosu byababele bachwale; iyaka mikati gyose nabiliwa byabo gibele gigumu na ugingila na mbubu. ⁶ Nabo bagile uli Yoshua uya u bushamo Gilgali, nabo bamsambile gee na batu ba Isilaeli, Bese twahuma sii gya koo abisa; wa bino iwe malagano hamwechi netu. ⁷ Haho batu ba Isilaeli babasambile baya Bahivi, Hange musushama hawingi hetu; beswe tunaosha wi ubiya malagano nenyu? ⁸ Nabo bamsambile Yoshua, Beswe tuli bagichi bobe. Yoshua gubabudiche, Benywe mwi bananyi? Na benywe mwahuma uhi? ⁹ Nabo bamsambile, Beswe bagichi bobe twahuma sii gyine gili koo abisa, wa ibalo ya china lya Mlume, Abetcha obe; bululi beswe twahulicha punda chage, na mwano gwa bibyo byose byligilile uya Misii, ¹⁰ na mwano gwa biya byose byeligilile maya maoolo mopi ma Maamoli, mene mabele m'bwala bwa bubili bwa Yolodani, noo gugo Sihoni, oolo lya Heshboni, na Ogu, oolo lya Bashani, gubele uya Ashtalothi. ¹¹ Hanyuma miungu gyetu, na bashami bose ba sii gyetu, badogomine netu na utusambila, Guhwe biliwa m maboo menyu wa yulu ya lwendo, mugye ubagaa babo batu, na ubasambila, Beswe tuli bagichi benyu; bino hano iswe malagano netu. ¹² Guno mkati gwetu tuguguhile gwili na aahya mndmadu metu, luya lusugu lwatuchuwile uchwa uno wenyu, gube iliwa yetu; alakini hano, loolwe, gwahuguma, na ugingilwa na mbubu; ¹³ na bibilabyetu bino, byatubiile ibugu, bibele bihya; bino, loolwe, byahubeleya-beleya; na bino bichwalaganywa byetu n mikalabanda gyetu byahuota wa yulu ya byatuchwile lwendo lula na lwa koo abisa. ¹⁴ Haho ba Isilaeli baguhile biya biliwa yabo, na bashihembile lango lya uhuma mnda anywa a Mlume. ¹⁵ Nage Yoshua muubiya talala hamwechi nabo, na uita malahanonabo, yulu balewe na mwego, na miungu gya sumbilo gibalahile pa. ¹⁶ Hanyuma ha, masugu matatu, bahuhwe ubiya malagano nabo, bahuliche mwano gwa ugana babo batu m babinji nabo, na ugana basushama hawingi habo. ¹⁷ Hanyuma baana ba Isilaeli bagimene na ugya, bamahyile mabuga ma babo batu mabele noo mano, Gibeoni, na Kefila, na Beelothi, na Kiliathi-yealimu. ¹⁸ Baana na Isilaeli bashibahagile, wa ibalo ya miungu gya sumbilo babele bahuhwa ubalahila pa wa Mlume, Abetcha a Isilaeli. Nalyo sumbilo lyose babanunine babo baulu. ¹⁹ Alakini baulu bose balisambile sumbilo lyose, Beswe twabalahila pa wa Mlume, Abetcha a Isilaeli; bino hano tushinaosha ubauda iyaka bano batu. ²⁰ Twibaitila ino inywa, hanyuma twibaleya babe na mwego, sungu chishichwe hegulu hetu, yulu ya ubo ulaha watubalahile pa. ²¹ Baulu babasambile, Balewe babe na mwego; bibyobabele ba ushaba kunyi, na butaha maadi, yulu ya sumbilo lyose; byoka biya nahi bibasambile baya baulu. ²² Bibyo Yoshua gubagitile, gudogome nabo, na ubasambila, Yulu yai beswe mutubichiche, uu muganine, Beswe tuli ba ko abisa nenyu; benywe mndi! Musushama hawingi hetu? ²³ Bino hno mwalogwa hanyuma hashihulwa uba mtu gwa wenyu mine guli mcha, gwa usanda kunyi, na gwa utaha maadi, wa yulu ya ndu gya Abetcha anyi. ²⁴ Nabo bamgaile Yoshua, na ugna, M waibalo ya beswe bgichi bobe usambilwa chigilwe, bili gugo Mlume, Abetcha obe byelimsambile mgichi gwage Musa umma benywe gino sii gyose, na ubachimya bashami bose ba gino sii bahume u mbele wenyu; w yulu ya bibyo tumonine boobe abisawa yulu ya mwego gwetu wa ibalo yenyu, noo ituitile iyo inywa. ²⁵ Bino hano, loola, beswe tuli mnda uboo obe; bino nahi byolihumona uba bisoga na kiine gyobe gogwe utuita, tuite bibyo. ²⁶ Nage gubaitile bibyo, na ubahogonona na uboo wa baana ba Isilaeli, yulu bashibahage. ²⁷ Loka lulo lusugu Yoshua gubaitile uba busanda kunyi, na butaha maadi, wa yulu ya sumbilo, na wa yulu ya butambikilo bwa Mlume, ndaa nalusugu luno lwa lino, mnda ihana iya yelisobola Mlume.