¹ Hanyuma Mlume gumsambile Yoshua, Ushinyemye, na ushididibuwe; ubaguhe batu bose ba bita na ugye hamwechi nobe, na benywe gimanywe, mugye Ai, lingamina, nene nalibiya mmuboo obe liya oolo lya Ai, na batu bage bose, na mbuga gyage, na sii gyage; ² gogwe wigiita mbuga gya Ai nahi byoliitile mbuga gya Yeliko na oolo lyge; alakini kole chagyo, na nyama chagyo cha mmbuga mwichiguha uba kole chenyu; gigyo mbuga wagibiile bugongelaluubi lwa unyuma. ³ Yoshua gugimene, na batu bose ba bita hamwechi nage, yulu bagye Ai, Yoshua gusobole batu uki maumi matatu, bilume pambwa bya batu bene bali na uosha, gubahilile mengo ma busugu. ⁴ Gubalagile, guganine, Lingaminywe, mwigongela uhembela giya mbuga, luubi lwa unyuma lwa mbuga, mushigya koo abisa na mbuga, alakini mwashame lumima benywe bose; ⁵ na nene, na batu bose bene balihamwechi nanyi, twigigila mbuga; hanyuma habibi, haho habichwa ulwa netu, nahi byabaitile lwendo lwa lutangi, beswe twisila u mbele wabo; ⁶ nabo bitobowa hanbuga batulame, na twibahyicha koo na mbuga gyabo; bululi bigana, Basina u mbele gyetu, nahi byabaitila lwendo lutangi; beswe tusina u mbel gyabo; ⁷ bibyo benywe mwiginyuwa muhume haya hene hamwabagongela, na uwata mbuga; yulu Mlume, Abetcha enyu, gwigibiya mbuga mmaboo menyu. ⁸ Hanyuma habibi, hamwihwa ugiwata mbuga, haho noo hamwigichigya mbuga na aahya; ulamana na iyo inywa ya Mlume; lingaminywe, namlaga, ⁹ Bibyo Yoshua gubahilile; nabo bagile ndaa na haya hene habibiya itunga, bashamine hawingi ha Betheli na Ai, luubi lwa igolo lwa Ai, alakini Yoshua gulalile haingi ha batu lulo lusugu. ¹⁰ Yoshua gubyuwile halwelo u mayaya, gusumbiche batu, hanyuma gulombole ugya Ai hambele ha babo batu, gee na baulu ba Isilaeli. ¹¹ Bato babo, bose ba bita, bene babele hamwechi nage, bagile bahiile, na uhiya u mbele wa mbuga, bashamine luubi lwa uboo wa uachi wa mbuga gya Ai, naho habele ihongelela hawingi hage na Ai. ¹² Hanyuma guguhile batu naho uki chitano, gubabiile itunga hawingi ha Betheli na Ai, luubi lwa igolo lwa gigyo mbuga gya Ai. ¹³ Haho bababiile bayabatu, ihichi igima yine ibele luubi lwa uboo wa uachi wa mbuga, na baya bene babele witunga ya luubi lwa igolo lwa mbuga; Yoshua gugile m'bubo busugu hawingi ha ihongelela. ¹⁴ Hanyuma habele guya oolo lya Ai helimonine iyo ikoko, noo helilihangiche abilo, nahababyuwile halwelo pee, na balumyana ba giya mbuga batobowile ugya hambuga ulwa na Isilaeli, gee na batu bage bose, ha mengo mene maganinywe, uhyila Alaba; alakini gushimanine ugana babele mnda itunga oyugutwila gyage u luubi lwa nyuma mbuga. ¹⁵ Hanyuma Yoshua na batu ba Isilaeli bose baitile nahi ugana baiswa na bita u meeso mabo, basinine ndila gya mgala. ¹⁶ Batu bose bene babele mnda mbuga bagitilwe usumbila hamwechi yulu ya ubalama Baisilaeli; nabo bamlamine Yoshua, bashenine hambele na ugishiga mbuga. ¹⁷ Hashishigele mtu mnda mbuga gya Ai, ao mnda Betheli, mine gushihumine hambuga ulama Isilaeli; bashigile mbuga hululu yulu ya ulama Isilaeli. ¹⁸ Hanyuma Mlume gumsambile Yoshua, Bino, ubegolola lilyo sumo lyoli nalyo m muboo obe, ulisonge luubi lwa Ai; yulu nigibiya m muboo obe, Babyo Yoshua gugolole lilyo sumo lyelibele nalyo m muboo wage ulisunga gigyo mbuga. ¹⁹ Baya batu bene babele mmitunga wa abilo uhuma u bihana byabo, nabo bahimbile abilo abisa haya heligolwele uboo wage, bagingile mnda mbuga, na ugihima; nabo baitile abilo ugichigya giya mbuga na aahya. ²⁰ Hanyuma babo batu ba Ai habalolile unyuma wabo, bamonine, na loola, mii gwa gigyo mbuga gwahusela hegulu ugya u matimba, nabo bashibele na uoma wa usinina uu na uu; na baya batu bene babele husina usinina mgala bagalwile naubagiwilila baya bene babele hubalama. ²¹ Bibyo haho Yoshua na Isilaeli yose habamonine ugana bya bene babele hugigongela bahuhwa ugiwata gigyo mbuga, na ugana mii gwa gigyo buga gwahusela hegulu, haho boo nuugaluwa iyaka, na uligilwila ubahaga batu ba Ai. ²² Iyaka babo; bange batobowile hambuga ha gigyo mbuga pyutugilwa gyabo; wa bibyo babele hawingi ha Isilaeli, benge lulu luubi na bange lulu luubi; nabo babahagile, ndaa na bashishigile ata mtu gumwechi hawingi habo mine gushigele, na ata uhogonowa. ²³ Hanyuma bam'bwatile oolo lya Ai guli poo, nabo bamlushishe wa Yoshua. ²⁴ Hanyuma bibele, haho Isilaeli habbele bahuhwa ubahaga bashami bose ba Ai u mabala, mnda lwanaganywa mwababele hubalamina, nabo babele bahuhwa ugwa wa bwigi bwa ahilu, na hababele bahuchimiwa bose, haho noo Isilalei haigiwile Ai, na ugilwa gigyo mbuga wa bwigi bwa ahilu. ²⁵ Bose bene bagwile lulo lusugu balumyana na baachana, babele uki umi na chibili,noo ugana batu bose ba mbuga gya Ai. ²⁶ Yulu gugo Yoshua gushichibile uboo wage, uya ugololwe liya sumo, ndaa na byelibele gwahuhwa ubachimya abisa bashami bose ba Ai. ²⁷ Nambo nyama cha mmbuga na kole cha mmbuga Isilaeli iguhile uba bibya byabo, ulamana na iyainywa ya Mlume yelimsambie Yoshua. ²⁸ haho Yoshua gugichigiche mbuga gya Ai na aahya, na ugiita uba mitala gya bibunduguchu ndaa na milumbu, uba m mauwa ndaa na lusugu luno lwa lino. ²⁹ Na lilyo oolo lya Ai gulisundile u mti uhiya namengo ma igolo; hanyuma ha haho chuba lisibele lyahuchinda Yoshua gulagile, nabo baihuminye itumba yage u mti, na wisumbula haya ha bugingililo bwa limbwa lya mbuga, hanyuma baongole mtala gwa mawe meengi hegulu hayo, ndaa na lino. ³⁰ Bibyo Yoshua gugimiya butambikilo wa Mlume, Abetcha a Isilaeli u loono lw Ebali. ³¹ Nahi Musa, mgichi gwa Mlume, byelibasambile baana ba Isilaeli, nahi byabigolilwe mnda itabo ya m'bindo gwa Musa, butambikilo bwa mawe mashi ma mabachwe, mene mashinagililwa hegulu hamo na mtu ibya yose ya igela; nabo batambikile hegulu habo lutangi la uchigya yulu ya Mlume, naushinja lutangi lwa talala. ³² Gugolile hegulu hamo mgolo gwa m'bindo gwa Musa, gwine gweligolile u meeso ma baana ba Isilaeli. ³³ Na Isilaeli yose, na miungo gyabo, na baata ba mabuga mabo, na tululiya twabo, bagimanine luubi lulu lwa lindo na lulu luubi, u mbele wa bibuli Balawi, benebaliswalile lindo lya Mlume, guya gubele mine gubele menyi hamwechi na guya m'buswa; isunyi yabo u mbele wa loono Gelizimu, na isunyi yabo u mbele wa loono Ebeli, nahi Musa mgichi wa Mlume byeliganine, yulu babahalile mihaa batu ba Isilaeli uba batangi. ³⁴ Na hanyuma gusungule binywa byose bya m'bindo, mihaa na buloga, ulamana na binywa byose byine bigolilwe mnda m'bindo. ³⁵ Hashibele ata na inywa imwechi u biya byine biganine Musa, yina ishisungulwe na Yoshua u mbele wa sumbilo lyose lya Isilaeli, nau mbele wa baachana na baana na bagenyi bene babashamine nabo.