¹ Bibele, haya guya mmoga gose haguhwile udabuwa Yolodani, haho noo Mlume gudogomone na Yoshua, gumsambile, ² Bino, muguhe balumyana umi na babili hawingi ha babo batu, m milongo mtu gumwechi, ³ hanyuma wabasambile, ugana, Guhwe mawe umi na mopi, m bwingi mwa Yolodani, ha ihana iya yine ili magulu ma bibyo bibuli hamabele magimanyu boo, mwagye namo mamo mawe, mwamabiye hamgala ha bushamo, haya hene hamwilala buno busugu. ⁴ Haho Yoshua gubagitile baya batu umi na bopi, belibele gwahuhwa ubabiya lumima utula haya, mnda bilongo bya baana ba Isilali mtu gomwechi gumwechi; ⁵ Nage Yoshua gubasambile, Bino benywe hiswehambele ha lindo lya Mlume, Abetcha eynu, giwe haya hawingi ha Yolodani, mwaguhe ge gese genyu liwe limwechi ha ombe lyage, wa ulamana na lubalo lwa bilongo bya baana ba Isilaeli; ⁶ Yulu ya ugana ino ikoko yabe isaga hawingi henyu, haya henehibabucha baana benyu ha masugu mene michwa, bigana, M yii mano mawe yamalihulisamba? ⁷ Bibyo mwibasambila, m yibalo ya maadi ma Yolodani magimene u mbele wa lindo lya malagano lya Mlume; haya halidabwile Yolodani, maya maadi ma Yolodani magimene; namamo mawe mabi kengelecho u baana ba Isilaeli milumbu. ⁸ Bibyo baana ba Isilaeli baitile byoka biya nahi bibasmbile Yoshua, nabo baguhile mawe umi na mabili m bwingi na Yolodani, nahi bisambilwe Yoshua na Mlume, ulamana nalubalo lwa baana ba Isilaeli; bamaguhile, badabwile namo ndaa na ihana yine yabalalile, nabo bamabiile mtala hoka haya. ⁹ Hanyuma Yoshua gubiile mawe umi na mabili m bwingi na Yolodani, ha ihana iya yine ibele magulu ma bibuli byabiswale lindo lya malagano hamabele magimanyu; namo mali hoka haya ata na lino. ¹⁰ Bululi bibuli byine bisalile liya lindo bibele bigimanyu m bwingi na Yolodani, ata na bikoko bose Mlume byelimsambile Yoshua, gabasambile babo batu byonuhwa, ulamana na byose Musa byelimsambile Yoshua; hanyuma babo batu baitile abilo udabuwa. ¹¹ Habibele batu bose bahuhwa udabuwa abisa, lilyo lindo lya Mlume lidabuwe, na bibyo bibuli, u bele wa meeso ma babo batu. ¹² Na baana ba Leubeni, na baana ba Gadi na iyo isunyi ya ilongo ya Manase, badabwile, bali bachwale tulume gela u mbele wa baana ba Isilaeli, nahi Musa byelibsambile; ¹³ babele nahi batu uki maumi mana wa lubalo lwabo, bene bali bachwale tulume gela lumima u bita, bene badabwile u mbele wa Mlume, bagye u bita, ndaa na ibetabeta ya sii gya Yeliko. ¹⁴ Luya lusugu Mlume gumginyune Yoshua u mbele wa meeso ma Isilaeli yose; nabo bamnyeminye, nahi byababele humnyemya Musa, masugu mose ma mwego gwage. ¹⁵ Hanyuma Mlume godogomine na Yoshua, gumsambile, ¹⁶ Bino ubasambile ba bibuli, bene baliswalile lindo lya mangisiyo, ugana badabuwe uhuma mya mnda Yolodani. ¹⁷ Haho Yoshua gubasambile baya ba bibuli, gubasambile, bino, dabuwe uhuma m Yolodani. ¹⁸ Bibele, haya baya ba bibuli bene baswalile lindo lya malagano lya Mlume habadabwile uhuma mya mnda Yolodani, byahi bya magulu mabo babo ba bibuli habiginyunywe na uhiya u mgala u bitete bya bigumu, haho noo maadi ma Yolodani hamagiwile wihana yamo na ugilula na uhima bisula byamo, nahi byamabele haya hatangi. ¹⁹ Na baya batu badabwile uhuma m Yolodani lusugu lwa umi lwa mwechi gwa gutangi, bahiile na ushama Gilgali, lugumba lwa mlugulu mwa Yeliko. ²⁰ Na maya mawe umi na mabili mene mabaguhile m bwingi mwa Yolodani Yoshua gumagimiile haya Gilgali. ²¹ Gubasambile baana ba Isilaeli, guganine, Baana benyu habim'bucha bamasbo ha masugu mene michwa, babegana, mano mawe malihusamba ii? ²² Noo hamwibaha mwano baana benyu mwigana, Isilaeli idabwile luudi Yolodani, wa ndila gya bitete bya bigumu. ²³ Bululi Mlume, Abetcha enyu aguminye maadi ma Yolodani, u mnele wenyu, ndaa na byamuhwile udabuwa nahi Mlume, Abetcha enyu, byeligilile Bahali lya Shamu, byeliliguminye u mbele wenyu ndaa na tuhwile udabuwa; ²⁴ batu bose ba ino ibaloo baoshe umana uboo wa Mlume, m yugana m yuboo wine uli na uosha, yulu bamnyemye Mlume, Abetcha enyu milumbu.