¹ Alakini baana ba Isilaeli baitile buubi wa ibya iya yine ibagulwe; yulu Akani mwaana gwa Kalmi, mwaana gwa Zabdi, mwaana gwa Zela, gwa ilongo ya Yuda, gughile bimwe bibya byine bibagulwe; sungu cha Mlume chilamine yulu ya baana ba Isilaeli. ² Hanyuma Yoshua guhilile batu uhuma Yeliko ndaa na mbuga gya Ai, gyine gili hoka na Bethaveni, luubi lwa mlugulu mwa Betheli, gubasambile, guganine, Chinywe hegulu mugidinde sii, bibyo baselile hegulu badindile Ai. ³ Bagiwile wa Yoshua bamsambile, Bashigye batu bose, alakini bagye nahi batu uki chibili, chitatu ka, bilwa Ai, ushibaimye batu bose yulu ya ugya uya; bululi batu bagyo m bacho ka. ⁴ Bibyo batu bagile uya nahi uki chitatu ka; nabo basinine u mbele wa batu ba Ai. ⁵ Batu ba Ai bahagile batu nahi maumi matatu na mtuba; babalamine uhuma u mbele wa limbwa lya Shebalimi, babahagile uya u mmundumuo; mitima ya batu gididibuwe nahi maadi. ⁶ Yoshua guglile bichwalaganywa byage, gugwile mmachwi u mbele wa lindo lya Mlume ndaa na igolo, gee na baulu ba Isilaeli; balibiile ihwili u miswe gyabo. ⁷ Yoshua guganine, Ee Mlume, Abetcha, yulu yai ubadabule bano batu luudi lwa Yolodani, m yulu ya utubiya mnda maboo ma Baamoli, na utuchimya? Nambo byisuba lingye ugitabichiwa ushama m'bwala mwa Yolodani. ⁸ Ee Mlume, nagane ii hanyuma ha Isilaeli ubateya migongo ba tumangu twabo? ⁹ Bululi Bakanaani nabashami bose ba gino sii bihulicha guno mwano, nabo bituchunguluwa, na ulichima china lyobe mnda sii. Na gogwe wigila ii yulu ya cina lyobe lyata? ¹⁰ Mlume gumsambile Yoshua, Bino! Ginyuwa, yulu yai wagwa m machwi bino? ¹¹ Isilaeli bagila buubi, ehe, babele malagano manyi mandobalagile; ehe, gaguhile bimwe bibya bibagulilwe; iyaka bagibile, iyaka babisile, na ubibiya hamwechi na bibya byabo. ¹² Wa bibyo baana ba Isilaeli bashinaosha ugimana u mnele wa tumangu twabo; babateile migongo tumangu twabo, bululi bali balogwe; nene nishibi hamwechi nenyu iyaka, musahugugicha ibya iya yine yamli nayo yine ibagulwe. ¹³ Bino! Ginyuwa, ubahahache batu, wagane, Lihahachiwe, mube lumina mmeshi; bululi Mlume, Abetcha a Isilaeli, gwagana bino; Ibya yine igabulwe ili hawingi hobe, Ee Isilaeli; ushinaosha ugimana u mbele wa tumangu tobe, ndaa na byamwiiunya iya yamli nayo yine ibagulwe. ¹⁴ Bino halwelo mwilushiwa hoka nanyi ilongo wa ilongo; hanyuma ubi ugana iya ilongo yine yeliguha Mlume noo yishena ibushi wa ibushi; na ibushi iya yina yaliguha Mlume, yishema ndu wa ndu; na ndu giya gyeliguha Mlume gyishema mtu wa mtu. ¹⁵ Iyaka bibi ugana guya mine gwiguhwa, nage gwinayo iya yine ibagulwe, gwichigiwa wa aahya, gee na bibya byose byine byeli nabyo; wa bululi bwanoga malagano ma Mlume, na wa ibalo gwagila bya buhugi mnda Isilaeli. ¹⁶ Haho Yoshua gugimene halwelo pee, gubashenyinye Isilaeli ilongo wa ilongo; ilongo ya Yuda iguhilwe. ¹⁷ Gushennye ibushi ya Yuda, guguhile ibushi ya Bazela; gushininye ibushi ya Bazela mtu wa mtu; Zabdi guguhilwe. ¹⁸ Gubasheninye batu ba ndu gyage gomwechi gumwechi; na Akani, mwaana gwa Kamli, mwaana gwa Zabdi, mwaana gwa Zela, gwa ilongoya Yuda gee nuuguhwa. ¹⁹ Yoshua gumsambile Akani, Mwananyi, nihuutendelela, umginune Mlume, Abetcha a Isilaeli, walibeche wege; usambile bino yoligilile;ushimbise. ²⁰ Akani gumgaile Yoshua, guganine, winene, nigilile buubi uli Mlume, Abetcha a Isilaeli, nene niitile bikoko bibi na bibi. ²¹ Handimonine kole gya ichibabo ya isoga ya Babeli, na shekeli sambi chibili cha lusuu, na ihindi ya nolo, bushito bwayo m shekeli maumi matano, bibyo nibisimbile nibiguhile; loola, nibisile mnda isee hawingi ha itula yenyi, naluya lusuu hasi hacho. ²² Bibyo Yoshua gutumine batu uhinga abilo ugya witula yage; na loola, biyabibya bibele bibiswe mnda itula yage, naluyablusuu hasi hacho. ²³ Babihuminye haya hawingi ha itula, babilushishe wa Yoshua, na u baana ba Isilaeli bose, nabo babibiile hasi u mbele wa Mlume. ²⁴ Hanyuma Yoshua, na Isilaeli bose hamwechi nage, bamguhile Akani, mwaana gwa Zela, naluya lusuu, na Iya chibabo, na iya ihindi ya nolo, na bawalubaga bage na misiha gyage, na myoo gyage, na itula yage, nabibya byose byine byebele nabyo, babilushishe ndaa na ihongelela ya Akoli. ²⁵ Yoshua guganine, Yulu yai watudidibula bino? Mlume gwiudidibula gogwe lino. Haho Isilaeli yose bamtele mawe, hanyuma bamchigiche waahya, na ubata baana bage mawe. ²⁶ Hanyuma baongole hegulu hage mtala gwata gwa mawe ndaa na lino; nage Mlume noo uleya buhuchi bwa sungu chage. Wa yulu ya bibyo china lya iya ihana igitilwe, ihongelela ya Akoli, ndaa na lino.