¹ Bibele, maolo ma Baamoli, babele hushama m'bwala mwa Yolodani luubi lw mlugulu, na maolo mose ma Bakanaani, bene babele hoka na Bahali, habahuliche mwano gwa Mlume byeliguminye maadi ma Yolodani u mbele wa baana ba Isilaeli, ndaa na byatudabwile, bino mitima gyabo gididibuwe, na luhuda lwabo lushibele iyaka na uoma mnda mwabo; waa ayaualua yaa baaba ba Isilaeli. ² Mamo mengo Mlume gumsambile Yoshua, Bino, ulilongeche twele twa mawe ma memba, ubagishe iyaka kumbi baana ba Isilaeli lwendo lwa bubili. ³ Haho Yoshua gulilongeche twele twa mawe ma memba, gubagishiche kumbi baana ba Isilaeli uya Gibea-haalalothi. ⁴ Na ibalo ya Yoshua ugisha kumbi noo ino; batu bose bene bahumine Misili, bene babele balumyana, babo balumyana bose ba ugya u bita bawile mnda mgala m ndila, hanyuma habo uhuma Misili. ⁵ Bululi batu bose bene bahuline Misili babele bahuhwa ugya kumbi; alakini batu bose bene babutilwe mgaala mndila hababele hahuhwa uhuma Misili, babo bashibele nagya kumbi. ⁶ Bululi baan ba Isilaeli bagyatile myaa maumi mana mnda mgala, na ata gugo mmoga gugima, noo, balumyana bene basugya u bita, benebahumine Misili, habahwile udigwa; yulu bashihuliche liidi lya Mlume; nabo noo Mlume gubalahile ugana gushibaleya baamone giya sii, gyine Mlume gubalahile pa bamasabo ugana gwituha beswe; sii gyagigiluchu mabele na bui. ⁷ Na baana babo, bene beliginune hanyuma habo noo baya bene bagishiwe kumbi na Yoshua; bululi babo babele bashinagya kumbi, wa yulu babele bashinahilwa kumbi m iya ndila. ⁸ Haho habahwile ugya kumbi mmoga gose gugima, bashamine mtu ge gese ha ihana yage u bushamo, ndaa na byabahwile uhona . ⁹ Mlume gumsambile Yoshua, lusugu luno lwa lino nabilingicha abule aya a ahume hegulu henyu. Wa liya china lya iya ihana ilihugiswa Gilgali, ndaa na ata lino. ¹⁰ Bibyo baana ba Isilaeli bagimiyabitula byabo uya Gilgali; nabo balile lusugu lwa ulituchalwa Pasaka lusugu lwa umi na buna lwa mwechi, mengo ma igolo, mnda sii gya ibandabanda ya Yeliko. ¹¹ Nabo balile biliwa bya gigyo sii lusugu lwa bubili lwa ulama lusugu lwa ulitucha lwa pasaka, mikati gishi gyagibiwe mshimi, na mituchi gya mabele, mpunga, na buloo.loka lulo lusugu. ¹² Haho giya mana noo usunga lusugu lwage lwa bubili, hanyuma babo uuya biliwa bya giya sii; na babo baana ba Isilaeli bashibele iyaka na mana; alakini batulile uuya biliwa bya sii gya Bakanaani gugo mwaa. ¹³ Haho Yoshua helibele hoka na mbuga gya Yeliko, guginune meeso mage na ulingamina, loola, mtu gwa mlumyana gugimene umshenena u mbelewage, nage gubele na ahilu ali hululu m muboo wage; Yoshua gumgilile, na umsambila, Wi wii! Gogwe uli luubi lwetu, ao luubi lwa tumangu twetu? ¹⁴ Gumganine, Nangu! alakini nchwa bino, nili ilume pambwa ya basolokoato ba Mlume. Yoshua gugimanine yenyi hasi, nage gumginamine, gum'budiche, Mlumyanyi gwasambila ii nene mgichi gwage? ¹⁵ Iyo ilime pabwa ya basolokoto ba Mlume gumsambile Yoshua, chula mikalabanda gyobe uhuma u magulu mobe; bululi ino ihana yawagimana m yihana ya ihaha. Yoshua guitile bibyo.