¹ Yoshua gugimene halwelo pee, nabo bachuwile Shitimu badabwile luudi Yolodani, gee na baana ba Isilaeli bose, bashamine haya hambele ha udabuwa. ² Habele hanyuma ha masugu matatu, baata ba mabuga bahitile hawingi ha bitula, ³ Babasambile batu ugana, Hamwilimona lindo lya malagano ma Mlume, Abetcha enyu, na bibuli Balawi m baliswale, haho noo hamwichuwa hano hamli na ulilama. ⁴ Alakini, haabe ihana hululu hawingi henyu na liya lindo, nahi biya magulu maumi mopi; mushilihyile noo mwoshe ugimana ndila byamulingye ugigila; yulu mushinagihitila ata gino ndila. ⁵ Yoshua gubasambile batu, Lihahachiwe; bululi mmeshi Mlume gwigila bya tenene hawingi henyu. ⁶ Hanyuma Yoshua gubasambile ba Bibuli, guganine, Litundulwe lindo lya malagano, mwadabuwe hambele ba babo batu. Balitundule lindo lya malagano balombole hambele ha batu. ⁷ Mlume gumsambile Yoshua, Bino lino nitula uuginyuna u meeso ma Isilaeli yose, baamane ugana nene nibi hamwechi nobe, nahi byandibele hamwechi na Musa. ⁸ Gogweubasambile babo ba bibuli baliswale lindo lya malagano, wabasambile, Hamwihiya u m'bega gwa maadi ma Yolodani, mwagimane m maadi ma Yolodani. ⁹ Haho Yoshua gubasambile baana ba Isilaeli, Chuwe uno, muhuliche binywa bya Mlume, Abetcha enyu. ¹⁰ Yoshua guganine, Wa iyo ikoko mwimana ugana Abetcha ene ali na mwego ali hawingi henyu, naugana gushihulwa ubahunya u mbele wenyu Mkanaani, na Mmiti, na Mhivi, na Mpelizi, na Mgilgashi, na Mmamoli, na Myebushi. ¹¹ Loolwe, lindo lya malagano lya Mlume gwa ibaloo yose lyigingila hambele henyu na udabuwa Yolodani. ¹² Bino hano guhwe batu umi na bopi mnda bilongo bya Isilaeli, ilongo yo yose mtu gumwechi. ¹³ Habibi, mengo ma byaasa asa bya bibuli bene bali baliswale lindo lya Mlume, Mlume gwa ibaloo yose, hamigimana m maadi ma Yolodani, mamo maadi ma Yolodani migimana, maya maadi ma usala uhuma mlugulu; namo migimana nahi yulugulu. ¹⁴ Na bibele, baya batu habachuwile uhuma m bitula byabo, yulu ya udabuwa Yolodani, bibuli bene baswalile lindi lya malagano balumbwele hambele ha batu. ¹⁵ haya bene baswalile liyalindo habahiile m Yolodani, na byaasa asa bya bibuli byabiswale lindo habigingile mnda maadi ma wibega, (yulu Yolodani isugilula ndaa na umibega gyage na utupuwa mengo mose ma usola) , ¹⁶ bibyo maya maadi musala uhuma mlugulu noo ugimana, m'bimbi, mabele yulugulu, koo abisa nabo, uya Adamu, mbuga giya gili hoka na Selethani, na maadi maya mene mabele husala ugya u bahali lya Alaba, noo, Bahali lya miinyu, magimene abisa; batu badabwile hoka na Yeliko. ¹⁷ Na bibyo bibuli byabiswale lindo lya malagano lya Mlume bagimanine boo ha bitete bya bigumu m bwingi mwa Yolodani; Isilaeli yose idabwile ha bitete bya bigumu, ndaa na bihwile mmoga guya gose udabuwa Yolodani.